លោក សៀក​ សុជាតិ ណែនាំឱ្យទប់ស្កាត់ និងស្រាវជ្រាវរកមេខ្យល់ ដែលនាំអីវ៉ាន់គេចពន្ធតាមរយៈកម្មករអូសរទេះ

ប្រធានក្រុមការងារទី២ នៃគណៈកម្មការចំពោះកិច្ចដោះស្រាយបញ្ហាដំណើរចេញចូលរបស់ពលករខ្មែរតាមព្រំដែន បានណែនាំឱ្យមន្ត្រីមានសមត្ថកិច្ចទប់ស្កាត់ និងស្រាវជ្រាវរកមេខ្យល់ ដែលនាំអីវ៉ាន់គេចពន្ធតាមរយៈកម្មករអូសរទេះ។

ការណែនាំបែបនេះរបស់លោក សៀក សុជាតិ រដ្ឋលេខាធិការនៃក្រសួងការពារជាតិ និងជាប្រធានក្រុមការងារទី២ នៃគណៈកម្មការចំពោះកិច្ចដោះស្រាយបញ្ហាដំណើរចេញចូលរបស់ពលករខ្មែរតាមព្រំដែន បន្ទាប់ពីមានផ្ទុះការតវ៉ានៅច្រកទ្វារអន្តរជាតិប៉ោយប៉ែត កាលពីថ្ងៃទី២២ ខែឧសភា ឆ្នាំ២០២៤កន្លងទៅនេះ​ ពីសំណាក់កម្មករអូសរទេះនាំអីវ៉ាន់គេចពន្ធ។

ដោយមានបញ្ហានេះ នៅថ្ងៃទី៣១ ខែឧសភា ឆ្នាំ២០២៤ លោក សៀក សុជាតិ បានដឹកនាំកិច្ចប្រជុំនៅអគារទីស្នាក់ការច្រកទ្វារអន្តរជាតិប៉ោយប៉ែត ដើម្បីដោះស្រាយបញ្ហាកម្មករអូសរទេះនាំអីវ៉ាន់គេចពន្ធចូលមកកម្ពុជានេះ។ ក្នុងកិច្ចប្រជុំនេះ លោក សៀក សុជាតិ បានណែនាំឱ្យអាជ្ញាធរសមត្ថកិច្ចនៅច្រកទ្វារព្រំដែនត្រូវសហការ ការពារមន្ត្រីភ្នាក់ងារគយ ក្នុងការប្រមូលពន្ធជូនរដ្ឋជៀសវាងកុំឱ្យមានអីវ៉ាន់គេចពន្ធ តាមរយៈរូបភាពនៃការអូសរទេះដែលធ្វើឱ្យបាត់បង់ចំណូលថវិកាជាតិ ។

លោក ក៏បានណែនាំឱ្យទប់ស្កាត់ និងបង្ក្រាបមេឈ្មួញទុច្ចរិត និងស្រាវជ្រាវរកមេខ្យល់ ដែលនាំអីវ៉ាន់គេចពន្ធតាមរយៈកម្មករអូសរទេះប្រគល់ជូនសមត្ថកិច្ចអនុវត្តច្បាប់ជាធរមាន និងចូលរួមសហការឱ្យបានជិតស្និទ្ធជាមួយអាជ្ញាធរភាគីថៃទប់ស្កាត់ឈ្មួញទុច្ចរិត មិនឱ្យមានការនាំចេញទំនិញគេចពន្ធចេញពីប្រទេសថៃចូលមកប្រទេសកម្ពុជា តាមរយៈកម្មករអូសរទេះបន្តទៀត។

ជាមួយគ្នានេះ លោក បានណែនាំឱ្យស្រង់ស្ថិតិកម្មករអូសរទេះ ដើម្បីណែនាំផ្សព្វផ្សាយ អប់រំពួកគាត់ឱ្យបញ្ឈប់ធ្វើសកម្មភាពអូសរទេះនាំអីវ៉ាន់គេចពន្ធដែលនាំឱ្យមានការរំខានដល់ភ្ញៀវទេសចរណ៍ឆ្លងកាត់តាមច្រកអន្តរជាតិ៕