ព័ត៌មានជាតិ

ជិត២០នាក់នៅកោះកុង ពាក់ព័ន្ធព្រឹត្តិការណ៍សហគមន៍២០កុម្ភៈ រកមិនឃើញវិជ្ជាមានកូវីដ

បានផុស

៥ years មុន

នៅ

ថ្ងៃពុធ ៣ មីនា ២០២១

ដោយ

កោះកុង ៖ អភិបាលរងខេត្តកោះកុង អះអាងថា មនុស្ស១៩នាក់ដែលមានទីលំនៅក្នុងខេត្តដែលហើយធ្លាប់ពាក់ព័ន្ធនឹងព្រឹត្តិការណ៍សហគមន៍២០កុម្ភៈ កាលពីពេលកន្លងទៅ មកទល់ពេលនេះរកមិនឃើញវិជ្ជាមានវីរុសកូវីដ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីយកសំណាកមនុស្សចំនួន១៩/ស្រី៣នាក់ទៅធ្វើតេស្តរកវីរុសកូវីដ១៩នៅវិទ្យាស្ថានប៉ាស្ទ័រលើកទី១ ជាលទ្ធផលអវិជ្ជាមានទាំងអស់គ្នា។ តែទោះយ៉ាងណា ពួកគេនៅតែបន្តតាមដានសុខភាពថែមទៀត ដើម្បីធានាបានសុវត្ថិភាពសាធារណៈក្នុងសហគមន៍។

លោក ទូ សាវុធ អភិបាលរងខេត្តកោះកុង ឲ្យដឹងរសៀលថ្ងៃទី៣ ខែមីនា ២០២១នេះថា មនុស្សទាំង១៩នាក់នោះ មានជនជាតិចិន៨នាក់ កំពុងធ្វើចត្តាឡីស័កមន្ទីរពេទ្យស្រែអំបិល ជនជាតិអឺរ៉ុប៤នាក់ ធ្វើចត្តាឡីស័កនៅមណ្ឌលសុខភាពឃុំភ្ញីមាស និងជនជាតិខ្មែរចំនួន៧នាក់ជាគ្រួសារអតីតមេយោធាខេត្ត កំពុងធ្វើចត្តឡីស័កក្នុងផ្ទះចំណុចអូរស្រីស្រណោះ សង្កាត់ស្មាច់មានជ័យ។

បើតាមលោកអភិបាលរងខេត្ត ពួកគេទាំង១៩នាក់ខាងលើ ត្រូវបានអាជ្ញាធរជំនាញតាមដានឃើញនៅគោលដៅរៀងៗខ្លួន ក្រោយមានការផ្តល់ព័ត៌មានពួកគេជាប់ពាក់ព័ន្ធព្រឹត្តការណ៍សហគមន៍២០ កុម្ភៈ កន្លងទៅ។

អាជ្ញាធរខេត្ត ក្រុង ស្រុក ឃុំភូមិ បច្ចុប្បន្ន កំពុងបង្កើនការផ្សព្វផ្សាយអប់រំណែនាំជាថ្មីដល់មហាជនពីវិធានបង្ការទប់ស្កាត់ការឆ្លងរីករាលដាលជំងឺកូវីដ១៩ ដោយមិនថ្វីប្រហែសឡើយ ទោះបីជាកម្ពុជាមានវ៉ាក់សាំងចាក់ការពារខ្លួន ក៏ត្រូវបានប្រកាន់ភ្ជាប់៣កុំ ៣ការពារទាំងអស់។

របាយការណ៍របស់មន្ទីរសុខាភិបាលខេត្តកោះកុង បង្ហាញថា គិតចាប់ពីថ្ងៃទី២០ ខែធ្នូ ២០២០ មកដល់ថ្ងៃទី៣ ខែមីនា ២០២១នេះ អាជ្ញាធរបានទទួលធ្វើតេស្តសំណាកពលករមកពីប្រទេសថៃបានជិត២០០០នាក់ហើយ ហើយពួកគាត់មួយចំនួនត្រូវបានអនុញ្ញាតឲ្យវិលត្រឡប់ទៅស្រុកកំណើតវិញក្រោយរកមិនឃើញការផ្ទុកវីរុសកូវីដ។ រីឯមាន១១៩នាក់ កំពុងធ្វើចត្តាឡីស័កបន្ត៕