នៅមណ្ឌលគិរី ចុះត្រជាក់ខ្លាំង អ្នកទេសចរ និងពលរដ្ឋម្ចាស់ស្រុកនាំគ្នាសម្រុកទិញអាវរងាពាក់

ប៉ុន្មានសប្តាហ៍ចុងក្រោយនេះ អាកាសធាតុនៅក្នុងខេត្តមណ្ឌលគិរី បានចាប់ផ្ដើមប្រែប្រួល ចុះត្រជាក់ខ្លាំង។ ប្រជាពលរដ្ឋក្នុងមូលដ្ឋាន ក៏ដូចជា ភ្ញៀវទេសចរដែលមកកម្សាន្តនៅខេត្តមណ្ឌលគិរីសម្រុកទៅទិញអាវរងានៅតាមកន្លែងលក់នានានៅក្នុងក្រុងសែនមនោរម្យ ខេត្តមណ្ឌលគិរី។ ពលរដ្ឋម្ចាស់ស្រុក និងភ្ញៀវទេសចរ បានលើកឡើងថា បើរកទិញអាវរងាពាក់ ពិបាកទ្រាំនឹងអាកាសធាតុចុះត្រជាក់ខ្លាំងនេះណាស់ ហើយអាចនាំកើតជំងឺផ្តាសាយថែមទៀតផង។

ភ្ញៀវទេសចរមួយរូបដែលមកពីរាជធានីភ្នំពេញបានមកកម្សាន្តក្នុងខេត្តមណ្ឌលគិរី បានសម្តែងភាពសប្បាយរីករាយពេលបានមកលេងកម្សាន្តនៅខេត្តមណ្ឌលគិរីនៅក្នុងរដូវត្រជាក់បែបនេះ ប៉ុន្តែ លោកថា វាហាក់ដូចជាត្រជាក់លើសពីការរំពឹងទុក្ខរបស់លោកទៅទៀត។ ថ្លែងប្រាប់សារព័ត៌មានកម្ពុជាថ្មី នៅរសៀលថ្ងៃទី១៧ខែធ្នូ ឆ្នាំ២០២៤ ភ្ញៀវទេសចររូបនេះ បានលើកឡើងថា លោកបានមករកទិញអាវរងានៅដែលអាជីវករលក់ផ្សាសែនមនោរម្យ ដើម្បីទប់ស្កាត់ភាពត្រជាក់ក្នុងខេត្តមណ្ឌលគិរីនេះ។ អ្នកទេសចររូបនេះ បានបន្តថា ស្របពេលដែលអាកាសធាតុកំពុងចុះត្រជាក់បែបនេះ អាវរងាដែលលោកទិញពីអាជីវករហាក់ នឡើងថ្លៃនោះទេ ពោល គឺតម្លៃសមរម្យ គាត់អាចទទួលយកបាន។ បើតាមភ្ញៀវទេសចរម្នាក់នេះ បើភ្ញៀវទេសចរផ្សេងទៀតដែលមានបំណងចង់មកកម្សាន្តនៅក្នុងខេត្តមណ្ឌលគិរី គឺមិនបាច់ត្រៀមអ្វីនោះទេ នៅក្នុងខេត្តមណ្ឌលគិរីនេះ មានគ្រប់បែបយ៉ាងហើយ។

ក្រៅពីភ្ញៀវទេសចរមកពីរាជធានីភ្នំពេញរូបនេះ ក៏ឃើញមានភ្ញៀវទេសចរជាច្រើននាក់ផ្សេងទៀតបានចូលទិញអាររងាពាក់ដោយទឹកមុខសប្បាយរីករាយលាយឡំនឹងអាការៈត្រជាក់ដៃជើង។ មិនមែនត្រឹមតែភ្ញៀវទេសចរទេ ប្រជាពលរដ្ឋក្មេងចាស់ ប្រុស ស្រី ដែលជាម្ចាស់ស្រុក ក៏បានរូតរះទិញអារងាសម្រាប់ពាក់ខ្លួនឯងផង កូនចៅ សាច់ញាតិផងនៅក្នុងផ្សារសែនមនោរម្យ។

ដោយឡែក លោក ចាន់ ដែលជាអាជីវករមួយរូបលក់អាវរងានៅមុខផ្សារសែនមនោរម្យ បានឲ្យដឹងថា ប៉ុន្មានសប្ដាហ៍ចុងក្រោយនេះ មានអាកាសធាតុចាប់ផ្ដើមចុះត្រជាក់ខ្លាំង ហើយអតិថិជនបានមកទិញអាវរងាពីលោកយ៉ាងច្រើនហូរហែ ជាពិសេស លក់ដាច់ខ្លាំងនៅពេលរសៀល។ អាជីវកររូបនេះ បានបញ្ជាក់ថា អាវរងាដែលលក់ក្នុងហាងរបស់លោកមានតម្លៃចន្លោះពី១ ៥០០០៛ទៅ៤០ ០០០៛ ហើយលោកបានសន្យានឹងមិនឡើងថ្លៃនោះទេ ស្របពេលដែលមានអតិថិជនមកគាំទ្រច្រើនក្នុងអំឡុងពេលរដូវត្រជាក់ចូលមកដល់នេះ៕

ដោយ៖ រៀម សុខហេង