ស្នងការខេត្តសៀមរាប បញ្ចប់ករណីប្ដីប្រពន្ធលក់អនឡាញជេរអតិថិជនមិនសំចៃមាត់ត្រឹម «ការសុំទោសជាសាធារណៈ»

នៅល្ងាចថ្ងៃទី៣០ ខែមេសា ឆ្នាំ២០២៤នេះ កម្លាំងនគរបាលខេត្តសៀមរាប  បានស្វែងរកឃើញ និងតាមឃាត់២នាក់ប្តីប្រពន្ធលក់ខោអាវតាមអនឡាញ ក្រោយជេរប្រមាថធ្ងន់ធ្ងរលើអតិថិជនរបស់ខ្លួន។

តាមការឱ្យដឹងរបស់លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប សមត្ថកិច្ចបានណែនាំ និង ធ្វើកិច្ចសន្យាអប់រំ នៅប៉ុស្ដិ៍នគរបាលរដ្ឋបាលសាលាកំរើក ដោយសាមីខ្លួនបានធ្វើការសុំទោសជាសាធារណៈ សន្យាបញ្ឈប់ការប្រើប្រាស់ពាក្យសម្ដីជេរប្រមាថ ឬខុសឆ្គងតទៅទៀត។

គួររំលឹកថា កាលពីពេលថ្មីៗនេះ មានករណីស្រ្តី និងប្ដីប្រពន្ធដែលជាអ្នកលក់អនឡាញ បានជេរទៅលើអតិថិជនដែលទិញសម្ភារៈរបស់ខ្លួន។

ជាការកត់សម្គាល់ ក្រោយអ្នកលក់អនឡាញទាំងប្ដីប្រពន្ធរូបនេះប្រើពាក្យសម្ដីមិនសមរម្យលើអតិថិជន ភ្លាមៗពលរដ្ឋកម្ពុជា បានប្រតិកម្មចំពោះអ្នកលក់អនឡាញទាំងគូរនេះភ្លាម ដោយចាត់ទុកថា ពាក្យសម្ដីអសុរសដែលប្ដីប្រពន្ធនេះប្រើជាពាក្យប្រាសចាកនឹងសីលធម៌សង្គមខ្មែរ៕

អត្ថបទ៖ជុន កុសល