រដ្ឋមន្ត្រីក្រសួងអប់រំកម្ពុជា អាចប្រើប្រាស់ភាសាបរទេសបានចំនួន ៦ភាសា

រដ្ឋមន្ត្រីក្រសួងអប់រំ លោក ហង់ជួន ណារ៉ុន អាចប្រើប្រាស់ភាសាបរទេសរហូតដល់៦ភាសា ខណៈដែលពេលថ្មីៗនេះ លោករដ្ឋមន្ត្រី ទើបតែទទួលបានវិញ្ញាបនបត្របញ្ជាក់ការសិក្សាភាសាចិន ពីសាកលវិទ្យាល័យភូមិន្ទភ្នំពេញ។

នៅថ្ងៃទី១២ ខែមេសា ឆ្នាំ២០២៤ លោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា​ បានបង្ហាញនូវលទ្ធផលថ្មីមួយថែមទៀតនៃការសិក្សារបស់លោក នោះ គឺវិញ្ញាបនបត្របញ្ជាក់ការសិក្សាផ្នែកភាសាចិនកម្រិតខ្ពស់ ដោយជោគជ័យ ពីវិទ្យាស្ថានភាសាបរទេស នៃសាកលវិទ្យាល័យភូមិន្ទភ្នំពេញ។ ភាសាចិន អាចជាភាសាបរទេស ទី៦ ហើយ បន្ទាប់ពីភាសាបរទេសចំនួន៥ផ្សេងទៀត ដែលលោក ហង់ជួន ណារ៉ុន អាចនិយាយ និងប្រើប្រាស់ជាផ្លូវការបាន។

ក្រៅតែពីភាសាខ្មែរ ដែលជាភាសាកំណើតហើយនោះ លោកឧបនាយករដ្ឋមន្ត្រី ហង់ជួន ណារ៉ុន អាចប្រើប្រាស់ភាសាអង់គ្លេស បារាំង រុស្សី ចិន និងភាសាថៃ តែដោយសារតែចេះភាសាថៃ លោក ក៏មានសមត្ថភាពសន្ទនាជាភាសាឡាវផងដែរ។

អតីតនិស្សិតបញ្ចប់ការសិក្សាថ្នាក់បណ្ឌិតសេដ្ឋកិច្ចអន្តរជាតិពីប្រទេសរុស្ស៉ីរូបនេះ ធ្លាប់បានគូសបញ្ជាក់ថា យោងតាមការស្រាវជ្រាវ ការចេះភាសាច្រើនធ្វើឱ្យខួរក្បាលគិតបានល្អ ជាងអ្នកចេះភាសាតែមួយ និងមានការយល់ដឹងខាងផ្នែកវប្បធម៌ វិទ្យាសាស្ត្រ និងមានបំណិនទំនាក់ទំនងបានល្អជាង៕