រដ្ឋមន្ត្រីមហាផ្ទៃ៖ ភូមិឃុំសង្កាត់មានសុវត្ថិភាព បទល្មើសព្រហ្មទណ្ឌ គ្រឿងញៀនត្រូវបានបង្ក្រាបយ៉ាងម៉ឺងម៉ាត់បំផុត

ភូមិ-ឃុំ-សង្កាត់ មានសុវត្ថិភាព បទល្មើសព្រហ្មទណ្ឌ គ្រឿងញៀនខុសច្បាប់ ការប្រយុទ្ធប្រឆាំងការជួញដួរមនុស្ស ត្រូវបានកម្លាំងសមត្ថកិច្ចនៃក្រសួងមហាផ្ទៃ បើកប្រតិបត្តិការបង្ក្រាបយ៉ាងម៉ឺងម៉ាត់បំផុត។ នេះជាលើកឡើងរបស់លោក ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ ក្នុងពិធីបើកសន្និបាតការងារប្រចាំឆ្នាំរបស់ក្រសួងមហាផ្ទៃ នៅព្រឹកថ្ងៃ ទី២៨​ ខែកុម្ភៈ ឆ្នាំ២០២៤នេះ។

ក្នុងពិធីបើកសន្និបាតត្រួតពិនិត្យលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងមហាផ្ទៃ និងបូកសរុបចលនាប្រឡងប្រណាំងអនុវត្តគោលនយោបាយភូមិ-ឃុំ-សង្កាត់ មានសុវត្ថិភាព ឆ្នាំ២០២៣ លោក ស សុខា បានអះអាងយ៉ាងដូច្នេះថា៖ «គោលនយោបាយភូមិ-ឃុំ-សង្កាត់ មានសុវត្ថិភាព ការបង្ក្រាបបទល្មើសព្រហ្មទណ្ឌ ការបង្ក្រាបបទល្មើសគ្រឿងញៀនខុសច្បាប់ ការប្រយុទ្ធប្រឆាំងការជួញដួរមនុស្ស និងអាជីវកម្មផ្លូវភេទគ្រប់ទម្រង់ ត្រូវបានបង្ក្រាបយ៉ាងហ្មត់ចត់»។

លោកឧបនាយករដ្ឋមន្រ្តី បានបន្តថា ជាមួយគ្នានេះ ការបង្ក្រាបសកម្មភាពក្មេងទំនើង ការពង្រឹងច្បាប់ចរាចរណ៍ផ្លូវគោក ការផ្ដល់កិច្ចអន្តរាគមន៍ពន្លត់អគ្គិភ័យ និងសង្គ្រោះជនរងគ្រោះ ក៏ត្រូវបានពង្រឹងការអនុវត្តជាប់ជាប្រចាំផងដែរ ដែលធានាបាននូវប្រក្រតីភាពក្នុងសង្គមលើគ្រប់វិស័យ។

លោកឧបនាយករដ្ឋមន្ត្រី ស សុខា ក៏បានគូសរំលេចដែរថា រាជរដ្ឋាភិបាលកម្ពុជា ដែលប្រសូត្រចេញពីឆន្ទៈពិតប្រាកដរបស់ប្រជាពលរដ្ឋ បានបន្តបេសកកម្មបម្រើឧត្តមប្រយោជន៍ជាតិ និងប្រជាជនកម្ពុជា ប្រកបដោយថាមភាព បុរេសកម្ម និងនវានុវត្តន៍ ហើយតាមរយៈយុទ្ធសាស្ត្របញ្ចកោណ ដំណាក់កាលទី១ ទៀតសោត ក៏កាន់តែទទួលបានការគាំទ្រពីសំណាក់ប្រជាពលរដ្ឋ។

លោកឧបនាយករដ្ឋមន្ត្រី សង្កត់ធ្ងន់ថា បើទោះបីជាស្ថិតក្នុងឥទ្ធិពលនៃហេតុការណ៍អសន្តិសុខសកលយ៉ាងណាក្ដី ក៏ប៉ុន្តែ កងកម្លាំងនគរបាលជាតិ បានចូលរួមសហការជាមួយកងកម្លាំងមានសមត្ថកិច្ចពាក់ព័ន្ធ ដោយតម្កល់ថែរក្សាបានយ៉ាងល្អប្រសើរនូវសន្តិភាព ឯករាជ្យ អធិបតេយ្យភាពជាតិ បូរណភាពទឹកដី និងការធានាបាននូវស្ថេរភាពនយោបាយ សន្តិសុខ​ សណ្ដាប់ធ្នាប់សាធារណៈ របៀបរៀបរយក្នុងសង្គម និងប្រក្រតីភាពក្នុងស្ថាប័នរដ្ឋ។

សូមជម្រាបថា សន្និបាតត្រួតពិនិត្យលទ្ធផលការងារ ឆ្នាំ២០២៣ និងលើកទិសដៅការងារ ឆ្នាំ២០២៤ នៃក្រសួងមហាផ្ទៃ និងបូកសរុបចលនាប្រឡងប្រណាំងអនុវត្តគោលនយោបាយភូមិ-ឃុំ-សង្កាត់ មានសុវត្ថិភាព ឆ្នាំ២០២៣ ប្រព្រឹត្តទៅរយៈពេល២ថ្ងៃ គឺនៅថ្ងៃទី២៨ ខែកុម្ភៈ ឆ្នាំ២០២៤នេះ ជាពិធីបើកក្រោមអធិបតីភាពរបស់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងនៅថ្ងៃទី២៩ ខែកុម្ភៈ ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នឹងអញ្ជើញជាអធិបតីភាពបិទសន្និបាតនេះ៕