ប្រធានក្រុមយុវជនសង្គមស៊ីវិល គាំទ្រឱ្យបង្កើតច្បាប់ដាក់ទោសជនណានិយាយថា កម្ពុជាគ្មានអំពើប្រល័យពូជសាសន៍

ប្រធានក្រុមយុវជនសង្គមស៊ីវិល និងក្រុមសេដ្ឋកិច្ចក្រៅប្រព័ន្ធ ប្រកាសគាំទ្រយ៉ាងពេញទំហឹងនូវប្រសាសន៍របស់សម្ដេច តេជោ ហ៊ុន សែន ប្រធានព្រឹទ្ធសភានៃកម្ពុជា ដែលស្នើឱ្យបង្កើតច្បាប់ដាក់ទោសជនណានិយាយថា «កម្ពុជាគ្មានអំពើប្រល័យពូជសាសន៍»។

បើតាមការលើកឡើងរបស់លោក ហេង សំណាង ប្រធានក្រុមយុវជនសង្គមស៊ីវិល និងក្រុមសេដ្ឋកិច្ចក្រៅប្រព័ន្ធ កម្ពុជាមុននឹងមានថ្ងៃនេះ បានរងគ្រោះព្រោះរបបខ្មៅងងឹងស្ទើបាត់បង់ប្រទេស ទម្រាំមានសុខសន្តិភាព និងការអភិវឌ្ឍពេលនេះ មិនមែនជារឿងងាយ និងចៃដន្យឡើយ។ លោក បន្តថា ប្រជាជនកម្ពុជាគ្រប់រូបបានចងចាំ និងមិនអាចបំភ្លេចបានឡើយចំពោះសោកនាដកម្មនៃរបបកម្ពុជាប្រជាធិបតេយ្យ ឬហៅថា របបប្រល័យពូជសាសន៍ ប៉ុល ពត ដែលជារបបដ៏ឃោរឃៅ និងខ្មៅងងឹត ដោយប្រវត្តិសាស្រ្ត មិនអាចក្រឡៃមិនបំភ្លេចបាននោះទេ ជនរងគ្រោះជាង ៣លាននាក់ បានស្លាប់បាត់បង់ជីវិតនៅក្នុងរបបប្រល័យពូជសាសន៍នេះ។

ប្រធានក្រុមយុវជនសង្គមស៊ីវិល បានបន្ថែមថា ប្រជាជនកម្ពុជា រួមនឹងពិភពលោកបានដឹងយ៉ាងច្បាស់អំពីកត្តាសុខសន្តិភាពរបស់កម្ពុជានាពេលបច្ចុប្បន្ន គឺកម្ពុជាបានឆ្លងកាត់ការឈឺចាប់ ជូរចត់ឥតល្ហែស្ទើតែបាត់បង់ប្រទេសជាតិ។ ប៉ុន្តែជាអកុល មានជនឆ្លៀតឱកាស ឬអ្នកនយោបាយជ្រុលនិយម តែងតែសាបព្រោះនូវមនោគមវិជ្ជាខ្មៅកខ្វក់ ធ្វើប្រជាភិថុតភូតភរ បណ្តុះមនសិការទុច្ចរិច ក្នុងគោលដៅដើម្បីកេងចំណេញនយោបាយ ដោយបានបំភ្លៃប្រវត្ថិសាស្រ្ដ។

ដូច្នេះ ក្នុងឱកាសអញ្ជើញជាអធិបតីបិទសន្និសីទស្ដីពីអនាគតកម្ពុជាគ្មានប្រល័យពូជសាសន៍ សម្ដេចតេជោ ហ៊ុន សែន បានស្នើឱ្យបង្កើតច្បាប់ផ្តន្ទាទោសអ្នកនិយាយថា «កម្ពុជាគ្មានរបបប្រល័យពូជសាសន៍»។ ក្រុមយុវជនសង្គមស៊ីវិល រួមទាំងយុវជន និងប្រជាជនខ្មែរ បានប្រកាសគាំទ្រយ៉ាងពេញទំហឹងឱ្យអ្នកច្បាប់នៅក្នុងប្រទេសកម្ពុជា ដោយរៀបចំបង្កើតច្បាប់នេះ ដើម្បីដាក់ទោសចំពោះជនណាដែលចង់បំភ្លៃប្រវត្តិសាស្រ្ដ។ 

ក្នុងនាមជាយុវជនជំនាន់ក្រោយ លោក ហេង​ សំណាង បានសម្ដែងនូវស្មារតីមិនអាចបំភ្លេចបានទេនូវការលះបង់របស់ឥស្សរជនខ្មែរជាច្រើនដែលបានពលីជីវិត ប្តូរយកសន្តិភាព ការពារប្រទេសជាតិ និងប្រជាជន ជាពិសេសគុណូបការៈ និងការលះបង់មហាធំធេងរបស់សម្តេចតេជោ ហ៊ុន សែន អតីតនាយករដ្ឋមន្រ្ដីនៃកម្ពុជា ដែលបានយកជីវិតធ្វើជាដើមទុនប្តូរយកសន្តិភាព ការអភិវឌ្ឍ ឯកភាពជាតិពេញលេញសម្រាប់ប្រជាជាតិទាំងមូល។      

លោក ហេង សំណាង ក្រុមយុវជនសង្គមស៊ីវិល បានអំពាវនាវដល់ស្ថាប័នពាក់ព័ន្ធ ពិសេសក្រសួងយុត្តិធម៌ និងក្រុមអ្នកច្បាប់ ពិនិត្យរៀបចំតាក់តែងច្បាប់ផ្តន្ទាទោសចំពោះអ្នកនិយាយថា«កម្ពុជាគ្មានរបបប្រល័យពូជសាសន៍» ដើម្បីកុំឱ្យរបបនេះវិលត្រឡប់មកវិញម្ដងទៀត ហើយបង្ការកុំឱ្យមានជនឆ្លៀតឱកាសជ្រុលនិយមបំភ្លៃប្រវត្តិសាស្រ្ដរបស់កម្ពុជា៕