ឆ្លងចរន្តអគ្គិសនីឆេះផ្ទះឈើ ១ ខ្នង យ៉ាងសន្ធោសន្ធៅ នៅខណ្ឌឫស្សីកែវ

ឆ្លងចរន្តអគ្គិសនីឆេះផ្ទះឈើ ១ ខ្នង និង សម្ភារប្រើប្រាស់ក្នុងផ្ទះអស់ទាំងស្រុង នៅផ្លូវបេតុងថ្មី អមប្រឡាយអូវែល សង្កាត់គីឡូម៉ែត្រលេខ ៦ ខណ្ឌឫស្សីកែវ។

ហេតុការណ៍នេះបានកើតឡើងកាលពីវេលាម៉ោង ១១ និង ៣៥ នាទីព្រឹក ថ្ងៃទី ២៦ ខែកក្កដា ឆ្នាំ ២០២៦ ស្ថិតនៅភូមិក្រោលគោ សង្កាត់គីឡូម៉ែត្រលេខ ៦ ខណ្ឌឫស្សីកែវ រាជធានីភ្នំពេញ។

ប្រភពពីពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុ ម្ចាស់ផ្ទះបានចេញទៅក្រៅ ដោយទុកឲ្យក្មួយប្រុស-ស្រី នៅក្នុងផ្ទះតែម្នាក់ឯង។ ស្រាប់តែរំពេចនោះ ក៏លេចចេញអណ្តាតភ្លើង និង ផ្សែងហុយយ៉ាងសន្ធោសន្ធៅចេញពីក្នុងផ្ទះ បង្កការភ្ញាក់ផ្អើលដល់អ្នកជិតខាងនាំគ្នាយកបំពង់ពន្លត់អគ្គិភ័យ និង ទុយោទឹក មកជួយបាញ់ទប់ស្កាត់ រួចរាយការណ៍ជូនសមត្ថកិច្ចជាបន្ទាន់។

លោក ជិន ប៊ុនធឿន អភិបាល នៃគណៈអភិបាលខណ្ឌឫស្សីកែវ រួមទាំងមន្រ្តីក្រោមឱវាទ ក៏មានវត្តមាននៅទីតាំងកើតហេតុ ដើម្បីជួយសម្រួលចរាចរណ៍ដល់នគរបាលជំនាញអគ្គិភ័យងាយស្រួលអន្តរាគមន៍បាញ់ពន្លត់ផងដែរ។

អគ្គិភ័យនេះបង្កការខូចខាតផ្ទះឈើប្រក់ស័ង្កសី ចំនួន ១ ខ្នង ព្រមទាំងទ្រព្យសម្បត្តិ និង សម្ភារប្រើប្រាស់ក្នុងផ្ទះទាំងស្រុង។ ក្នុងនោះ សមត្ថកិច្ចបានប្រើប្រាស់រថយន្តពន្លត់អគ្គិភ័យសរុបចំនួន ៧ គ្រឿង (រថយន្តការិយាល័យបង្ការអគ្គិភ័យ ៥ គ្រឿង , រថយន្តសាលាខណ្ឌឫស្សីកែវ ១ គ្រឿង និង រថយន្តក្រុមហ៊ុន Grand Camel ១ គ្រឿង) បាញ់ឲ្យរលត់ជាស្ថាពរ។ អគ្គិភ័យនេះ មិនបណ្តាលឲ្យមានមនុស្សរងរបួស ឬ បាត់បង់ជីវិតឡើយ ឬ ឆេះរាលដាលដល់ផ្ទះប្រជាពលរដ្ឋនៅក្បែរខាងនោះដែរ។ ចំពោះមូលហេតុពិតប្រាកដ នៃការឆាបឆេះនេះ ត្រូវបានសមត្ថកិច្ចសន្និដ្ឋានថា បណ្តាលមកពី «ការឆ្លងចរន្តអគ្គិសនី»៕
អត្ថបទ ៖ រដ្ឋា