ក្រសួង​បរិស្ថាន​និង​ទូតបារាំង​ លើក​​ឡើង​​រួមគ្នា​ក្នុងការ​​លុបបំបាត់ការប្រើប្រាស់ថង់​ប្លាស្ទិក

ក្នុង​ជំនួប​មួយ​កាលពី​ថ្ងៃ​២១ ខែកញ្ញា ឆ្នាំ២០២៣ ​រ​ដ្ឋមន្រ្តីក្រសួង​បរិស្ថាន​កម្ពុជា​ និង​ឯកអគ្គរដ្ឋទូតនៃសាធារណៈ​រដ្ឋបារាំង​បានលើកឡើង​ពីគោលដៅរួមគ្នា​​​ក្នុង​ការ​​ប្រយុទ្ធប្រឆាំងសំណល់រឹង និង​បញ្ហាថង់ប្លាស្ទិក​។

លោក អ៊ាង សុផល្លែត រដ្ឋមន្រ្តីក្រសួ​ងបរិស្ថាន​មានប្រសាសន៍​ថា បញ្ហាថង់ប្លាស្ទិកត្រូវតែដោះស្រាយ ទើបក្រសួងដាក់ចេញនូវយុទ្ធនាការកាត់បន្ថយ និង​ឈានឆ្ពោះទៅបញ្ឈប់ការប្រើប្រាស់ថង់ប្លាស្ទិករបស់សិស្សានុសិស្សនៅតាមសាលារៀន ដែលកំពុងចូលរួមយ៉ាងសកម្មក្នុងយុទ្ធនាការនេះ ហើយនឹងបន្តទៅម្ចាស់អាជីកម្ម ឬក្រុមហ៊ុនឯកជន ។

ជាលទ្ធផល ខេត្តមួយចំនួនបានប្តេជ្ញាចិត្តចំពោះគំនិតផ្តួចផ្តើម នេះ រួចហើយ ដោយទទួលបានការចូលរួមគាំទ្រពីសំណាក់​លោកគ្រូ អ្នកគ្រូ និងសិស្សានុសិស្សជាង ៤០ ម៉ឺននាក់។ លោករដ្ឋមន្រ្តីលើកទឹកចិត្តឱ្យមានការចូលរួមដាក់បញ្ចូល​ទៅក្នុងការ​អប់រំ​ឲ្យ​អនុវត្ត​ជាទម្លាប់ល្អក្នុងសង្គម។

លោកបបញ្ជាក់ថា ការប្រយុទ្ធប្រឆាំងនឹងសំណល់រឹងជាអាទិភាពទីមួយ ចំណែកអាទិភាពទី២ គឺការបង្កើតធុងសំរាមអេកូបេតុងសម្រាប់ការប្រើប្រាស់បានយូរ ។

ជាការឆ្លើយតប​លោក​ឯកអគ្គរដ្ឋទូតទទួលស្គាល់ថា ការគ្រប់គ្រងជីវចម្រុះនិងសំណល់ គឺជាបញ្ហាប្រឈមទូទៅទាំងប្រទេសបារាំង និងកម្ពុជា។

លោក​​ឯកអគ្គរដ្ឋទូតក៏​បាន​លើកអំពីផែនការរបស់លោកប្រធានាធិបតីបារាំង Macron ស្តីពីការលុបបំបាត់ការប្រើប្រាស់ប្លាស្ទិក ដែលជាគំនិតនៃការបង្កើត “ស្ថានទូតគ្មានដបប្លាស្ទិក”។ លោកក៏បានចែករំលែកព័ត៌មាន​ទាក់ទងនឹងគម្រោងរបស់បារាំង ដើម្បីសាងសង់រោងចក្រកែច្នៃឡើងវិញនៅរាជធានីភ្នំពេញ។

ឯកអគ្គរដ្ឋទូតបានបង្ហាញចំណាប់អារម្មណ៍ ក្នុងការស្វែងរកជម្រើសថង់ប្លាស្ទីក​ដែលមានមូលដ្ឋានលើដំឡូងមី ដែលមាន​សារៈសំខាន់​​នៃការបង្ការជាជាងការសម្អាតសំណល់ និងការដាំដើមឈើឡើងវិញគោលដៅសម្រេចបាននូវការកាត់បន្ថយការបំភាយកាបូនមុនឆ្នាំ ២០៥០។