កីឡា

ប៉ះគ្នាវគ្គសំខាន់ទៀតហើយ! កម្ពុជា ប្រកួតជាមួយ សៀម វគ្គ១/២ផ្តាច់ព្រ័ត្រ ម៉ោង ៣:៣០នាទីថ្ងៃនេះ

បានផុស

១១ នាទី មុន

នៅ

ថ្ងៃសៅរ៍ ២៥ កក្កដា ២០២៦

ដោយ

ក្រុមបាល់ទះជម្រើសជាតិកម្ពុជា បានឡើងវគ្គពាក់កណ្តាលផ្តាច់ពានរង្វាន់អាស៊ាន SEA V. Cup ឆ្នាំ ២០២៦ ជើងទី២ ក្នុងនាមជាក្រុមលេខ ២ ក្នុងពូល A បន្ទាប់ពីឈ្នះ ១ ប្រកួត និងចាញ់ ១ ប្រកួត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតសន្សំពិន្ទុលើកទី១ កម្ពុជា បានចាញ់ម្ចាស់ផ្ទះ ឥណ្ឌូណេស៊ី ដោយលទ្ធផល ៣-០ ប៉ុន្តែការប្រកួតសន្សំពិន្ទុលើកទី២ បានយកឈ្នះ ហ្វីលីពីន ដោយលទ្ធផល ៣-០។ ចំណែក ឥណ្ឌូណេស៊ី ស្ថិតនៅលេខ ១ ក្នុងពូល តាមរយៈជ័យជម្នះ ៣-០ លើ កម្ពុជា និងឈ្នះ ហ្វីលីពីន ៣-១។

នៅវគ្គពាក់កណ្តាលផ្តាច់ព្រ័ត្រ ក្នុងនាមជាក្រុមលេខ ២ ក្នុងពូល កម្ពុជា ត្រូវជួបក្រុមលេខ ១ ពូល B គឺ សៀម ខណៈ ឥណ្ឌូណេស៊ី ជាក្រុមលេខ ១ ពូល A ត្រូវជួបក្រុមលេខ២ ពូល B គឺវៀតណាម។ ក្រុមហ្វីលីពីន និង មីយ៉ាន់ម៉ា ត្រូវប្រកួតដណ្តើមយកចំណាត់ថ្នាក់លេ៥។

នៅក្នុងព្រឹត្តិការណ៍ SEA V. Cup ឆ្នាំ ២០២៦ នេះ ក្រុមសៀមធ្វើមិនសូវបានល្អទេដោយស្ថិតនៅចំណាត់ថ្នាក់លេខ៣ កាលពីជើងទី១។ ពួកគេឈឺចាប់បំផុតនៅពេលចាញ់ កម្ពុជា នៅវគ្គពាក់កណ្តាលផ្តាច់ព្រ័ត្រ ដោយលទ្ធផល ៣-១ ហើយជាការចាញ់លើកដំបូង ដោយលទ្ធផល ៣-១ នេះ ពីព្រោះកន្លងមក ពួកគេធ្លាប់ចាញ់ដោយលទ្ធផល ៣-២។

កាលពីជើងទី១ វគ្គសន្សំពិន្ទុក្នុងពូល ក្រុមសៀម បានឈ្នះ វៀតណាម ដោយលទ្ធផល ៣-១ ប៉ុន្តែចូលជើងទី ២ បានយកឈ្នះ វៀតណាម ទាំងលំបាកគឺ ៣-២ ដូច្នេះបញ្ជាក់ថា សមត្ថភាពរបស់ពួកគេមិនសូវជាល្អប្រសើរប៉ុន្មានឡើយ។ ផ្ទុយទៅវិញ ក្រុមកម្ពុជាកាន់តែមានលក្ខណៈលក្ខណៈល្អប្រសើរ។ កាលពីជើងទី១ កម្ពុជា បានឈ្នះ ហ្វីលីពីន ៣-២ ប៉ុន្តែនៅជើងទី២ បានឈ្នះ ហ្វីលីពីន ដោយលទ្ធផលតដៃមិនរួចគឺ ៣-០។

តាមរយៈលទ្ធផលល្អប្រសើររបស់កម្ពុជាលំដាប់ បានកំពុងធ្វើឲ្យ ក្រុមសៀម រងសម្ពាធយ៉ាងខ្លាំងពីអ្នកគាំទ្រ។ អ្នកគាំទ្រសៀមបានរិះគន់យ៉ាងចាស់ដៃចំពោះក្រុមជម្រើសជាតិរបស់ខ្លួនដែលមិនមានការអភិវឌ្ឍ ប៉ុន្តែយកបទពិសោធចាស់ និងកីឡាករចាស់មកប្រើប្រាស់។ មិនត្រឹមតែប៉ុណ្ណោះ អ្នកគាំទ្ររបស់ពួកគេបានលើកហេតុផលផ្សេងៗជុំវិញការចាញ់ កម្ពុជា នៅវគ្គពាក់កណ្តាលផ្តាច់ព្រ័ត្រកាលពីជើងទី១ ប៉ុន្តែពួកគេមិនហ៊ានទទួលស្គាល់ការពិតពីសមត្ថភាពរបស់កម្ពុជា។

ជួបគ្នាវគ្គសំខាន់់ៗ ៣ ដង សៀម មិនធ្លាប់ឈ្នះ កម្ពុជា ឡើយ។ លើកទី១ ដណ្តើមមេដាយសំរិទ្ធ កីឡាស៊ីហ្គេម ឆ្នាំ ២០២១ នៅប្រទេសវៀតណាម កម្ពុជា បានយកឈ្នះដោយលទ្ធផល ៣-២ ដើម្បីទទួលបានមេដាយសំរិទ្ធ។ លើកទី២ កម្ពុជា បានទម្លាក់ សៀម នៅវគ្គពាក់កណ្តាលផ្តាច់ព្រ័ត្រ ក្នុងកីឡាស៊ីហ្គេម ឆ្នាំ ២០២៣ ដោយលទ្ធផល ៣-២ ដើម្បីឡើងទៅកាន់វគ្គផ្តាច់ព្រ័ត្រ ទទួលបានមេដាយប្រាក់កីឡាស៊ីហ្គេម ហើយលើកទី៣ កម្ពុជា បានទម្លាក់ សៀម នៅវគ្គពាក់កណ្តាលផ្តាច់ព្រ័ត្រ ដោយលទ្ធផល ៣-១ ដើម្បីឡើងទៅកាន់វគ្គផ្តាច់ព្រ័ត្រដែលបានឈ្នះជើងឯក SEA Vollyeyball Cup ជើងទី១ ឆ្នាំ ២០២៦ នៅប្រទេសហ្វីលីពីន។ ថ្ងៃនេះជាការជួបគ្នាវគ្គសំខាន់លើកទី៤។

ប្រសិនបើ សៀម ធ្លាក់ក្រោមថ្វីដៃរបស់ កម្ពុជា ទៀតនោះគឺកាន់តែអាម៉ាស់ និងរងសម្ពាធខ្លាំង ឡើង ពីព្រោះពួកគេមិនអាចក្សាខ្លួនជាក្រុមខ្លាំងប្រចាំតំបន់អាស៊ាន ហើយមិនទទួលបានកៅអីឡើងទៅប្រកួតពានរង្វាន់អាស៊ី Asian Volleyball Championship (AVC Cup) ថែមទៀត ពីព្រោះក្រុមលេខ១ និងលេខ២ នៃព្រឹត្តិការណ៍ SEA V. Cup ឆ្នាំ ២០២៦ គឺទទួលបានកៅអីឡើងទៅប្រកួត AVC Cup ឆ្នាំ ២០២៧។ កម្ពុជា និង ឥណ្ឌូណេស៊ី ជាបេក្ខភាពឈានមុខគេក្នុងការទទួលបានកៅអី ទៅប្រកួតពានអាស៊ី៕