អាមេរិក ថ្កោលទោសអំពើហិង្សានៅ West Bank ខណៈការវាយប្រហាររបស់អ៊ីស្រាអែល កាន់តែខ្លាំង

ក្រសួងការបរទេសសហរដ្ឋអាមេរិក បានចេញសេចក្តីថ្លែងការណ៍ថ្កោលទោសអំពើហិង្សាដែលបង្កឡើងដោយ «គ្រប់ភាគី» នៅក្នុងតំបន់ West Bank ដែលកំពុងស្ថិតក្រោមការកាន់កាប់របស់អ៊ីស្រាអែល ខណៈដែលស្ថានភាពសន្តិសុខនៅក្នុងដែនដីប៉ាឡេស្ទីនមួយនេះ កំពុងតែធ្លាក់ចុះគួរ​ឱ្យបារម្ភ ដោយសារការវាយប្រហារពីសំណាក់កងទ័ព និងអ្នកតាំងលំនៅថ្មីជនជាតិអ៊ីស្រាអែល។

យោងតាម​សារព័ត៌មាន TRT World ចុះផ្សាយ​ថ្ងៃទី​២៦ ខែ​កក្កដា ឆ្នាំ​២០២៦ អ្នកនាំពាក្យក្រសួងការបរទេសអាមេរិក បានគូសបញ្ជាក់ថា វ៉ាស៊ីនតោនប្រឆាំងដាច់ខាត ចំពោះអំពើហិង្សាគ្រប់រូបភាព ហើយបាននិងកំពុងធ្វើការទំនាក់ទំនងជាទៀងទាត់ជាមួយភាគីពាក់ព័ន្ធ ដើម្បីស្ដារស្ថិរភាពឡើងវិញ ព្រោះថា តំបន់ West Bank ដែលមានស្ថិរភាព គឺជាកត្តាស្នូលសម្រាប់សន្តិសុខរបស់អ៊ីស្រាអែល និងស្របទៅតាមគោលនយោបាយស្វែងរកសន្តិភាពក្នុងតំបន់។ ការប្រកាសជំហររបស់អាមេរិកនេះ បានធ្វើឡើង បន្ទាប់ពីនាយករដ្ឋមន្ត្រីអ៊ីស្រាអែល លោក Benjamin Netanyahu បានបញ្ជាឱ្យបើក «ប្រតិបត្តិការយោធាទ្រង់ទ្រាយធំ» នៅតាមភូមិឋានរបស់ជនជាតិប៉ាឡេស្ទីន។

ការបង្កើនប្រតិបត្តិការយោធានេះ បានស្ដែងឡើងយ៉ាងច្បាស់ តាមរយៈការឆ្មក់វាយប្រហារចូលទីក្រុង Tell ក្បែរក្រុង Nablus រយៈពេលពីរថ្ងៃជាប់ៗគ្នា ដោយក្រុមអ្នកតាំងលំនៅថ្មីខុសច្បាប់ជនជាតិអ៊ីស្រាអែល ក្រោមការកពារពីកងកម្លាំងប្រដាប់អាវុធអ៊ីស្រាអែល ដែលបានបណ្តាលឱ្យជនជាតិប៉ាឡេស្ទីន ៤នាក់បាត់បង់ជីវិត និង ៤នាក់ទៀតរងរបួស។ ក្រសួងសុខាភិបាលប៉ាឡេស្ទីន បានឱ្យដឹងថា គិតត្រឹមដើមឆ្នាំ ២០២៦ នេះ ចំនួនជនជាតិប៉ាឡេស្ទីន ដែលត្រូវបានសម្លាប់ដោយកងទ័ព និងអ្នកតាំងលំនៅថ្មីអ៊ីស្រាអែលនៅតំបន់ West Bank បានកើនឡើងដល់ ៨៦នាក់ហើយ ខណៈដែលក្រសួងការបរទេសប៉ាឡេស្ទីន បានថ្កោលទោសការវាយប្រហារនេះថាជា «អំពើភេរវកម្ម» និងបានអំពាវនាវឱ្យសហគមន៍អន្តរជាតិចាត់វិធានការភ្លាមៗ ដើម្បីការពារប្រជាជនប៉ាឡេស្ទីនពីការធ្វើទុក្ខបុកម្នេញនេះ៕

ប្រែសម្រួល៖ ឈាង