ច្បាស់ហើយ កូវីដ១៩ មិនមែនមានប្រភពកើតចេញពីកម្ពុជានោះទេ

រដ្ឋលេខាធិការ និងជាអ្នកនាំពាក្យក្រសួងសុខាភិបាល លោក ស្រីឱ វណ្ណឌីន នៅក្នុងសន្និសីទសារព័ត៌មាន ព្រឹកថ្ងៃទី ២៣ ខែកុម្ភៈនេះ បានថ្លែងបដិសេធច្រានចោលនូវការសិក្សាមួយ ដែលអះអាងថា ជំងឺកូវីដ១៩ មានប្រភពកើតចេញពីកម្ពុជា។

លោក ស្រី ឱ វណ្ណឌីន អ្នកនាំពាក្យក្រសួងសុខាភិបាលកម្ពុជា បានបញ្ជាក់ថា ការសិក្សារបស់វិទ្យាស្ថានប៉ាស្ទ័រកម្ពុជា ឆ្នាំ២០១០ នៅលើសត្វប្រចៀវកន្លងមក គ្រាន់តែមានការរកឃើញនៅលើសត្វប្រចៀវ២ប្រភេទ នៅក្នុងចំណោមសត្វប្រចៀវមួយចំនួន មានមេរោគប្រហាក់ប្រហែល ទៅនឹងជំងឺសារ Covid2 តែមិនមែនជាកូវីដ១៩ នោះទេ។

លោក ស្រី ច្រានចោលការបកស្រាយថា ជំងឺកូវីដ១៩ ចេញពីកម្ពុជា លោក ស្រី បញ្ជាក់ថា ការអះអាងបែបនេះ មិនទាន់មានការសិក្សាណាមួយ ដែលបានបញ្ជាក់ច្បាស់លាស់ថា កូវីដ១៩ កើតឡើងនៅកន្លែងណានោះទេ។

ម្យ៉ាងទៀត ការសិក្សានេះ គ្មានភស្តុតាងណាដែលយកមកបញ្ជាក់ថា ជំងឺកូវីដ១៩នេះ កើតឡើងនៅកម្ពុជា ហើយថា ការឆ្លងនៅកម្ពុជាជាក់ស្តែងគឺជាការនាំចូលពីខាងក្រៅមក ដែលកម្ពុជាបានរកឃើញករណីទី១ កើតនៅលើជនជាតិចិន ថ្ងៃទី ២៧ ខែមករា ឆ្នាំ ២០២០ នៅខេត្តព្រះសីហនុ។

លោក ស្រីថា បញ្ជាក់ថា “ អញ្ចឹងច្បាស់ហើយថា វិរុសកូវីដ១៩ មិនមែនជាប្រភេទវិរុសកើតនៅកម្ពុជានោះទេ វាជាប្រភេទដែលយើងរកឃើញតាមរយៈការនាំចូលនូវវិរុសនោះពីខាងក្រៅ”៕

អត្ថបទ៖ ឡេង ដេត