ព័ត៌មានជាតិ

សត្វស្លាបនៅបឹងស្នេហ៍ទួលពាន់តាឡី ងាប់ជាបន្តបន្ទាប់មិនដឹងមូលហេតុ

បានផុស

៥ years មុន

នៅ

ថ្ងៃចន្ទ ២២ មីនា ២០២១

ដោយ

បើយោងតាមលោក ពុធ បូ ប្រធានសហគមន៍ បឹងស្នេហ៍ ទួលពាន់តាឡី ដែលស្ថិតនៅឃុំធាយ ស្រុកបារភ្នំ ខេត្តព្រៃវែង បានប្រាប់ឲ្យដឹងថា បើគិតចាប់ពីថ្ងៃទី១៧ ខែមីនា ឆ្នាំ២០២១ ដល់ថ្ងៃទី២១ ខែមីនា ឆ្នាំ២០២១នេះ គឺមានសត្វស្លាប់ដែលរស់នៅបឹងស្នេហ៍ទួលពាន់តាឡី បានងាប់ជាបន្តបន្ទាប់ ដោយមិនដឹងពីមូលហេតុទេ។

លោកប្រធានសហគមន៍ ក៏បានបន្តទៀតថា បើតាមការសន្និដ្ឋានរបស់លោក ប្រហែលមកពីសត្វទាំងអស់នោះហើរទៅរកចំណីនៅទីឆ្ងាយ អាចប៉ះជាមួយនឹងបងប្អូនប្រជាពលរដ្ឋដែលគាត់ដាក់ថ្នាំបំពុល ឬក៏បាញ់ថ្នាំសម្លាប់ស្មៅ សម្លាប់ខ្យង នៅតាមវាលស្រែដែលសត្វទាំងអស់នេះតែងតែទៅរកចំណីអាហារនៅទីនោះហើយស៊ីរបស់ទាំងអស់នោះអាចបណ្ដាលឲ្យពុលស្លាប់ និងមួយទៀត អាចមកពីការប្រែប្រួលអាកាសធាតុ(ក្តៅខ្លាំង) ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញករណីនេះលោក ទេព ភារុន អភិបាលស្រុកបារភ្នំ បានមានប្រសាសន៍ឲ្យដឹងថា លោកបានចាត់ឲ្យមន្ត្រីបសុពេទ្យចុះពិនិត្យតាមដានមើលហើយ និងបានរាយការណ៍ជូនមន្ទីរកសិកម្មរុក្ខាប្រមាញ់ និងនេសាទខេត្តព្រៃវែង និងមន្ទីរបរិស្ថានខេត្តព្រៃវែង ឲ្យចុះមកពិនិត្យ រកមូលហេតុ នៃការងាប់សត្វទាំងនោះ ។

លោកបន្តថា ឃើញសត្វភាគច្រើនចុះមកផឹកទឹក ទំនងវាក្តៅពេកទេដឹង បានជាវាងាប់ ហើយមន្ត្រីជំនាញៗបានប្រាប់ថា គេនឹងមកចុះពិនិត្យ។ ដ្បិតយើងមិនដឹងថា វាមានមេរោគអ្វីទេ ហើយបារម្ភបំផុតនោះខ្លាច វាមានជំងឺឆ្លងពីសត្វមកមនុស្សថែមទៀតផង ។

លោក ទឹម ទេពវង្សា ប្រធានមន្ទីរទេសចរណ៍ខេត្តព្រៃវែងបានឲ្យដឹងថា លោកមិនទាន់ហ៊ានសន្និដ្ឋានថាយ៉ាងម៉េចនោះទេ ដោយរង់ចាំជំនាញពីក្រសួងបរិស្ថានចុះមកស្រាវជ្រាវ រកមូលហេតុនៃការងាប់របស់សត្វទាំងអស់នេះ។

គូរកត់សម្គាល់ថា ចាប់តាំងពីការផ្ទុះឡើងនូវការរីករាលដាល នៃជំងឺកូវីដ-១៩ ឆ្លងចូលសហគមន៍២០ កុម្ភៈ ស្ទើរតែគ្មានភ្ញៀវទេសចរណ៍ ទៅទស្សនា មើលសត្វស្លាប បឹងស្នេហ៍ នោះទេ៕

អត្ថបទ ៖ សៅគ្រី