ថ្ងៃចុងក្រោយ ACU ចំហទ្វារចាំទទួលឯកសារប្រកាសទ្រព្យសម្បត្តិ ដល់ម៉ោង១២ យប់

តាមរយៈបញ្ដាញសង្គម អង្គភាពប្រឆាំងអំពើពុករលួយ ACU បានប្រកាសថា នឹងបើកទ្វារចាំទទួលយកឯកសារប្រកាសទ្រព្យសម្បត្តិ និងបំណុលរហូតដល់ម៉ោង១២យប់ ថ្ងៃទី៣១ ខែមករា ឆ្នាំ២០២៤។

គួរឱ្យដឹងថា ACU បានបើកទ្វារចាំទទួលយកឯកសារប្រកាសទ្រព្យ និងបំណុល ពីសំណាក់មន្ត្រីដែលជាប់ការតព្វកិច្ចប្រកាសទ្រព្យសម្បត្តិតាមរបបពីរឆ្នាំ ក្នុងឆ្នាំ២០២៤ ចាប់តាំងពីថ្ងៃទី០១ ខែមករាមកម៉្លេះ។  ACU បានបើកទ្វារទទួលចាប់ពីម៉ោង៨ព្រឹក ដល់ម៉ោង៥ល្ងាចរៀងរាល់ថ្ងៃច័ន្ទដល់ថ្ងៃអាទិត្យ ដោយមិនឈប់សម្រាកឡើយ ទោះថ្ងៃបុណ្យក៏ដោយ។

ក្នុងការប្រកាសទ្រព្យសម្បត្តិតាមរបប២ឆ្នាំ ក្នុងឆ្នាំ២០២៤នេះ មានមន្ត្រីរាជការចំនួន ១៨ ២៧៩រូប ជាប់ការតព្វកិច្ចត្រូវប្រកាសទ្រព្យសម្បត្តិ និងបំណុលនៅអង្គភាពប្រឆាំងអំពើពុករលួយ។

ដោយឡែក បើតាមការឱ្យដឹងរបស់ ACU គិតត្រឹមថ្ងៃទី៣០ ខែមករា គឺមានមន្ត្រីចំនួន១៨ ១០៧នាក់ បានមកប្រកាសទ្រព្យសម្បត្តិ និងបំណុល នៅនាយកដ្ឋានប្រកាសទ្រព្យសម្បត្តិ និងបំណុល នៃអង្គភាពប្រឆាំងអំពើពុករលួយ។

គួរជម្រាបថា មាត្រា ៣៨ នៃច្បាប់ស្តីពីការប្រឆាំងអំពើពុករលួយបានចែងថា ជនណាដែលមិនបាន ប្រកាសទ្រព្យសម្បត្តិ និងបំណុល ឬបានប្រកាសមិនត្រឹមត្រូវនូវទ្រព្យសម្បត្តិរបស់ខ្លួនទៅតាមបទប្បញ្ញត្តិនៃច្បាប់នេះ ត្រូវផ្តន្ទាទោសដាក់ពន្ធនាគារពី ១ (មួយ) ខែ ទៅ ១ (មួយ) ឆ្នាំ និងពិន័យជាប្រាក់ពី ១០០.០០០ (មួយសែន) រៀល ទៅ ២.០០០.០០០ (ពីរលាន) រៀល ហើយត្រូវបានបង្ខំឱ្យធ្វើការប្រកាសទ្រព្យសម្បត្តិ ជូនអង្គភាពប្រឆាំងអំពើពុករលួយ។ ក្នុងករណី រឹងរូសមិនព្រមប្រកាសទ្រព្យសម្បត្តិទៀត ត្រូវផ្តន្ទាទោសទ្វេដង៕

ដោយ៖ ង៉ិល ណារ៉ាត់