រយៈពេលមួយសប្ដាហ៍ សមត្ថកិច្ចបន្តឃាត់ខ្លួនក្មេងទំនើងបានជាង ៧០នាក់បន្ថែមទៀត

ក្នុងរយៈពេលពេញមួយសប្ដាហ៍កន្លងទៅនេះ យ៉ាងហោចណាស់មានក្រុមក្មេងទំនើងសរុបចំនួន ៧៥នាក់ ត្រូវបានកម្លាំងនគរបាលជាតិ ចាប់ឃាត់ខ្លួនជាបន្តបន្ទាប់ ក្រោយពីពួកគេធ្វើសកម្មភាពរំខានដល់សន្តិសុខ សុវត្ថិភាព សណ្ដាប់ធ្នាប់សាធារណៈដែលប៉ះពាល់ដល់គោលនយោបាយភូមិ-ឃុំ-សង្កាត់មានសុវត្ថិភាព។ នេះបើតាមលោក ទូច សុខៈ អ្នកនាំពាក្យរងក្រសួងមហាផ្ទៃ បានឱ្យដឹងនៅថ្ងៃទី១៩ ខែមីនា ឆ្នាំ២០២៤។

លោក ទូច សុខៈ បានបញ្ជាក់ថា ក្រុមក្មេងទំនើងទាំងនោះ បានប្រព្រឹត្តសកម្មភាពជាក្រុមផ្សេងៗគ្នាសរុបចំនួន ២៣ករណី ក្នុងនោះនៅរាជធានីមាន១១ករណី ឃាត់ខ្លួន ១៥នាក់ ខេត្តស្វាយរៀង មាន៣ករណី ឃាត់ខ្លួន ៣នាក់ បាត់ដំបង មាន២ករណី ឃាត់ខ្លួន ៤៤នាក់ ត្បូងឃ្មុំ មាន២ករណី ឃាត់ខ្លួន ៥នាក់ កណ្ដាល មាន២ករណី ឃាត់ខ្លួន ៥នាក់ ពោធិ៍សាត់ មាន២ករណី ឃាត់ខ្លួន ២នាក់ និងខេត្តកំពង់ធំ មាន១ករណី ឃាត់ខ្លួន ១នាក់។

ជាការកត់សម្គាល់ ពីដើមឡើយជំនួសឱ្យពាក្យក្មេងទំនើង ចាស់ៗ ឬអ្នកដឹកនាំភូមិ ឃុំ សង្កាត់ ច្រើនតែសម្គាល់ក្រុមអុកឡុកសង្គម ដោយពាក្យ ក្រុមជនពាល ពួកអន្ទពាល ឬពួកយូកូងជាដើម។ បច្ចុប្បន្នពាក្យ «ក្មេងទំនើង» ត្រូវបានរាជរដ្ឋាភិបាល កំណត់ប្រើជាផ្លូវការ ក្នុងគោលនយោបាយភូមិ-ឃុំ-សង្កាត់មានសុវត្ថិភាព។ ពួកគេភាគច្រើនជាក្មេងមិនស្ដាប់ការអប់រំ ទទួលឥទ្ធិពលគ្រឿងញៀន និងឥទ្ធិពលនៃការធ្វើសកម្មភាពអសីលធម៌តៗគ្នាលើបណ្ដាញសង្គម៕