ផ្តល់​អាទិភាពប្រឡង​ចូល​ក្របខណ្ឌរដ្ឋ ​រៀន​ជំនាញ​នៅ​វិទ្យាស្ថាន​តេជោសែនសាធារណការ

តាម​សេចក្តីជូនដំណឹងរបស់វិទ្យាស្ថាន​តេជោសែនសាធារណការ​និង​ដឹកជញ្ជូន ដែល​ប្រកាស​ជ្រើសរើស​សិស្ស​ចុះឈ្មោះ​ចូល​រៀន ២០០ នាក់ នៅ​ឆ្នាំ​សិក្សា ២០២១-២០២២ ក្រសួង​បញ្ជាក់​ពីការ​ផ្តល់​អាទិភាព​ខ្ពស់​សិស្ស​ដែល​បញ្ចប់​ការ​សិក្សា​ ក្នុង​ការ​ប្រឡង​ចូល​ក្របខណ្ឌ​ក្រសួងសាធារណការ​និង​ដឹក​ជញ្ជូន។

បន្ថែម​ពី​នេះ អំឡុង​ពេល​បណ្តុះបណ្តាល​ និស្សិត​ទាំង​អស់​អាច​ចុះអនុវត្ត​ជាក់ស្តែង​តាម​ការដ្ឋាន ដែលកំពុង​សាងសង់​ទូទាំង​ប្រទេស។ ជាមួយ​គ្នា​នេះ​ក៏អាច​ចុះ​ហ្វឹកហាត់​ការងារ (Intership) នៅ​តាម​បណ្តា​ក្រុមហ៊ុន ឬ​អង្គភាព​នៅ​ក្រោម​ឱវាទ​ក្រសួង ដែលកំពុង​សាងសង់​ផ្លូវ​ និង​គម្រោង​នានា​លើ​វិស័យសាធារណការ​និង​ដឹក​ជញ្ជូន។

បន្ថែម​ពី​នេះ និស្សិត​ទាំង​អស់​ក៏អាច​ទទួល​បាន​អាហារូបករណ៍​ទៅ​សិក្សា​នៅ​ក្រៅ​ប្រទេស​។

វិទ្យាស្ថានតេជោសែនសាធារណការ និងដឹកជញ្ជូនជ្រើសរើសនិស្សិតជំនាន់ទី១ ចំនួន២០០នាក់ ឱ្យចូលរៀនថ្នាក់បរិញ្ញាបត្រ និងបរិញ្ញាបត្រ+១(វិស្វករ) សម្រាប់ឆ្នាំសិក្សា ២០២១-២០២២។ តម្លៃ​ការ​សិក្សា​ជំនាញ​គឺ​មួយ​ឆ្នាំ ៦០០ ដុល្លារ។

មុនបើក​ថ្នាក់​បណ្តុះបណ្តាល វិទ្យាស្ថាន​នឹង​រៀបចំកម្មវិធីតម្រង់ទិស (Majors and Career Roadmap Event) បើកទូលាយឲ្យសិស្សនិស្សិតអាចជួបផ្ទាល់ជាមួយ ឯកឧត្តមទេសរដ្ឋមន្ត្រី ឯកឧត្តម លោកជំទាវជាថ្នាក់ដឹកនាំ ដើម្បីទស្សនាវិទ្យាស្ថាន ក៏ដូចជាសិក្សាស្វែងយល់ពីដឺប៉ាតឺម៉ង់មុខជំនាញ និងឱកាសការងារក្រោយបញ្ចប់ការសិក្សានៅវិទ្យាស្ថានតេជោសែនសាធារណការ និងដឹកជញ្ជូន។

ព្រឹត្តិការណ៍នេះនឹងប្រព្រឹត្តទៅនៅថ្ងៃអាទិត្យ ទី២១ ខែកុម្ភ: ឆ្នាំ២០២១ វេលាម៉ោង ៩:០០ព្រឹក ដល់ ម៉ោង ១១:៣០ នៅវិទ្យាស្ថានតេជោសែនសាធារណការ និងដឹកជញ្ជូន។ សិស្សនិស្សិត អាចចុះឈ្មោះប្រឡងចូលរៀននៅវិទ្យាស្ថានតេជោសែនសាធារណការ និងដឹកជញ្ជូន ដោយចាប់ទទួលពាក្យ ពីថ្ងៃទី២១ ដល់ ថ្ងៃ២៨ ខែកុម្ភៈ ឆ្នាំ២០២១៕