អ្នកសារព័ត៌មានចម្រុះស្ថាប័ន ចុះទស្សនកិច្ចទៅកាន់គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ

នៅព្រឹកថ្ងៃទី៩ ខែឧសភា ឆ្នាំ២០២៤នេះ អ្នកសារព័ត៌មានចម្រុះស្ថាប័នចំនួន១០ បានចូលរួមកម្មវិធីដំណើរទស្សនកិច្ចទៅកាន់គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ នៅខេត្តកំពង់ស្ពឺ។ កម្មវិធីទស្សនកិច្ចនេះ រៀបចំឡើងដោយក្រសួងការងារ និងបណ្ដុះបណ្ដាលវិជ្ជាជីវៈ។

បើតាមក្រសួងការងារ កម្មវិធីនេះធ្វើឡើងក្នុងគោលបំណងឱ្យអ្នកសារព័ត៌មានបានស្វែងយល់កាន់តែស៊ីជម្រៅ និងទទួលបានបច្ចុប្បន្នភាពអំពីវឌ្ឍនភាពស្តីពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ហើយចូលរួមការផ្សព្វផ្សាយព័ត៌មានកាន់តែទូលំទូលាយ ទាក់ទងនឹងកម្មវិធីបណ្តុះបណ្តាលជំនាញនេះ ដើម្បីកៀរគរយុវជនគោលដៅចុះឈ្មោះចូលរៀនក្នុងកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១.៥លាននាក់ របស់រាជរដ្ឋាភិបាលកម្ពុជា។

នៅក្នុងដំណើរទស្សនកិច្ចនេះ នឹងមានការធ្វើបទបង្ហាញដោយលោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ នាយកវិទ្យាស្ថានពហុបច្ចេកទេសកម្ពុជាខេត្តកំពង់ស្ពឺ ព្រមទាំងការជួបផ្ទាល់ជាមួយសិស្ស និងតំណាងក្រុមហ៊ុន ដែលសិស្សចុះកម្មសិក្សា ផងដែរ៕