ក្រុងតាកែវ គ្រោង​សាងសង់ស្ថានីយចម្រោះទឹកកខ្វក់ ទីលានចាក់សំរាម និងទំនប់ការពារទឹកជំនន់

ក្រុមការងារនៃអង្គភាពគ្រប់គ្រងគម្រោង បាន​ចុះទៅ​ពិនិត្យទីតាំងគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុងនៃគម្រោង​សាងសង់​ស្ថានីយ​ចម្រោះទឹកកខ្វក់ ទីលានចាក់សំរាម និងទំនប់ការពារទឹកជំនន់ក្នុងក្រុងដូនកែវ ខេត្តតាកែវ។

លោក ហេង ណន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង ក្រោមហិរញ្ញប្បទានពីធនាគារវិនិយោគហេដ្ឋារចនាសម្ព័ន្ធអាស៊ី (AIIB) បានដឹកនាំក្រុមការងារនៃអង្គភាពគ្រប់គ្រង​ចុះពិនិត្យទីតាំងគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង នៃគម្រោងសាងសង់ស្ថានីយចម្រោះទឹកកខ្វក់ ទីលានចាក់សំរាម និងទំនប់ការពារទឹកជំនន់ ក្នុងក្រុងដូនកែវ ខេត្តតាកែវ ដោយមានការចូលរួមពី​មន្រ្តីពាក់ព័ន្ធ អភិបាលនៃគណៈអភិបាល​ខេត្តតាកែវ និងថ្នាក់ដឹកនាំមន្ទីរអង្គភាពពាក់ព័ន្ធចំណុះរដ្ឋបាលខេត្ត​។

បេសកកម្មចុះពិនិត្យនេះ ក្នុងគោលបំណងដើម្បីពិនិត្យ និងពិភាក្សាលើគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង និងសិក្សាពីទីតាំងលម្អិត នៃគម្រោងសាងសង់ស្ថានីយចម្រោះទឹកកខ្វក់ ទីលានចាក់សំរាម និងទំនប់ការពារទឹកជំនន់ ដែលស្ថិតនៅក្នុងក្រុងដូនកែវ ខេត្តតាកែវ ដែលនឹងត្រៀមរៀបចំនាពេលខាងមុខនេះ ដើម្បីធានាបាននូវការរៀបចំហេដ្ឋារចនាសម្ព័ន្ធ ប្រកបដោយប្រសិទ្ធភាព ផាសុកភាពប្រជាពលរដ្ឋ និងសោភណ្ឌភាពទីក្រុងស្អាតផងដែរ៕