ក្រសួងសេដ្ឋកិច្ច និងហិរញ្ញវត្ថុ ប្រជុំ​ជាមួយ AmCham នៅកម្ពុជា រកដំណោះស្រាយជុំវិញពន្ធរបស់ ត្រាំ

ក្រសួងសេដ្ឋកិច្ច និងហិរញ្ញវត្ថុកម្ពុជា បាន​ជួប​ប្រជុំគ្នាជាមួយសភា​ពាណិជ្ជកម្ម​អាមេរិកប្រចាំនៅកម្ពុជា (AmCham Cambodia) ដើម្បីពិភាក្សាគ្នា​ស្ដីពីបញ្ហា​ពន្ធ ៤៩ ភាគរយ មក​លើ​កម្ពុជា ដែល​ប្រធានាធិបតីសហរដ្ឋអាមេរិក លោក ដូណាល់ ត្រាំ បាន​ប្រកាសឡើងកាលពីម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

AmCham បាន​និយាយនៅលើសេចក្ដីថ្លែងការណ៍ ចេញ​ផ្សាយនៅលើបណ្ដាញសង្គមហ្វេសប៊ុក នាព្រឹកថ្ងៃសុក្រនេះថា៖ «AmCham Cambodia ដឹកនាំដោយលោក​ប្រធាន Casey Barnett បានជួបពិភាក្សា​ប្រកប​ដោយ​​ផ្លែផ្កា​ជាមួយ ឯកឧត្តមបណ្ឌិត​​ ផាន់ ផល្លា (រដ្ឋលេខាធិការក្រសួងសេដ្ឋកិច្ច និង​ហិរញ្ញវត្ថុ​) និងក្រុមការងារ​នៃ​ក្រសួងសេដ្ឋកិច្ច និងហិរញ្ញវត្ថុ ដើម្បីពិភាក្សាអំពីពន្ធគយ ដែលរដ្ឋបាលសហរដ្ឋអាមេរិក បានអនុវត្តនាពេលថ្មីៗនេះ»។

សភាពាណិជ្ជកម្មដដែល​បានបន្តថា៖ «យើងសូមថ្លែងអំណរគុណយ៉ាងស្មោះស្ម័គ្រ ចំពោះឆន្ទៈរបស់រាជរដ្ឋាភិបាលក្នុងការស្តាប់កង្វល់របស់សហគមន៍ធុរកិច្ចយើង ​ពាក់ព័ន្ធនឹង​ពន្ធថ្មី​។ កម្ពុជា​ពិតជា​មាន​ឱកាស ដើម្បី​ចរចាឡើងវិញនូវការរៀបចំពាណិជ្ជកម្ម ដែល​ទទួល​បាន​ការ​អនុគ្រោះកាន់តែច្រើនជាមួយសហរដ្ឋអាមេរិក — ប៉ុន្តែត្រូវការសកម្មភាព​ និងការសម្រេចចិត្តរហ័ស»។

AmCham បាន​បន្តទៀតថា៖ «យើងត្រៀមខ្លួនជាស្រេច ដើម្បីគាំទ្ររាជរដ្ឋាភិបាលក្នុងការចរចារទាំងនេះ ការពារការប្រកួតប្រជែងរបស់កម្ពុជា ទាក់ទាញការវិនិយោគ និងបង្កើតការងារ»។

គួររំឭកថា កាលពីព្រឹក​ថ្ងៃ​ព្រហស្បតិ៍ (ថ្ងៃពុធ នៅសហរដ្ឋអាមេរិក) លោក ត្រាំ បាន​ប្រកាសដាក់ពន្ធ ៤៩ ភាគរយ លើទំនិញ​នាំចូលពីកម្ពុជា ដែល​បង្កជាកង្វល់​សេដ្ឋកិច្ចពីគ្រប់ភាគីពាក់ព័ន្ធ រួមទាំងពលរដ្ឋ អ្នកប្រតិបត្តិការអាជីវកម្ម អ្នកជំនាញផ្នែកសេដ្ឋកិច្ច និងរដ្ឋាភិបាលកម្ពុជា​។​

ប្រតិកម្មទៅនឹង​វិធានការពន្ធរបស់ ត្រាំ ​AmCham បាន​ចេញសេចក្ដីថ្លែងការណ៍ដាច់ដោយឡែកកាលពីថ្ងៃម្សិលមិញ ដោយ​ស្នើ​ឱ្យ​មាន​ការ​ពិចារណាឡើងវិញ និងបញ្ឈប់ជាបន្ទាន់ចំពោះគោលការណ៍ដាក់ពន្ធគយលើកម្ពុជា ដើម្បីរក្សានិងជំរុញទំនាក់ទំនងសេដ្ឋកិច្ចរវាងប្រទេសទាំង២ និង​អំពាវនាវដៃគូរពាណិជ្ជកម្មនានារួមគ្នារកដំណោះស្រាយលើបញ្ហានេះ។

​AmCham បាន​លើកឡើងក្នុងសេចក្ដីថ្លែងការណ៍នោះ យ៉ាងដូច្នេះថា៖ «យើងសង្ឃឹមថាដៃគូពាណិជ្ជកម្មនានា​នឹងចូលរួមយ៉ាងសកម្ម ដើម្បីរកដំណោះស្រាយសមរម្យណាមួយ ដែលអាចអនុវត្តបានយ៉ាងឆាប់រហ័ស និងច្បាស់លាស់ ដើម្បីដោះស្រាយក្ដីបារម្ភពីបញ្ហាសេដ្ឋកិច្ច និង​សន្តិសុខជាតិរបស់សហរដ្ឋអាមេរិក។ AmCham ​ប្តេជ្ញាក្នុងការរក្សាទំនាក់ទំនងពាណិជ្ជកម្មប្រកបដោយវិជ្ជមាន និងប្រសិទ្ធភាព និងត្រៀមខ្លួនជួយរដ្ឋាភិបាលកម្ពុជាតាមការចាំបាច់នានា»។

សេចក្ដីថ្លែងការណ៍នេះ ចេញផ្សាយឡើងក្រោយ​ប្រធាន AmCham លោក​ Casey បាន​ជំរុញឱ្យ​​​មាន​ការដោះស្រាយយ៉ាងហ្មតចត់ ​និងបាន​លឿននូវបញ្ហា​ពន្ធរបស់ ត្រាំ ដើម្បីបញ្ចៀសនូវលទ្ធភាព​នៃបញ្ហា​សេដ្ឋកិច្ចសម្រាប់កម្ពុជា​។

ក្រោយ​ការប្រកាសពន្ធពី ត្រាំ ដូចគ្នា ​ភាគី​រដ្ឋាភិបាល​កម្ពុជា​ឯណោះវិញ ក៏បាន​ចេញនូវការ​ធានាផងដែរ ថាខ្លួន​បាន និងកំពុងរៀបចំ​ដំណើរការដោះស្រាយបញ្ហានេះយ៉ាងយកចិត្តទុកដាក់ ខណៈបាន​អំពាវនាវ​ឱ្យ​ពលរដ្ឋ និងភាគីពាក់ព័ន្ធ​ដាក់ការទុកចិត្តលើរដ្ឋាភិបាល៕

​