ក្រសួងព្យាករណ៍រកឃើញបាតុភូតអេលនីញ៉ូ ១០០% ណែនាំឱ្យអាជ្ញាធររក្សាទឹកត្រៀមមុនរដូវប្រាំង

ក្រសួងធនធានទឹក និងឧតុនិយមនៅថ្ងៃទី ១២ ខែតុលា ឆ្នាំ ២០២៣ បានព្យាករណ៍រក​ឃើញថា​បាតុភូត អេលនីញ៉ូ ( EL Nino) នៅតែបន្តមានឥទ្ធិពលក្នុងកម្រិត​ ១០០ ភាគរយ នៅឡើយ ហើយ​អាច​រហូតដល់ខែមេសា ឆ្នាំ ២០២៤ ទើបបាតុភូតនេះ មានទំនោរថយចុះទៅវិញ។

​ក្រសួងធនធានទឹកក៏ពិនិត្យឃើញស្ថានភាពភ្លៀងក៏បង្ហាញថា របាយទឹកភ្លៀងនឹងចុះខ្សោយខ្លាំង​ចាប់ពីចុង​សប្ដាហ៍ទី ៣ នៃខែតុលា ឆ្នាំ ២០២៣។

លោក ថោ ជេដ្ឋាន រដ្ឋមន្ត្រីក្រសួងធនធានទឹក និងឧតុនិយម បានណែនាំឱ្យ ប្រធានមន្ទីរ​ធនធានទឹក និងឧតុនិយម រាជធានី-ខេត្ត យកចិត្តទុកដាក់ថែរក្សាទឹកទុក​សម្រាប់ប្រើប្រាស់ក្នុង​ជីវភាព​ប្រចាំថ្ងៃ និងដើម្បីបង្កបង្កើនផលស្រូវនារដូវប្រាំង។

ទោះយ៉ាងណា បើតាមក្រសួងធនធានទឹក និងឧតុនិយម នៅក្នុងសប្ដាហ៍នេះ កម្រិតទឹកភ្លៀងធ្លាក់នៅលើផ្ទៃប្រទេសនឹងថមថយ និងមានភ្លៀងធ្លាក់ភាគច្រើនតែនៅពេលយប់។

នៅរាជធានីភ្នំពេញ និងបណ្តាខេត្តនានា ក្នុងមួយសប្តាហ៍ បន្តទៅនេះ អាចនឹងមានភ្លៀងធ្លាក់នៅក្នុងកម្រិតពីខ្សោយទៅមធ្យម ជាមួយនឹងទំហំទឹកភ្លៀងធ្លាក់គ្របដណ្តប់លើផ្ទៃដី ៣០-៤០%៕