Connect with us

នយោបាយ

គណបក្សយុវជនកម្ពុជា គ្រោងឃោសនាបោះឆ្នោតទ្រង់ទ្រាយធំ នៅថ្ងៃទី ២២ និង ២៩ ឧសភា

បានផុស

នៅ

គណបក្សយុវជនកម្ពុជា គ្រោងបើកយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិ​ទី ៥ ទ្រង់ទ្រាយធំ នៅថ្ងៃទី ២២ ខែឧសភា និងបិទយុទ្ធនាការនៅថ្ងៃទី ២៩ ខែឧសភា ឆ្នាំ ២០២២ខាងមុខនេះ។

លោក ពេជ្រ ស្រស់ ប្រធានគណបក្សយុវជនកម្ពុជា មានប្រសាសន៍ប្រាប់កម្ពុជាថ្មី នៅថ្ងៃទី ១៨ ខែឧសភានេះថា គណបក្សរបស់លោក ​កំពុងរៀបចំផែនការសម្រាប់ការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥នេះ ដែលនឹងត្រូវរៀបចំការឃោសនាទ្រង់ទ្រាយធំ នៅថ្ងៃទី ២២ ឧសភា និងបិទយុទ្ធនាការនៅថ្ងៃទី ២៩ ខែឧសភា។ យុទ្ធនាការទ្រង់ទ្រាយធំនេះ នឹងត្រូវធ្វើឡើងនៅរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា «ចំពោះគណបក្សយុវជនកម្ពុជា យើងកំពុងត្រៀមខ្លួនក្នុងការចូលរួម ធ្វើយុទ្ធនាការឃោសនា បោះឆ្នោតក្រុមប្រឹក្សាឃុំ-សង្កាត់ ដើម្បីស្វែងរកការគាំទ្រ ដោយយើងនឹងធ្វើពិធីហែរក្បួនឃោសនាធំ នៅថ្ងៃទី ២២ និងបិទនៅថ្ងៃទី ឧសភា ២៩ខាងមុខនេះ ហើយនឹងរៀបចំមានម៉ូតូ និងឡាន ដើម្បីចូលរួមធ្វើយុទ្ធនាការ ឃោសនាបោះឆ្នោត»។

ទោះបីជាយ៉ាងណាលោក ពេជ្រ​ ស្រស់ មិនទាន់អាចបញ្ជាក់អំពីចំនួនសមាជិក-សមាជិកា ដែលនឹងត្រូវចូលរួម និងចំនួនរថយន្ត-ម៉ូតូ ប៉ុន្មាននៅឡើយទេ ដោយថា នឹងត្រូវប្រជុំដាក់ផែនការក្នុងពេលឆាប់ៗនេះសិន។ ជាមួយគ្នានេះ ប្រធានគណបក្សយុវជនកម្ពុជា ក៏បានបញ្ជាក់ដែរថា គណបក្សរបស់លោក នឹងណែនាំដល់សមាជិក-សមាជិកា ដែលចូលរួមឃោសនាបោះឆ្នោតទាំងអស់ ត្រូវចូលរួមបង្ការទប់ស្កាត់ការឆ្លងរាលដាលជំងឺកូវីដ-១៩ ទោះបីក្នុងរយៈពេលប៉ុន្មានថ្ងៃនេះ មិនមានករណីឆ្លងក៏ដោយ។ ម្យ៉ាងទៀត គណបក្សរបស់លោក ក៏នឹងណែនាំដល់សមាជិក-សមាជិកាទាំងអស់ ត្រូវគោរពអនុវត្តតាមសេចក្ដីណែនាំរបស់ គ.ជ.ប ពាក់ព័ន្ធនឹងការឃោសនាបោះឆ្នោតនេះ ផងដែរ។

សូមជម្រាបថា ការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥ នឹងត្រូវធ្វើឡើងចាប់ពីថ្ងៃទី ២១ ខែឧសភា ដល់ថ្ងៃទី ៣ ខែមិថុនា ឆ្នាំ ២០២២។ ចំណែក​ឯការបោះឆ្នោត នឹងត្រូវធ្វើឡើងនៅថ្ងៃទី ៥ ខែមិថុនា ឆ្នាំ ២០២២ ដោយមានគណបក្សនយោ​បាយចំនួន ១៧ បានដាក់បេក្ខជនឈរឈ្មោះ ចូលរួមប្រកួតប្រជែង៕

អត្ថបទ៖ ឃួន សុភ័ក្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម