ព័ត៌មានជាតិ

ការដ្ឋានសំណង់ ១ កន្លែង រុំព័ទ្ធរបងលើចិញ្ចើមផ្លូវ រំលោភផ្លូវអ្នកថ្មើរជើង

បានផុស

១ year មុន

នៅ

ថ្ងៃព្រហស្បតិ៍ ២០ មីនា ២០២៥

ដោយ

ការដ្ឋានសំណង់ ១ កន្លែង កំពុងតែសាងសង់ បានរុំព័ទ្ធរបងលើចំណីផ្លូវអ្នកថ្មើរជើង ជាហេតុបង្កការរំខានដល់ការធ្វើដំណើររបស់ប្រជាពលរដ្ឋនៅពេលមានរថយន្តស្ទូច ឬ ក្រឡុកស៊ីម៉ងត៍ មកម្ដងៗ តែងតែចតនៅលើផ្លូវសាធារណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងទីតាំងការដ្ឋានកំពុងសាងសង់នេះស្ថិតលើផ្លូវ ១៦០ កែងផ្លូវ ២៦៥ ក្នុងសង្កាត់ទឹកល្អក់ ២ ខណ្ឌទួលគោក រាជធានីភ្នំពេញ កំពុងបង្កការរំខានដល់ការធ្វើដំណើររបស់ប្រជាពលរដ្ឋ ជាពិសេសរំលោភលើចិញ្ចើមផ្លូវសម្រាប់អ្នកដើរថ្មើរជើង។

លោក ហៃ ជាប្រជាពលរដ្ឋ បានលើកឡើងថា ការដែលមានរថយន្តស្ទូច ឬ ក្រឡុកស៊ីម៉ងត៍ចតនៅលើផ្លូវដូច្នេះវាបង្កឲ្យមានការកកស្ទះនៅពេលប្រជាពលរដ្ឋធ្វើដំណើរច្រើន។ ម្យ៉ាងវិញទៀត បើសិនជាចំម៉ោងដែលសិស្សានុសិស្សចេញពីរៀនវាអាចធ្វើឲ្យផ្លូវមួយនេះមិនអាចធ្វើដំណើរបាន ដោយសារតែសិស្សកំពុងតែចេញពីសាលាផង រថយន្តក៏ចតនៅលើផ្លូវសាធារណៈផង។

លោកបានបន្តថា លោកតែងតែសង្កេតឃើញរថយន្តស្ទូច ឬ ក្រឡុកស៊ីម៉ងត៍ទាំងនេះ តែងតែមកចតម្ដងៗ ធ្វើឲ្យមានការកកស្ទះ ដោយសារតែពេលដែលចត គឺផ្លូវមួយនេះ នឹងរួមតូច ពិបាកដល់ប្រជាពលរដ្ឋធ្វើដំណើរ ហើយក៏អាចបង្កគ្រោះថ្នាក់ដល់អ្នកធ្វើដំណើរជាយថាហេតុ ព្រោះមើលមិនឃើញឧបសគ្គដែលមកពីមុខ។

ដោយឡែក លោក សុខ គីម ដែលជាប្រជាពលរដ្ឋ ក៏បានសំណូមពរអាជ្ញាធរពាក់ព័ន្ធ សូមមេត្តាជួយពិនិត្យមើលឡើងវិញផងចំពោះទីតាំងការដ្ឋានដែលកំពុងសាងសង់មួយនេះ និងរៀបចំឲ្យស្រួលបួលនូវការទុកដាក់គ្រឿងសំណង់ និងចតយានយន្តប្រភេទធុនធំនៅលើផ្លូវសាធារណៈ។

ពាក់ព័ន្ធបញ្ហានេះ លោក ស៊ឹម សុផង់ អភិបាលរងខណ្ឌទួលគោក បានបញ្ជាក់ថា លោកនឹងឆ្លងទៅអភិបាលខណ្ឌទួលគោក ដើម្បីត្រួតពិនិត្យមើល និងសម្រេច ត្រូវធ្វើយ៉ាងដូចម្ដេចចំពោះបញ្ហានេះ។

គួររំលឹកផងដែរថា លោកអភិសន្តិបណ្ឌិត ស សុខា បានលើកឡើងនៅក្នុងកិច្ចប្រជុំសរុបលទ្ធផលការងារអនុវត្តច្បាប់ស្ដីពីចរាចរណ៍ផ្លូវគោកឆ្នាំ ២០២៤ លើកទិសដៅការងារឆ្នាំ ២០២៥ ស្នើឲ្យរដ្ឋបាលរាជធានីភ្នំពេញកំណត់ម៉ោងរថយន្តក្រឡុកស៊ីម៉ងត៍ចាក់លើដងផ្លូវ ដើម្បីចៀសវាងការកកស្ទះ និងគ្រោះថ្នាក់។

លោកអភិសន្តិបណ្ឌិត ស សុខា ស្នើបែបនេះ ក្រោយលោកបានប្រទះឃើញមានឡានក្រឡុកស៊ីម៉ងត៍បានចាក់លើផ្លូវក្នុងខណ្ឌទួលគោកនាពេលព្រឹកដែលបណ្ដាលឲ្យមានការកកស្ទះចរាចរណ៍កាន់តែខ្លាំងនៅតំបន់នោះ៕

អត្ថបទ ៖ ម៉េង

Related Topics:ខណ្ឌទួលគោក

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា