ស្របពេលកម្ពុជាជាប់លេខ១ ផ្នែកបរិស្ថានធម្មជាតិ ថ្នាក់ដឹកនាំជំរុញរួមគ្នាកាត់បន្ថយសំណល់ប្លាស្ទិក និងការពារបរិស្ថាន

ក្នុងឱកាសខួបលើកទី៣០ នៃទិវាបរិស្ថានជាតិ និងទិវាបរិស្ថានពិភពលោក ឆ្នាំ២០២៦ ក្រោមប្រធានបទ «សំណល់សូន្យ» ថ្នាក់ដឹកនាំកំពូលៗរបស់កម្ពុជា បានអំពាវនាវឱ្យប្រជាពលរដ្ឋគ្រប់មជ្ឈដ្ឋាន ចូលរួមកាត់បន្ថយសំរាម និងសំណល់ប្លាស្ទិក ដើម្បីរួមគ្នាថែរក្សាបរិស្ថានឱ្យមានភាពស្អាត បៃតង និងប្រកបដោយចីរភាព។

នាយករដ្ឋមន្ត្រី សម្តេចធិបតី ហ៊ុន ម៉ាណែត បានបង្ហោះសារលើបណ្តាញសង្គមដោយគូសបញ្ជាក់ថា ទិវានេះរៀបចំឡើងដើម្បីលើកកម្ពស់ការយល់ដឹងអំពីបរិស្ថាន និងជំរុញចលនាប្រជាពលរដ្ឋ ព្រះសង្ឃ កងកម្លាំងប្រដាប់អាវុធ មន្ត្រីរាជការគ្រប់លំដាប់ថ្នាក់ សិស្ស និស្សិត និងសាធារណជនទាំងអស់ ចូលរួមឱ្យបានផុសផុល ក្នុងកិច្ចគាំពារបរិស្ថាន (គុណភាពខ្យល់ ទឹក សំឡេង) ការគ្រប់គ្រងសំរាម ប្លាស្ទិក និងសំណល់រឹង ដើម្បីរួមគ្នាការពារភពផែនដីយើង ឱ្យមានភាពស្អាត បៃតង និងចីរភាព ជាឧត្តមប្រយោជន៍ ដល់សង្គម និងមនុស្សជាតិគ្រប់ជំនាន់។

ជាមួយគ្នានេះ សម្តេចតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភា ក៏បានបង្ហោះសារអបអរសាទរយ៉ាងខ្លីខ្លឹមចំពោះការប្រារព្ធខួបលើកទី៣០ នៃទិវាបរិស្ថានជាតិ និងបរិស្ថានពិភពលោកនេះផងដែរ។ ការចេញសាររបស់ថ្នាក់ដឹកនាំទាំងពីរ បានស្តែងឱ្យឃើញពីការយកចិត្តទុកដាក់ខ្ពស់ ចំពោះកិច្ចគាំពារបរិស្ថាន និងការអភិវឌ្ឍដោយចីរភាព។

ក្នុងឱកាសខួបលើកទី៣០នេះ កម្ពុជាតាមរយៈក្រសួងបរិស្ថាន បានប្រារព្ធទិវាបរិស្ថានជាតិ និងពិភពលោក ក្រោមប្រធានបទ «សំណល់សូន្យ» សំដៅជំរុញការកាត់បន្ថយសំរាម ការប្រើប្រាស់ឡើងវិញ ការកែច្នៃ និងការគ្រប់គ្រងសំណល់ប្រកបដោយប្រសិទ្ធភាព។

គួរជម្រាបថា ប្រទេសកម្ពុជាត្រូវបាន U.S. News & World Report ចាត់ថ្នាក់ជាប្រទេសដែលមានបរិស្ថានធម្មជាតិល្អលេខ១ នៅលើពិភពលោក។ ប្រមុខរដ្ឋស្តីទីកម្ពុជា សម្តេចតេជោ ហ៊ុន សែន បានចេញសារអបអរសាទរ និងចាត់ទុកលទ្ធផលនេះថាជាមោទនភាពជាតិ ដែលកើតចេញពីកិច្ចខិតខំប្រឹងប្រែងរួមគ្នារបស់រាជរដ្ឋាភិបាល និងប្រជាជនក្នុងការថែរក្សាធនធានធម្មជាតិ៕