អគ្គិភ័យឆាបឆេះឃ្លាំងចំនួន ៣ ខូចខាតធ្ងន់ធ្ងរ នៅខណ្ឌសែនសុខ

ភ្នំពេញ ៖ អគ្គិភ័យមួយបានឆាបឆេះយ៉ាងសន្ធោសន្ធៅ លើឃ្លាំងតំឡើងគ្រឿងតុបតែងឆាក និងកម្មវិធី បណ្ដាលឱ្យរាលដាលទៅឃ្លាំងជាប់គ្នា សរុបចំនួន៣ឃ្លាំង ក្នុងនោះឃ្លាំង២ត្រូវបានបំផ្លាញខូចខាតទាំងស្រុង ខណៈមានម៉ូតូចំនួន៣គ្រឿង និងរថយន្ត៣គ្រឿង ត្រូវបានឆេះអស់ផងដែរ។

ហេតុការណ៍នេះបានកើតឡើងនៅវេលាម៉ោង ៦ និង ២០ នាទីល្ងាច ថ្ងៃទី៦ ខែមីនា ឆ្នាំ២០២៦ នៅចំណុចដីឡូត៍ B01 ផ្លូវបេតុង ១ឧសភា ស្ថិតក្នុងភូមិច្រេស សង្កាត់គោកឃ្លាង ខណ្ឌសែនសុខ រាជធានីភ្នំពេញ។

តាមប្រភពពីប្រជាពលរដ្ឋរស់នៅក្បែរទីតាំងកើតហេតុ បានឱ្យដឹងថា មុនពេលកើតហេតុ គេបានឮសំឡេងផ្ទុះមួយ ចេញពីផ្នែកខាងត្បូងនៃឃ្លាំង ហើយបន្តិចក្រោយមក ក៏មានអណ្តាតភ្លើងឆាបឆេះឡើងភ្លាមៗ។ កម្មករនៅក្នុងឃ្លាំងបានព្យាយាមយកបំពង់ពន្លត់អគ្គិភ័យមកបាញ់ ប៉ុន្តែមិនអាចគ្រប់គ្រងបាន។

ប្រភពដដែលបានបន្តថា អណ្តាតភ្លើងបានឆាបឆេះកាន់តែខ្លាំង ដោយសារតែសម្ភារៈនៅក្នុងឃ្លាំងភាគច្រើនជារបស់ងាយឆេះ ដូចជា ជ័រ ក្តារ កាវ និងសារធាតុឆាបឆេះផ្សេងៗទៀត។

បន្ទាប់មក ប្រជាពលរដ្ឋបានរាយការណ៍ទៅអាជ្ញាធរមូលដ្ឋាន និងស្នើសុំជំនួយពីរថយន្តពន្លត់អគ្គិភ័យ។ ក្នុងហេតុការណ៍នេះ ក៏មានវត្តមានអភិបាលខណ្ឌសែនសុខ អធិការនគរបាលខណ្ឌ និងកម្លាំងសមត្ថកិច្ចជាច្រើនចេញជួយអន្តរាគមន៍ផងដែរ។

ក្រោយទទួលព័ត៌មាន រថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញ បានចេញអន្តរាគមន៍ភ្លាមៗ ហើយក៏មានការចូលរួមពីរថយន្តជំនួយរបស់ក្រុមហ៊ុនឯកជន និងកងរាជអាវុធហត្ថរាជធានីភ្នំពេញផងដែរ។ យ៉ាងណាក៏ដោយ រហូតដល់ម៉ោងប្រមាណ ៩ និង ៣០ នាទីយប់ថ្ងៃដដែល អគ្គិភ័យនៅមិនទាន់ត្រូវបានគ្រប់គ្រងឱ្យរលត់បានទាំងស្រុងនៅឡើយ។

ចំពោះការខូចខាត ជំហានបឋម បានបញ្ជាក់ថា ឃ្លាំង២ក្នុងចំណោម៣ឃ្លាំង ត្រូវបានបំផ្លាញទាំងស្រុង ខណៈរថយន្ត៣គ្រឿង និងម៉ូតូ៣គ្រឿង ត្រូវបានឆេះអស់។ មូលហេតុបឋមត្រូវបានសង្ស័យថា បណ្តាលមកពីការខូចខាតប្រព័ន្ធអគ្គិសនី (ទុស្សេរ)។

បច្ចុប្បន្ន អាជ្ញាធរកំពុងបន្តស្រាវជ្រាវ ដើម្បីកំណត់មូលហេតុពិតប្រាកដ និងវាយតម្លៃការខូចខាតបន្ថែម៕

អត្ថបទ សំណាង