ក្រុមហ៊ុនចិនចាប់ដៃជាមួយក្រុមហ៊ុនក្នុងស្រុកបង្កើតរោងចក្រដំឡើងឧបករណ៍ Tablet នៅកម្ពុជា

ក្រុមហ៊ុន Haier Group ដែលមានមូលដ្ឋានក្នុងប្រទេសចិន បានចាប់ដៃជាមួយនឹងក្រុមហ៊ុនក្នុងស្រុករបស់កម្ពុជា ដើម្បីបង្កើតរោងចក្រដំឡើងឧបករណ៍ថេប្លេត (Tablet) ដំបូងគេនៅកម្ពុជា។ ផែនការវិនិយោគរបស់ក្រុមហ៊ុនចិនមួយនេះ បានបង្ហាញឱ្យដឹងដោយលោក Diao Yunfeng អនុប្រធានក្រុមហ៊ុន Haier Group នៅក្នុងជំនួបសម្ដែងការការគួរសមជាមួយសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ក្រុមហ៊ុន Haier Group ជាក្រុមហ៊ុននាំមុខមួយក្នុងពិភពលោកក្នុងការផលិត និងផ្តល់ឧបករណ៍ និងសម្ភារៈសម្រាប់ការរស់នៅឆ្លាតវៃ និងបរិវត្តកម្មឌីជីថល ដែលមានទីស្នាក់ការកណ្តាលនៅទីក្រុង Qingdao ប្រទេសចិន។ បច្ចុប្បន្ន ក្រុមហ៊ុនមានប្រតិបត្តិការអាជីវកម្មរបស់ខ្លួននៅក្នុងជាង៦០ប្រទេស និងមានអ្នកប្រើប្រាស់ផលិតផល និងសេវាកម្មរបស់ក្រុមហ៊ុនប្រមាណ ៤៤លាននាក់ នៅជុំវិញពិភពលោក។

ក្នុងជំនួបនៅឯទីក្រុងប៉េកាំង កាលពីរសៀលថ្ងៃទី១៥ ខែកក្កដា ឆ្នាំ២០២៦ លោក Diao Yunfeng បានបង្ហាញសម្តេចធិបតីអំពីផែនការវិនិយោគរបស់ក្រុមហ៊ុននៅក្នុងប្រទេសកម្ពុជា ដោយបញ្ជាក់ថា ក្រុមហ៊ុនបានចាប់ដៃគូជាមួយនឹងក្រុមហ៊ុនក្នុងស្រុក ដើម្បីបង្កើតរោងចក្រដំឡើងឧបករណ៍ថេប្លេត។

គោលបំណងនៃបង្កើតរោងចក្រនេះ គឺដើម្បីផ្តល់នូវឧបករណ៍អេឡិចត្រូនិកថេប្លេត (Tablet) ដែលមានតម្លៃសមរម្យទៅដល់សិស្ស-និស្សិត ក៏ដូចជាអ្នកសេដ្ឋកិច្ចក្រៅប្រព័ន្ធ ដើម្បីធ្វើឱ្យកាន់តែទូលំទូលាយនូវការប្រើប្រាស់សម្ភារៈឌីជីថល និងការសិក្សាពីចម្ងាយ។

សម្ដេចធិបតី ហ៊ុន ម៉ាណែត បានអបអរសាទរចំពោះភាពជោគជ័យនៃប្រតិបត្តិការអាជីវកម្មរបស់ក្រុមហ៊ុន និងគូសបញ្ជាក់អំពីការគាំទ្ររបស់រាជរដ្ឋាភិបាលកម្ពុជា តាមរយៈការដាក់ចេញគោលនយោបាយលើកទឹកចិត្តជាច្រើន ដើម្បីគាំទ្រដល់ភាពជោគជ័យនៃបណ្តាក្រុមហ៊ុនវិនិយោគនៅកម្ពុជា។ បន្ថែមលើនេះ សម្តេចធិបតី បានវាយតម្លៃខ្ពស់ និងសម្តែងការស្វាគមន៍ចំពោះគម្រោងផលិតថេប្លេតតម្លៃសមរម្យ ដែលសម្ដេចចាត់ទុកថា នឹងរួមចំណែកយ៉ាងសំខាន់ក្នុងការជំរុញបរិវត្តកម្មឌីជីថលក្នុងវិស័យអប់រំ និងការអភិវឌ្ឍធនធានមនុស្សនៅកម្ពុជា។

សម្ដេចធិបតី នាយករដ្ឋមន្ត្រី បានលើកទឹកចិត្តឱ្យក្រុមហ៊ុនបន្តកិច្ចសហប្រតិបត្តិការឱ្យកាន់តែជិតស្និទ្ធជាមួយដៃគូរបស់ខ្លួន ក៏ដូចជាក្រសួង-ស្ថាប័នពាក់ព័ន្ធ ដើម្បីចាប់យកឱកាសក្នុងការជំរុញ និងពង្រីកការវិនិយោគរបស់ខ្លួនបន្ថែមទៀតនៅកម្ពុជា។

គួរឱ្យដឹងថា ក្រុមហ៊ុនកម្ពុជា ដែលចាប់ដៃជាមួយក្រុមហ៊ុនចិន ក្នុងបង្កើតរោងចក្រដំឡើងឧបករណ៍ Tabletនេះ គឺក្រុមហ៊ុន KH Haitech របស់​អ្នកឧកញ៉ា សំ សុខនឿន។ ជាការចាប់ផ្ដើម ក្រុមហ៊ុនគ្រោងចំណាយដើមទុនវិនិយោគប្រមាណ១០លានដុល្លារ ដើម្បីដំឡើង​គ្រឿង​បង្គុំ​​ចំនួន១ម៉ឺនគ្រឿង ​ដែល​នឹង​ផ្គត់ផ្គង់​ដល់​ទីផ្សារ​ក្នុងស្រុក ​និង​ឈាន​ទៅ​រក​ការ​នាំចេញ​ដែល​មាន​តម្លៃ​សមរម្យ៕