ច្រកទ្វារអន្តរជាតិប៉ោយប៉ែត ថៃបើកម៉ោង៨ កម្ពុជាបើកម៉ោង៩ ក្រោយភាគីថៃបើកបិទជាឯកតោភាគី

បន្ទាប់ពីមានការបិទច្រកមុនកំណត់ ពីសំណាក់ភាគីថៃជាឯកតោភាគី ច្រកទ្វារអន្តរជាតិប៉ោយប៉ែត ច្រកទ្វារអន្តរជាតិស្ទឹងបត់ ក៏ដូចជាច្រកតំបន់ចំនួន២ទៀត ត្រូវបានបិទកាលពីវេលាម៉ោង៤ ម្សិលមិញ លុះដល់ថ្ងៃទី៨ ខែមិថុនា ឆ្នាំ២០២៥ ភាគីថៃបានបើកច្រកខាងថៃនៅម៉ោង ៨ព្រឹក រីឯកម្ពុជាបើកច្រកខាងកម្ពុជានៅម៉ោង ៩ព្រឹក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយនឹងការបើកច្រកពីសំណាក់កម្ពុជា នៅម៉ោង ៩ព្រឹកនេះ ភាគីថៃបានមកជួបជាមួយសមត្ថកិច្ចកម្ពុជាម្ខាងរបងម្នាក់ ដោយខាងភាគីថៃ បានស្នើឱ្យកម្ពុជា បើកច្រកនៅម៉ោង ៨ព្រឹកដូចគេដែរ តែខាងកម្ពុជាបានបដិសេធ ដោយសារជាគោលការណ៍របស់ថ្នាក់ដឹកនាំ ត្រូវបើកនៅម៉ោង ៩ព្រឹកវិញ ។

ជាមួយនឹងការចម្រូងចម្រាស់ និងបិទច្រកជាឯកតោភាគីនេះ បានបង្កចលាចលដល់ពលរដ្ឋទាំងពីរប្រទេស នៅនឹងមាត់ច្រកទ្វារអន្តរជាតិប៉ោយប៉ែត ធ្វើឱ្យពលរដ្ឋថៃដែលរស់នៅ និងធ្វើការក្នុងក្រុងប៉ោយប៉ែត ប្រញាប់ចេញទៅប្រទេសថៃវិញ តែមិនទាន់អស់នោះទេ បានបន្តនៅព្រឹកថ្ងៃនេះទៀត មុននឹងខាងកម្ពុជាបើកច្រកឲ្យចេញត្រឡប់ទៅប្រទេសវិញ ពលរដ្ឋថៃបានមានការកក់ស្ទះត្រៀបត្រា នៃមាត់ច្រកខាងកម្ពុជា។ ដោយឡែកអាជីវករខ្មែរយើងកាលពីម្សិលមិញ ក៏មានការកក់ស្ទះត្រៀបត្រា នៅក្នុងទឹកដីថៃផងដែរ។

សម្រាប់ថ្ងៃនេះនៅច្រកអន្តរជាតិប៉ោយប៉ែតខាងកម្ពុជាឯខាងថៃជាច្រកខ្លងឡឹកកំពុងតែស្ទះចរាចរចេញចូលទាំងខាងថៃនិងខាងកម្ពុជា៕

អត្ថបទ ៖ អេម ពៅ