សម្ដេច ហ៊ុន ម៉ាណែត ណែនាំឲ្យគិតគូរចំពោះការវិវត្តយ៉ាងឆាប់រហ័សនៃបច្ចេកវិទ្យាឌីជីថលថ្មីៗ​

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំឲ្យគិតគូរទៅលើការឆ្លើយតប នឹងការវិវត្តយ៉ាងឆាប់រហ័សនៃបច្ចេកវិទ្យាឌីជីថលថ្មីៗ​ ជាពិសេសបច្ចេកវិទ្យាបញ្ញា​សិប្បនិម្មិត។ ការណែនាំនេះ ធ្វើឡើងក្នុងពិធីបើក «វេទិការដ្ឋាភិបាល ឌីជីថលលើកទី ១ ឆ្នាំ ២០២៤» នាព្រឹកថ្ងៃទី ១១ ខែមីនា ឆ្នាំ ២០២៤នេះ។    

សម្ដេចធិបតី ហ៊ុន ម៉ាណែត បានណែនាំឲ្យ «វេទិការដ្ឋាភិបាល ឌីជីថលលើកទី ១ ឆ្នាំ ២០២៤» នេះ ត្រូវផ្តោតការយកចិត្តទុកដាក់ទៅលើចំណុចគន្លឹះមួយចំនួន។ ក្នុងនោះ រួមមានការឆ្លើយតប នឹងការវិវត្តយ៉ាងឆាប់រហ័សនៃបច្ចេកវិទ្យា ឌីជីថលថ្មីៗ​ ជាពិសេសបច្ចេកវិទ្យាបញ្ញា​សិប្បនិម្មិត (Generative AI) ដែលម្យ៉ាងនាំឲ្យមានការជំរុញនវានុវត្តន៍ និងបង្កើនផលិតភាព។

ប៉ុន្តែម្យ៉ាងទៀត នាំឲ្យមានការកំណើននៃរំហូរទិន្នន័យឯកជនរបស់ប្រជាពលរដ្ឋ និងការប្រើប្រាស់ទិន្នន័យទាំងនោះ ឆ្លងកាត់ព្រំដែន ដែលបង្កជាការព្រួយបារម្ភដល់ការយកប្រៀបផ្នែកពាណិជ្ជកម្ម ការបំពានឯកជនភាពរបស់ប្រជាពលរដ្ឋ និងការគំរាមកំហែងសន្តិសុខសាយប៊ើរ ជាដើម។

ក្នុងពិធីបិទសន្និបាតបូកសរុបការងាររបស់ក្រសួង​ព័ត៌មាន កាលពីថ្ងៃទី ២៣ ខែមករាកន្លងទៅនេះ សម្តេចធិបតី ហ៊ុន ម៉ាណែត បានបង្ហាញក្តីបារម្ភចំពោះបច្ចេកវិទ្យាបញ្ញាសិប្បនិមិត្ត (AI) ដែលអាចបង្កើតនូវព័ត៌មានក្លែងក្លាយ ដែលនាំឲ្យមានគ្រោះថ្នាក់ដល់សង្គមជាតិ។

តែយ៉ាងណាក៏ដោយ សម្ដេចធិបតី ហ៊ុន ម៉ាណែត​ បានលើកឡើងថា បច្ចេកវិទ្យាបញ្ញា​សិប្បនិម្មិត (AI) មិនមែនអាក្រក់ទាំងអស់នោះទេ ដោយបច្ចេកវិទ្យានេះ នឹងផ្តល់នូវថាមពលថ្មី ផលិតភាពថ្មី ដើម្បីពង្រឹងប្រសិទ្ធភាពការងារ បើប្រើប្រាស់ក្នុងផ្លូវត្រូវ។

សម្តេចនាយករដ្ឋមន្ត្រី បានជំរុញឲ្យក្រសួង-ស្ថាប័នជំនាញពាក់ព័ន្ធ គិតគូរអំពីការរៀបចំបទដ្ឋានគតិយុត្តនានា ដើម្បីគ្រប់គ្រងការប្រើប្រាស់បច្ចេកវិទ្យាបញ្ញាសិប្បនិមិត្ត (AI) ឲ្យបានត្រឹមត្រូវ សម្រាប់បម្រើដល់ប្រយោជន៍សង្គម និងប្រទេសជាតិ៕