បន្ថែម​លើកម្មករជាង ១ ម៉ឺននាក់ ក្រុមហ៊ុន​ពហុកសិកម្មនៅ​ខេត្ត​ក្រចេះ កំពុង​ត្រូវ​ការ​​កម្មករ​​រាប់រយនាក់ថែមទៀត

ក្រុមហ៊ុន ថាកូអាហ្គី្រ ស្ថិតនៅឃុំគ្រូញូងសែនជ័យ ស្រុកស្នួល ខេត្តក្រចេះ កំពុងបន្តស្វែងរកកម្មករបន្ថែមប្រមាណជាង ៥០០ នាក់ ថែម​ទៀត ខណៈ​បច្ចុប្បន្នក្រុមហ៊ុន​កំពុងដំណើរការ​ខ្សែ​សង្វាក់ផលិតកម្ម ដែល​ផ្តល់ឱកាសការងារដល់កម្មករប្រមាណជាង ១ ម៉ឺននាក់។

លោក វ៉ា ថន អភិបាលខេត្តក្រចេះ ខណៈ​ដឹកនាំគណៈប្រតិភូចុះទស្សនៈកិច្ចក្រុមហ៊ុន ថាកូអាហ្គី្រ និងតំបន់ពហុកសិកម្ម ស្ថិតនៅក្នុងស្រុកស្នួល កាលពី​ថ្ងៃទី៣០ ខែសីហា ឆ្នាំ២០២៥ បានណែនាំដល់បណ្តារោងចក្រ សហគ្រាស ដែលកំពុងជ្រើសរើសកម្មករ-និយោជិក ត្រូវសហការជាមួយមន្ទីរការងារ និងបណ្ដុះបណ្ដាលវិជ្ជាជីវៈខេត្ត ក្នុងការរៀបចំបញ្ជូនឯកសារព័ត៌មាន ឱ្យមកដល់តាមបណ្តាភូមិ-ឃុំ-ស្រុក ដើម្បីបង្កលក្ខណ:ងាយស្រួលដល់ពលរដ្ឋបានដឹងនិងអាចងាយស្រួលរើសការងារដែលចង់ធ្វើ និងអាចធ្វើបានដោយមានការជួយសម្របសម្រួលលើនីតិវិធីផ្សេងៗពីមន្ត្រីពាក់ពន្ធ័។

លោកបន្តថា បច្ចុប្បន្នខេត្តក្រចេះមានការរីកចម្រើនយ៉ាងខ្លាំង ពិសេសកំណើនក្រុមហ៊ុន រោងចក្រ សហគ្រាស ដែលគិតមកទល់ពេលនេះមាន ១១ ក្រុមហ៊ុន។ ជាក់ស្តែង ក្រុមហ៊ុន ថាកូអាហ្គី្រ បាននឹងកំពុងផ្តល់ការងារដល់កម្មករ-និយោជិកប្រមាណ ១០ ៣០៦ នាក់ និ​ងកំពុងមាន​​តម្រូវការនូវកម្លាំងពលកម្ម​រាប់រយនាក់ថែមទៀត។

ក្នុងដំណើរទស្សនៈកិច្ចខាងលើនេះអភិបាលខេត្តរួមនិងប្រតិភូបាន​ចុះពិនិត្យមើលទីតាំងចម្ការចេក -កន្លែងចិញ្ចឹមគោ -កន្លែង​ផលិតចំណីគោ -ពិនិត្យមើលសាលារៀន ជួបជាមួយលោកគ្រូអ្នកគ្រូ និងសិស្សានុសិស្ស -ពិនិត្យមើលផ្ទះកម្មករស្នាក់នៅ រួមនិងកន្លែងហូបចុកផងដែរ៕

អត្ថបទ ប្រុញ វិធិន