រាជរដ្ឋាភិបាល នឹងបញ្ចេញថវិកា ១០០លានដុល្លារ ជួយកសិករធានាតម្លៃ​ផលកសិកម្ម

រាជរដ្ឋាភិបាលកម្ពុជា ​នឹងបញ្ចេញថវិកា ១០០លានដុល្លារ ដើម្បីធានាតម្លៃកសិផលរបស់ប្រជាកសិករ រហូតដំណាច់​ឆ្នាំ២០២៣។ ទន្ទឹមនេះ រដ្ឋនឹងជ្រើសរើសមន្ត្រីបង្គោលផ្នែកកសិកម្មចំនួន ២៥០នាក់ ដើម្បីពង្រាយតាមឃុំ ជួយកសិករ​ដែលមានបញ្ហាផ្នែកបច្ចេកទេស លើការដាំដុះ និងចិញ្ចឹមសត្វផងដែរ។ នេះជាការបញ្ជាក់របស់សម្តេចធិបតី ហ៊ុន ម៉ាណែត ក្នុងឱកាសជួបសំណេះសំណាល ជាមួយប្រជាពលរដ្ឋខ្មែរនៅសហរដ្ឋអាមេរិក និងប្រទេសកាណាដា នៅទីក្រុងញ៉ូយ៉ក សហរដ្ឋអាមេរិក កាលពីថ្ងៃទី២៣ ខែកញ្ញា ២០២៣។

សម្តេចនាយករដ្ឋមន្ត្រីបានថ្លែងថា «យើងបានត្រៀមកញ្ចប់ ១០០លានដុល្លារ និងអាចវិភាជថវិកាបន្ថែម បើសិនមាន​តម្រូវការ ដើម្បីអន្តរាគមន៍ឱ្យទាន់ពេលវេលា ក្នុងការធានានូវតម្លៃកសិកផល ក្នុងកម្រិតណាមួយ​ដែលយើងអាច​ធ្វើទៅបាន»។

បើតាមសម្តេច ហ៊ុន ម៉ាណែត ការដាក់ចេញនូវយន្តការសម្របសម្រួលកម្មវិធីហិរញ្ញប្បទានក្នុងវិស័យកសិកម្ម សំដៅលើកស្ទួយកសិផល រកទីផ្សារ រកលំនឹងផលកសិកម្ម នៅកម្រិតសមរម្យ។

ជាមួយគ្នានេះ សម្រាក់ការងារកសិកម្មនេះដែរ រដ្ឋនឹងពង្រាយមន្ត្រីកសិកម្ម ឱ្យបានគ្រប់ឃុំដែលតម្រូវការកសិកម្ម ព្រោះបញ្ហាកសិករ នៅក្នុងទំនើបកម្ម ត្រូវការមានអ្នកបច្ចេកទេសជួយ ហើយរដ្ឋកន្លងទៅមានអ្នកបច្ចេកទេស ប៉ុន្តែអត់គ្រប់ចំនួន។

ទាក់ទិននឹងបញ្ហានេះ សម្តេចតេជោ បានអនុម័តតាំងពីអាណត្តិមុន ឥឡូវនេះ ពីនេះដល់ចុងឆ្នាំត្រូវរើស ២៥០នាក់ ហើយឆ្នាំបន្ទាប់រើសបន្ថែមទៀត ដើម្បីរុញទៅមូលដ្ឋាន រកមន្ត្រីកសិកម្មដើម្បីនៅជាមួយប្រជាពលរដ្ឋក្នុងឃុំតែម្តង ដើម្បីជួយដល់ជំនាញប្រជាកសិករ ក្នុងការដាំដុះ ចិញ្ចឹមសត្វនេះជាកិច្ចការសំខាន់។ នេះជាការបន្ថែមរបស់សម្តេច ហ៊ុន ម៉ាណែត។

សម្តេចបានបន្ថែមថា ការងារក្នុងវិស័យកសិកម្មនេះ រាជរដ្ឋាភិបាលយកចិត្តទុកដាក់ខ្លាំងណាស់ ដោយមិនត្រឹមតែ​រកទីផ្សារជូនកសិករទេ ថែមទាំងត្រៀមនូវថវិកាមួយចំនួន សម្រាប់ជួយធានាថ្លៃឱ្យបានសមរម្យ និងផ្តល់មន្រ្តីជំនាញ​បច្ចេកទេសដើម្បីត្រៀមជួយកសិករផងដែរ៕