ប ស ស ផ្តល់ប្រាក់ឧបត្ថម្ភរដ្ឋាភិបាលដល់សមាជិកជាស្រ្តីមានផ្ទៃពោះ និងកុមារអាយុក្រោម២ឆ្នាំជាង១លាន២សែននាក់

លោក ហេង សុផាន់ណារិទ្ធ អគ្គនាយករង ប.ស.ស.បានមានប្រសាសន៍នៅថ្ងៃទី៤មេសានេះថា គិតត្រឹមសប្តាហ៍ទី
៣​ ខែមីនា​ ឆ្នាំ២០២៥​ បេឡាជាតិសន្តិសុខសង្គម(ប.ស.ស.)បានបើកផ្តល់ប្រាក់ឧបត្ថម្ភរបស់រាជរដ្ឋាភិបាលដល់សមាជិក​ ជាស្រ្តីមានផ្ទៃពោះ​ និងកុមារអាយុក្រោម២ឆ្នាំចំនួន ១២៧៥៨៨៧នាក់ ក្នុងនោះមានម្តាយ​ចំនួន ៦៣១​៧១៩​ នាក់ និងចំនួនកូន​ ៦៤៤​ ១៦៨នាក់ ដោយចំណាយទឹកប្រាក់ចំនួន​ ៣២០​០៧៦​ លានរៀល។

លោកបានបន្តថា រាជរដ្ឋាភិបាលឧបត្ថម្ភថវិកាដល់ស្ត្រីមានផ្ទៃពោះ និងកុមារអាយុក្រោម២ឆ្នាំនេះ បានចូលរួមលើកកម្ពស់សុខភាព និងជីវភាពរស់នៅរបស់កម្មករនិយោជិតកាន់តែប្រសើរឡើងបន្ថែមទៀត។ លោកបានបញ្ជាក់ថា រាជរដ្ឋាភិបាលបានផ្តល់កម្មវិធីឧបត្ថម្ភសាច់ប្រាក់ជូនកម្មករ-និយោជិតស្ត្រីមានផ្ទៃពោះ និងកុមារក្រោមអាយុ ២ឆ្នាំ ក្នុងនោះមុនពេលសម្រាលកូនកម្មករ-និយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន៤ លើក ដោយ ១លើក ទទួលបានថវិកា ៨ ម៉ឺនរៀល។ ពេលសម្រាលកូន ទទួលបានប្រាក់ឧបត្ថម្ភដោយកូន ១ ទទួលបានថវិកា ៨០ ម៉ឺនរៀល កូនភ្លោះ ២ទទួលបាន ១លាន ២សែនរៀល និងកូនភ្លោះ ៣ទទួលបាន ១លាន ៦សែនរៀល និងទទួលបានការឧបត្ថម្ភពិសេសបន្ថែមពី
សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ចំនួន ៥លានរៀល ទៀតផងដែរ។ ក្រោយពេលសម្រាលកូនកម្មករ-និយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន ១០លើក ដោយ ១ លើកទទួលបាន ៨ ម៉ឺនរៀល ក្នុងនោះ ៣ លើក នៅពេលទៅទទួលសេវាពិនិត្យសុខភាពក្រោយពេលសម្រាលកូន និង ៧ លើកទៀត
នៅពេលយកកូនទៅទទួលថ្នាំបង្ការរហូតដល់អាយុ ២ ឆ្នាំ៕

អត្ថបទ៖ សំអឿន