កីឡា

ក្រុមបាល់ទាត់ ស.ស.យ.ក អលស្តារ បើកឆាកប្រកួតដំបូងយកឈ្នះលើសមាគមគ្រូពេទ្យស្ម័គ្រចិត្ត TYDA 1-0

បានផុស

៣ នាទី មុន

នៅ

ថ្ងៃសៅរ៍ ២៥ កក្កដា ២០២៦

ដោយ

បន្ទាប់ពីប្រកាសទទួលស្គាល់ជាផ្លូវការនៃក្រុមបាល់ទាត់ ស.ស.យ.ក អលស្តារ រួចហើយនោះកាលពីល្ងាចថ្ងៃទី២៤ ខែកក្កដា ឆ្នាំ២០២៦ ម្សិលមិញនេះជាការប្រកួតបើកឆាកដំបូងរបស់ក្រុមថែមទាំងទទួលបានជ័យជម្នះទៀតផងលើក្រុមបាល់ទាត់សមាគមគ្រូពេទ្យស្ម័គ្រចិត្ត TYDA 1-0 នៅឯពហុកីឡដ្ឋានជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពផេកបាល់ទាត់ ស.ស.យ.ក អលស្តារ

លោក គួច វែងស្រ៊ុន អ្នកចាត់ការទូទៅនៃក្រុមបាល់ទាត់ ស.ស.យ.ក អលស្តារ បានលើកឡើងថា នេះជាការប្រកួតបើកឆាកដំបូងតាំងពីប្រកាសទទួលស្គាល់ក្រុម និងសំលៀកបំពាក់ជាផ្លូវការនាប៉ុន្មានសប្ដាហ៍មុនរួចមក។ ក្រុមបាល់ទាត់នេះបង្កើតឡើងក្នុងស្មារតី «កីឡា មិត្តភាព សប្បុរសធម៌» ដូចជាឯកឧត្តម ហ៊ុន ម៉ានី ធ្លាប់លើកឡើងពីមុន។

រូបភាពផេកបាល់ទាត់ ស.ស.យ.ក អលស្តារ

ការប្រកួតជាមួយក្រុមបាល់ទាត់សមាគមគ្រូពេទ្យស្ម័គ្រចិត្ត TYDA គឺក្នុងគោលបំណងរឹតចំណងមិត្តភាពរវាងក្រុមទាំងពីរ និងលើកកម្ពស់សុខុមាភាពអ្នកចូលរួមលេងទាំងអស់គ្នាផងដែរ។ មួយវិញទៀតជាការកម្ពៅសាច់ដុំ និងផ្ដួចផ្ដើមគំនិតរួមគ្នាដើម្បីឈានទៅរៀបចំការប្រកួតសប្បុរសធម៌មួយនៅឯតំបន់ជនភៀសសឹកក្នុងភូមិរង់ចាំអំឡុងខែក្រោយនេះ។ ចំពោះសកម្មភាព និងកិច្ចការសប្បុរសធម៌មានអ្វីខ្លះនោះខាងក្រុមការងារកំពុងរៀបចំគម្រោង។

រូបភាពផេកបាល់ទាត់ ស.ស.យ.ក អលស្តារ

តំណាងក្រុមបាល់ទាត់ខាងលើបន្ថែមទៀតថា មែនទែនទៅនេះមិនមែនជាលើកទី១ សម្រាប់ ស.ស.យ.ក ដែលមានសកម្មភាពជាមួយសង្គមជាតិនោះទេ។ ពោលសកម្មភាព និងកីឡាផ្សារភ្ជាប់ជាមួយការងារសប្បុរសធម៌នឹងមានជាបន្តបន្ទាប់ទៀតពិសេសនៅតំបន់ព្រំដែនជួរមុខជាដើមដែលនេះបញ្ជាក់ថាប្រជាជននៅជួរក្រោយនេះមិនទុកឲ្យវីរៈជនជួរមុខឯកោ ឬភ្លេចអ្នកតស៊ូនោះឡើយ។

បញ្ជាក់ដែរថា ថ្ងៃបើកឆាកប្រកួតដំបូងរបស់ក្រុមបាល់ទាត់ ស.ស.យ.ក អលស្តារ កាលពីល្ងាចថ្ងៃទី២៤ ខែកក្កដា ឆ្នាំ២០២៦ នេះបានយកឈ្នះលើក្រុមបាល់ទាត់ សមាគមគ្រូពេទ្យស្ម័គ្រចិត្ត TYDA 1-0។ ការប្រកួតនេះផងដែរក៏មានការចូលរួមប្រកួតដោយផ្ទាល់ពីប្រធានក្រុមឯកឧត្តម ហ៊ុន ម៉ានី និងថ្នាក់ដឹកនាំ អតីតកីឡាករអាជីព និងគ្រូៗមួយចំនួនផងដែរ៕

អត្ថបទដោយ៖ នួន ស៊ីណា