សំណើ សំណូមពរពលរដ្ឋ ជាង ១០០​ ករណី ត្រូវបានដោះស្រាយភ្លាមៗ ក្នុងវេទិកាមួយរបស់ក្រុមប្រឹក្សាខេត្តកំពត

នៅរយៈពេល ២ថ្ងៃ ចាប់តាំងពីថ្ងៃទី ២៤ រហូតដល់ថ្ងៃទី២៥ ខែតុលា ឆ្នាំ២០២៣ កន្លងទៅថ្មីៗនេះ ក្រោមការដឹកនាំរបស់ប្រធានក្រុមប្រឹក្សាខេត្តកំពត សមាជិកក្រុមប្រឹក្សាខេត្ត អាជ្ញាធរ ក្រុង-ស្រុក និងមន្ត្រីមន្ទីរជំនាញពាក់ព័ន្ធ រួមទាំងប្រជាពលរដ្ឋ បានរៀបចំវេទិកាផ្សព្វផ្សាយ និងពិគ្រោះយោបល់ក្រុមប្រឹក្សាខេត្ត ក្រុង និងស្រុក ទាំង៩ ទូទាំងខេត្តកំពត ជួបជុំពិភាក្សារកដំណោះស្រាយរួមគ្នា ក្នុងវេទិកា ទទួលបានសំណើ និងសំណូមពរចំនួន ១៦៧ករណី ហើយករណីខ្លះ ត្រូវបានដោះស្រាយភ្លាមៗ​ បានចំនួន ១០៤ ករណី ផងដែរ។

វេទិកានេះតែងតែធ្វើឡើងរៀងរាល់ ១ឆ្នាំម្តង ជាចាំបាច់ ដើម្បីបានដឹងអំពីដំណើរការអភិវឌ្ឍ បញ្ហាប្រឈម ការផ្តល់សេវាផ្សេងៗ សំណើ និងសំណូមពររបស់ពលរដ្ឋនៅមូលដ្ឋាន ដើម្បីអាជ្ញាធរ និងមន្ត្រីជំនាញពាក់ព័ន្ធរួមគ្នាដើម្បីដោះស្រាយបញ្ហាទាំងអស់នោះ។ វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត នៅតែមានសារៈសំខាន់សម្រាប់ប្រជាពលរដ្ឋ ក៏ដូចជាមន្ត្រីជំនាញ អាជ្ញាធរ ថ្នាក់ដឹកនាំ ដើម្បីជាឱកាសជួបជុំគ្នាស្តាប់ និងលើកឡើងពីបញ្ហាប្រឈម សំណើ សំណូមពរ និងតម្រូវការដែលកើតមាននៅក្នុងមូលដ្ឋានសម្រាប់រួមគ្នាដោះស្រាយ។

លោក ញ៉ូវ សាឯម ប្រធានក្រុមប្រឹក្សាខេត្តកំពត បានបញ្ជាក់ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តលើកនេះ ពិតជាមានសារៈសំខាន់យ៉ាងខ្លះ ព្រោះវាជាឱកាសសម្រាប់ជួបជុំរវាង ថ្នាក់ដឹកនាំ អាជ្ញាធរ និងមន្ត្រីជំនាញ ដើម្បីស្វែងយល់ពីបញ្ហាប្រឈម សំណូមពរ តម្រូវការផ្សេងៗ ដើម្បីរួមគ្នាធ្វើការដោះស្រាយ និងអភិវឌ្ឍន៍នៅក្នុងមូលដ្ឋានឱ្យបានកាន់តែរីកចម្រើនល្អប្រសើរឡើង ស្របតាមគោលនយោបាយ និងគោលការណ៍របស់រាជរដ្ឋាភិបាល តាមលទ្ធិប្រជាធិបតេយ្យក្នុងការផ្ដល់សិទ្ធិអំណាច នៃការចូលរួមរបស់ប្រជាពលរដ្ឋដែលជាម្ចាស់ឆ្នោតនៅក្នុងមូលដ្ឋាន នីមួយៗ។

តាមរយៈអង្គវេទិកានេះ លោក ញ៉ូវ សាឯម ក៏បានលើកឡើងទៀតថា តាមការកត់សម្គាល់វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ពីមួយឆ្នាំទៅមួយឆ្នាំ ពីមួយអាណត្តិទៅមួយអាណត្តិ ក្នុងខេត្តកំពត គឺមានលក្ខណៈ កាន់តែល្អប្រសើរឡើងជាបន្តបន្ទាប់ ប្រព្រឹត្តទៅមានភាពរលូន ប្រជាពលរដ្ឋមានការយល់ដឹងពីសិទ្ធិអំណាចរបស់ខ្លួន និងមានការចូលរួមប្រកបដោយភាពរីករាយ យ៉ាងផុលផុស។ ហើយឆ្នាំនេះ ជាលទ្ធផល មានលក្ខណៈល្អជាងបណ្ដាឆ្នាំមុនៗ កន្លងទៅទៀត​ ព្រោះបានកាត់បន្ថយរាល់បញ្ហាប្រឈមនានាជាច្រើន ដូចជា ការឈ្លោះប្រកែកគ្នា ការរំលោភបំពានដីធ្លីគ្នាជាដើម ហើយយើងនៅតែមានសំណើ សំណូមពរ និងករណីខ្លះទៀតគឺជាសំណើសុំធ្វើផ្លូវថ្នល់តាម​ភូមិ ឃុំ សង្កាត់ តម្រូវការទាំងនេះស្របទៅនឹងផែនការអភិវឌ្ឍរបស់រាជរដ្ឋាភិបាលដែលមានមហិច្ឆតាឥតឈប់ឈរ ដើម្បីភាពរីកចម្រើនរបស់ប្រទេសជាតិ។

បើយោងតាមរបាយការណ៍លទ្ធផល នៃវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពត នៅមូលដ្ឋានក្រុង-ស្រុកទាំង៩ គឺទទួលបានសំណើ និងសំណូមពររបស់ប្រជាពលរដ្ឋទាំងអស់ចំនួន ១៦៧ ករណី ហើយធ្វើការដោះស្រាយភ្លាមៗនៅនឹងកន្លែងបាន ១០៤ ករណី មិនទាន់ដោះស្រាយ ៦៣ ករណី៕

អត្ថបទ៖ សឹង រ៉ាត់