ដឹងច្បាស់ពីពេលវេលា បើកការដ្ឋានសាងសង់ព្រែកជីក ត​ភ្ជាប់ទៅសមុទ្រ

គម្រោងព្រែកជីកហ្វូណនតេជោ ជាគម្រោងព្រែកជីកប្រវត្តិសាស្ត្រនៅកម្ពុជា គ្រោងបើកការដ្ឋានសាងសង់នៅត្រីមាសទី ៤ ឆ្នាំ ២០២៤ ខាងមុខនេះ។ នេះបើតាមការបញ្ជាក់ឱ្យដឹងពីលោក ប៉េង ពោធិ៍នា រដ្ឋមន្ត្រី ក្រសួងសាធារណការ និងដឹកជញ្ជូន នៅថ្ងៃទី ១៧ ខែមករា ឆ្នាំ ២០២៤។

កាលពីថ្ងៃទី១៧ ខែតុលា ឆ្នាំ២០២៣ ពី​រដ្ឋធានីប៉េកាំងសាធារណរដ្ឋប្រជាមានិតចិន រដ្ឋាភិបាល​កម្ពុជា​បានឈានទៅ​ចុះហត្ថលេខាលើ​កិច្ចព្រមព្រៀងក្របខណ្ឌ (Framework Agreement) នៃគម្រោង “ព្រែកជីកហ្វូណនតេជោ” ដោយ​មាន​​ការ​ចូលរួម​ពី​លោក​ឧបនាយករដ្ឋមន្ត្រី ស៊ុន ចាន់ថុល ជាមួយតំណាងក្រុមហ៊ុនសាជីវកម្មស្ពាន និងថ្នល់ចិន (CRBC) ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ក្រោយការ​ចុះ​ហត្ថលេខានេះ នឹង​អនុញ្ញាតឱ្យក្រុមហ៊ុន​ចិន​ CRBC អាចសិក្សាលម្អិតលើគ្រប់ទិដ្ឋភាព​ទាំងអស់ពាក់ព័ន្ធនឹងគម្រោងប្រវត្តិសាស្រ្ត​នេះ​ ដើម្បីកំណត់បានកាន់តែច្បាស់ពីសក្ដានុពលនៃគម្រោងព្រែក​ជីក​ហ្វូណនតេជោទាំងផលចំណេញផ្នែកសេដ្ឋកិច្ច និងសង្គម។

គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ គឺជា​គម្រោង​ប្រវត្តិសាស្ត្រលើកទី១ ក្នុងវិស័យដឹកជញ្ជូនផ្លូវ​ទឹករបស់កម្ពុជា ដើម្បីតភ្ជាប់​ប្រព័ន្ធ​ទន្លេមេគង្គនិងផ្លូវសមុទ្រ។

គម្រោងនេះ ធ្វើឡើងដើម្បីពង្រីកវិសាលភាព​នៃការ​ប្រើប្រាស់សក្តានុពលលើការដឹកជញ្ជូនតាមផ្លូវទឹក សំដៅចូលរួមលើកកម្ពស់​សកម្ម​ភាពសេដ្ឋកិច្ច​-សង្គមឱ្យកាន់​តែមានការរីកចម្រើនឈានទៅមុខមួយកម្រិតថែមទៀត និងផ្តល់ជាដំណោះស្រាយសមស្របលើបញ្ហាប្រឈម​និងឧបសគ្គនានានៃវិស័យដឹកជញ្ជូនតាមផ្លូវទឹកដែលយើងបាន និងកំពុងជួបប្រទះនាពេលបច្ចុប្បន្ន។

គម្រោងព្រែកជីកហ្វូណនតេជោ មានប្រវែង១៨០គីឡូម៉ែត្រ ចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯក នៃទន្លេបាសាក់ ចូលតាមព្រែកតាហ៊ីង នៃទន្លេបាសាក់ និងបន្តរហូតដល់សមុទ្រ ខេត្តកែប ដោយឆ្លងកាត់ខេត្ត ៤ រួមមាន៖ ខេត្តកណ្តាល តាកែវ កំពត និងខេត្តកែប៕