ព័ត៌មានជាតិ

អភិបាលស្រុកបាទីណែនាំសមត្ថកិច្ចថែរក្សាសន្តិសុខ សណ្តាប់ធ្នាប់ជូនពលរដ្ឋក្នុងឱកាសបុណ្យចូលឆ្នាំចិន-វៀតណាម

Published

3 weeks ago

February 11, 2021

រដ្ឋបាលស្រុកបាទី បានបើកកិច្ចប្រជុំស្តីពីការទប់ស្កាត់ការរីករាលដាលនៃជំងឺកូវីដ-១៩ និងបញ្ហារក្សាសន្តិសុខសណ្តាប់ធ្នាប់ជូនប្រជាពលរដ្ឋ ក្នុងឱកាសបុណ្យចូលឆ្នាំប្រពៃណីចិន-វៀតណាម។

កាលពីថ្ងៃពុធ ១៣រោច ខែមាឃ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១០ ខែកុម្ភៈ ឆ្នាំ២០២១ លោក ភួន ឈីម អភិបាលនៃគណៈអភិបាលស្រុកបាទី និងជាប្រធានគណៈបញ្ជាការឯកភាពស្រុក បានដឹកនាំកិច្ចប្រជុំស្តីពីវិធានការពាក់ព័ន្ធបញ្ហាការទប់ស្កាត់ការរីករាលដាល នៃជំងឺកូវីដ-១៩ ការរក្សាសន្តិសុខសណ្តាប់ធ្នាប់ និងរបៀបរៀបរយសាធារណជូនបងប្អូនប្រជាពលរដ្ឋ ក្នុងភូមិសាស្ត្រស្រុកបាទី នាឱកាសថ្ងៃចូលឆ្នាំថ្មីប្រពៃណី ចិន-វៀតណាម ។

កិច្ចប្រជុំនេះប្រព្រឹត្តឡើងដោយមានការចូលរួមពីសំណាក់ លោក លោកស្រីអភិបាលរងស្រុកនាយក នាយករងរដ្ឋបាលស្រុក កងកម្លាំងទាំងបីស្ថាប័ន លោក លោកស្រី ប្រធានការិយាល័យជុំវិញស្រុក លោក លោកស្រីប្រធានក្រុមប្រឹក្សាឃុំ លោកនាយប៉ុស្តិ៍រដ្ឋបាលឃុំទាំង១៥ឃុំ ទូទាំងស្រុកបាទី ស្ថិតនៅសាលប្រជុំសាលាស្រុកបាទី ខេត្តតាកែវ ។

នៅក្នុងកិច្ចប្រជុំនេះផងដែរលោក ភួន ឈីម អភិបាលនៃគណៈអភិបាលស្រុកបាទី ក៏បានធ្វើការណែនាំសមត្ថកិច្ចទាំងបីប្រភេទ សូមជួយថែរក្សាសន្តិសុខសណ្តាប់ធ្នាប់ និងរបៀបរៀបរយសាធារណជូនបងប្អូនប្រជាពលរដ្ឋឲ្យបានល្អប្រសើរ ក្នុងឱកាសថ្ងៃចូលឆ្នាំថ្មីប្រពៃណី ចិន-វៀតណាម ដែលប្រព្រឹត្តទៅចាប់ពីថ្ងៃទី១១ រហូតដល់ថ្ងៃទី១៣ ខែកុម្ភៈ ឆ្នាំ២០២១ ៕

អត្ថបទ ៖ រ៉ាវុទ្ធ