ព័ត៌មានជាតិ

គ្រូបង្រៀនម្នាក់បានស្លាប់ ក្រោយហៅគេមកកាយដីស្រែ តែត្រូវអេស្កាវ៉ាទ័រកិន

បានផុស

៣ years មុន

នៅ

ថ្ងៃអង្គារ ៩ កុម្ភៈ ២០២១

ដោយ

បុរសជាគ្រូបង្រៀនម្នាក់ ត្រូវបានស្លាប់ក្រោយបានជួលអេស្កាវ៉ាទ័រមិត្តភក្ដិមកកាយដីស្រែ តែបែរជាត្រូវអ្នកកាយអេស្កាវ៉ាទ័រថយក្រោយមិនបានប្រយ័ត្នកិនស្លាប់ នៅនឹងកន្លែងកើតហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសមត្ថកិច្ចបានឲ្យដឹងថា អ្នកបើកអេស្កាវ៉ាទ័រឈ្មោះ រី ចំរ៉ុង ភេទប្រុស អាយុ៣៦ឆ្នាំ មានទីលំនៅភូមិអូរស្រឡៅ ឃុំអូរដំបង១ ស្រុកសង្កែ បច្ចុប្បន្នស្នាក់នៅជាមួយឈ្មោះ ចៅ វ៉ិត ភេទប្រុស អាយុ៤៣ឆ្នាំ ដែលជាថៅកែអេស្កាវ៉ាទ័រ នៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ត្រូវបានសមត្ថកិច្ចឃាត់ខ្លួនកាលពីវេលាម៉ោង៧:០៣នាទី ក្រោយពីបើកអេស្កាវ៉ាទ័រថយក្រោយកិនម្ចាស់ស្រែស្លាប់បានប៉ុន្មានម៉ោងក្រោយមក។ សមត្ថកិច្ចបន្តថា ការឃាត់ខ្លួនបុរសជាអ្នកបើកអេស្កាវ៉ាទ័រខាងលើនេះ សមត្ថកិច្ចបានអនុវត្តតាមបញ្ជារបស់លោក គឺ ប៊ុណ្ណារា ព្រះរាជអាជ្ញានៃអយ្យការអមសាលាដំបូងខេត្តបាត់ដំបង។

សមត្ថកិច្ចបញ្ជាក់បន្តថា ហេតុការណ៍ដ៏រន្ធត់ខាងលើនេះ បានកើតឡើងកាលពីវេលាម៉ោង០៣និង២៥នាទីនៅថ្ងៃទី៧ ខែកុម្ភៈ ឆ្នាំ២០២១ នៅត្រង់ចំណុចអណ្ដូងដេកាភូមិថ្មី ឃុំកន្ទឺ១ ស្រុកបាណន់ ខេត្តបាត់ដំបង។ ជនរងគ្រោះជាម្ចាស់ស្រែមានឈ្មោះ វ៉ើន វ័ន្ត ភេទប្រុស អាយុ៤៨ឆ្នាំមុខរបរជាគ្រូបង្រៀន រស់នៅភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង។ លោកអធិការស្រុកបាណន់លោក ប៉ាន់ វ៉ាន់នី បានឲ្យដឹងដែរថា មុនកើតហេតុម្ចាស់គ្រឿងចក្រនិងម្ចាស់ដី(ជនរងគ្រោះ)ជាមិត្តភក្ដិស្គាល់គ្នា ហើយក៏បានយកអេស្កាវ៉ាទ័រទៅកាយបកដីស្រែនឹងលើកភ្លឺស្រែពេលនោះម្ចាស់ដី បានឈរបញ្ជានៅខាងក្រោយគ្រឿងចក្រលុះពេលគ្រឿងចក្រថយក្រោយមិនបានមើលឬមើលមិនឃើញផង ក៏ស្រាប់តែកិនម្ចាស់ដីស្លាប់ភ្លាមៗតែម្ដង។

បើតាមសម្តីអ្នកបើកអេស្កាវ៉ាទ័របានប្រាប់ថា ដំបូងខ្លួនបានឃើញពេលជនរងគ្រោះកំពុងឈរចង្អុលបង្ហាញប្រាប់ឲ្យខ្លួនកាយដីតែខ្លួនស្មានថា ក្រោយគាត់(ជនរងគ្រោះ)ចង្អុលប្រាប់រួចគាត់ដើរចេញទើបខ្លួនបើកថយក្រោយមើលគាត់មិនឃើញ ក៏កិនលើគាត់តែម្ដងហើយខ្លួនគ្មានចេតនាបើកគ្រឿងចក្រកិនម្ចាស់ដីទេ តែជារឿងចៃដន្យប៉ុណ្ណោះ។ សពជនរងគ្រោះ ត្រូវបានសាច់ញាតិដឹកយកទៅគេហដ្ឋាននៅភូមិបោះពោធិ៍ ឃុំអូរដំបង១ ស្រុកសង្កែ ក្រោយមុនពេលរាយការណ៍ទៅសមត្ថកិច្ច។ ក្រោយឃាត់ខ្លួនអ្នកបើកបរអេស្កាវ៉ាទ័រសមត្ថកិច្ចនៃអធិការស្រុកបានកសាងសំណុំរឿងបញ្ជូនទៅការិយាល័យជំនាញនៃស្នងការខេត្តដើម្បីបន្តនីតិវិធី៕

អត្ថបទ៖ សៅ សារិទ្ធ

សូមចុចអាន៖