អតីតនាយករដ្ឋមន្ត្រីកូរ៉េ​ ដឹកនាំ​ក្រុមហ៊ុន​កូរ៉េ​ជួប​លោក ស៊ុន ចាន់ថុល ពិភាក្សា​ជំរុញ​ការ​វិនិយោគ​នៅ​កម្ពុជា

លោក Chung Sye-kyun អតីត​នាយករដ្ឋមន្រ្តីកូរ៉េ​បាន​ដឹកនាំប្រតិភូ​ក្រុមហ៊ុន​កូរ៉េ​​​ចួ​ល​ជួបពិភាក្សាការងារជាមួយលោក ស៊ុន ចាន់ថុល ក្នុង​ពេល​ដែល​លោកមក​​បំពេញទស្សនកិច្ច​នៅ​ប្រទេស​កម្ពុជា។

ក្នុងជំនួប​ពិភាក្សាការងារជាមួយលោក ស៊ុន ចាន់ថុល លោក Chung Sye-kyun បានបង្ហាញទស្សនៈវិជ្ជមានអំពីកំណើនសេដ្ឋកិច្ចរបស់ប្រទេសកម្ពុជា និង​ការអភិវឌ្ឍឥតឈប់ឈរជាមួយរោងចក្រវិនិយោគថ្មីៗជាច្រើន។

ជាការ​ឆ្លើយតប លោក ស៊ុន ចាន់ថុល ក៏បានស្នើសុំឱ្យលោក​ Chung Sye-kyun ជួយសម្របសម្រួលនិងពិនិត្យលទ្ធភាពក្នុងការផ្សព្វផ្សាយអំពីសក្ដានុពលរបស់ប្រទេសកម្ពុជាបន្ថែមទៀតជូនដល់វិនិយោគិនកូរ៉េ ក្នុងគោលដៅ​ដើម្បីពង្រីកសកម្មភាពវិនិយោគរវាងប្រទេស​ទាំងពីរ។

ជំនួប​រវាងអតីតនាយករដ្ឋមន្ត្រីសាធារណរដ្ឋកូរ៉េ និង​លោក ស៊ុន ចាន់ថុល ក្រៅពី​ពិភាក្សាអំពីកិច្ចសហប្រតិបត្តិការនាពេលកន្លងមកជា​ពិសេសលើសកម្មភាពវិនិយោគ ក៏​មានការ​ជជែក​ធ្វើយ៉ាងណា​​ជំរុញឱ្យវិនិយោគិនកូរ៉េចូលមកបណ្ដាក់ទុននៅកម្ពុជាបន្ថែមទៀត​។

ក្នុង​ជំនួប​ពិភាក្សា​នោះ​​ ក៏មានការចូលរួមពីគណៈប្រតិភូក្រុមហ៊ុន CAMKO MOTOR COMPANT និងក្រុមហ៊ុន CAMKO INFRACORE របស់កូរ៉េ។

ក្រុមហ៊ុន CAMKO MOTOR បច្ចុប្បន្នកំពុងមានប្រតិបត្តិការអាជីវកម្មនៅកម្ពុជា លើការតម្លេីងរថយន្តម៉ាក Hyundai និងផលិតខ្សែភ្លេីងអគ្គិសនីសម្រាប់រថយន្តដេីម្បីនាំចេញ។ ចំពោះក្រុមហ៊ុន CAMKO INFRACORE ក៏​បានបង្ហាញទិសដៅក្នុងការដាក់ទុនវិនិយោគបង្កើតរោងចក្រផលិតគ្រឿងបង្គុំរថយន្តអគ្គិសនីនៅកម្ពុជា សម្រាប់នាំចេញទៅទីផ្សារពិភពលោក​ផង​ដែរ។

ក្នុង​ឱកាស​នោះ លោក Chung Sye-kyun ក៏​បានលើកឡើង​ពាក់ព័ន្ធ​បរិយាសកាសគុណភាពខ្យល់ល្អនៅ​កម្ពុជា​ ដែលនេះស្របតាមទិសដៅរបស់ក្រុមហ៊ុន CAMKO MOTOR និងក្រុមហ៊ុន CAMKO INFRACORE ក្នុងការពង្រីកផលិតកម្មរបស់ខ្លួននៅកម្ពុជា ដោយអនុវត្តលើការការពារបរិស្ថានផងដែរ។

ទាក់ទង​កិច្ចការពារ​បរិស្ថាន លោក ស៊ុន ចាន់ថុល បានជម្រាបអំពីទិសដៅរបស់រដ្ឋាភិបាល​កម្ពុជាក្នុងការជំរុញការប្រើប្រាស់ថាមពលកកើតឡើងវិញឱ្យបាន ៧០% នៃថាមពលប្រើប្រាស់សរុបនៅ​ឆ្នាំ២០២៤ នេះ​៕