Messi និង Ronaldo បានបន្សល់ទុកកំណត់ត្រាធំ ៤ ដែលពិបាករកអ្នកមកបំបែក មុនលាពី World Cup

ខ្សែប្រយុទ្ធរបស់ក្រុមជម្រើសជាតិ អាហ្សង់ទីន កីឡាករ Lionel Messi និងខ្សែប្រយុទ្ធជម្រើសជាតិ ព័រទុយហ្គាល់ កីឡាករ Cristiano Ronaldo បានសាងនូវកំណត់ត្រាពិសេស ៤ ប្រចាំប្រវត្តិសាស្ត្រ World Cup ដែលធ្វើឱ្យកីឡាករផ្សេងពិបាកបំបែកបាន។

World Cup 2026 ទំនងជានឹងក្លាយជាព្រឹត្តិការណ៍ World Cup លើកចុងក្រោយហើយ សម្រាប់វីរបុរសទាំង ២ បង្ហាញខ្លួន បន្ទាប់ពីពួកគេសុទ្ធតែមានវ័យជ្រែខ្លាំងទៅហើយ។ ទន្ទឹមនឹងនេះ Ronaldo បានប្រកាសរួចហើយ ថា World Cup 2026 ជាការបង្ហាញខ្លួនលើកចុងក្រោយរបស់គាត់នៅ World Cup។

ចំណែក Messi វិញ បានទម្លាយប្រាប់មិត្តរួមក្រុម បន្ទាប់ពីការប្រកួតទល់នឹងក្រុមជម្រើសជាតិ អេស្ប៉ាញ ថា ការប្រកួតទល់នឹងក្រុមជម្រើសជាតិ អេស្ប៉ាញ ជាការប្រកួតលើកចុងក្រោយរបស់គាត់ជាមួយនឹងក្រុមជម្រើសជាតិ អាហ្សង់ទីន។

មុនវីរបុរសទាំង ២ លាពី World Cup ដែលជាព្រឹត្តិការណ៍ធំបំផុតក្នុងពិភពលោកនេះ គឺបានកសាង និងបំបែកកំណត់ត្រាធំៗជាច្រើន ប៉ុន្តែមានកំណត់ត្រា ៤ ត្រូវបានគេមើលឃើញ ថា អាចនឹងពិបាករកអ្នកមកបែកណាស់នាពេលអនាគត។

Leo Messi មានកំណត់ត្រាពិសេស ២។ កំណត់ត្រាទី ១ គឺអតីតខ្សែប្រយុទ្ធ Barcelona បានក្លាយជាកីឡាករ ដែលបង្ហាញខ្លួនច្រើនប្រកួតជាងគេនៅព្រឹត្តិការណ៍ World Cup ពោលគឺចំនួន ៣៣ ប្រកួត។ កំណត់ត្រានេះ ធានា ថា នឹងមិនងាយមានអ្នកបំបែកទេ ដោយសារទាល់តែមានកីឡាករអាចបង្ហាញខ្លួនបានដល់ ៦ ព្រឹត្តិការណ៍ផ្សេងគ្នា ហើយអាចលេងបានដល់វគ្គជ្រៅៗគ្រប់លើក។

កំណត់ត្រាទី ២ គឺ ម្ចាស់ពាន World Cup 2022 បានក្លាយជាកីឡាករវ័យចំណាស់ជាងគេបំផុត ដែលរកបានគ្រាប់បាល់ ៣ គ្រាប់ (hat-trick) នៅក្នុងព្រឹត្តិការណ៍ World Cup។ Messi រកបាន hat-trick នៅ World Cup 2026 នៅពេលការប្រកួត អាហ្សង់ទីន ឈ្នះ អាល់ហ្ស៊េរី ៣-០ ដែលពេលនោះមានវ័យ ៣៨ ឆ្នាំ និង ៣៥៧ ថ្ងៃ។ កំណត់ត្រានេះ ទំនងជានឹងពិបាករកអ្នកមកបំបែកខ្លាំង ដោយសារមិនងាយមានកីឡាករណា អាចលេងដល់អាយុ ៣៨ ឆ្នាំ ហើយរកបានគ្រាប់បាល់ ៣ គ្រាប់បែបនេះទេ។

ងាកទៅមើល Ronaldo វិញ ក៏មានកំណត់ត្រា ២ ដែលពិបាករកអ្នកមកបំបែកផងដែរ។ ទី ១ ខ្សែប្រយុទ្ធរបស់ Al-Nassr បានក្លាយជាកីឡាករចាស់ជាងគេបង្អស់ ដែលរកបានគ្រាប់បាល់បាននៅវគ្គចាញ់ធ្លាក់ក្នុងព្រឹត្តិការណ៍ World Cup ពោលគឺក្នុងវ័យ ៤១ ឆ្នាំ និង ១៤៧ ថ្ងៃ។ កំណត់ត្រានេះ Ronaldo ធ្វើបាន នៅពេល ព័រទុយហ្គាល់ ឈ្នះ ក្រូអាត ២-១ ក្នុងវគ្គ ៣២ ក្រុម World Cup 2026។ ជឿជាក់ ថា កំណត់ត្រានេះ ពិតជាពិបាករកអ្នកមកបំបែកណាស់ ព្រោះក្នុងប្រវត្តិសាស្ត្រ World Cup កន្លងមក មិនងាយមានកីឡាករវ័យជាង ៤០ ឆ្នាំណា បានលេងនៅ World Cup ជា​ខ្សែ​ប្រយុទ្ធ​ដូច Ronaldo ឡើយ។

ចំណែកកំណត់ត្រាទី ២ គឺ Ronaldo បានក្លាយជាកីឡាករដំបូងគេបង្អស់ ដែលរកបានគ្រាប់បាល់នៅ World Cup បាន ៦ ព្រឹត្តិការណ៍ផ្សេងគ្នា។ អតីតខ្សែប្រយុទ្ធ Real Madrid បានបង្ហាញខ្លួននៅ World Cup បាន ៦ លើកផ្សេងគ្នា ពោលគឺនៅឆ្នាំ ២០០៦ ២០១០ ២០១៤ ២០១៨ ២០២២ និង ២០២៦។ ហេតុផល ដែលពិបាករកអ្នកមកបំបែកបាន គឺមិនខុសពីខាងលើនោះទេ ដោយនៅក្នុងប្រវត្តិសាស្ត្រ World Cup មិនមានកីឡាករច្រើនទេ ដែលអាចលេងនៅ World Cup បានដល់ ៦ លើកផ្សេងគ្នាបែបនេះ៕

អត្ថបទ៖ សេម កុសល