ឱ្យតែស្រវឹងប្រើហិង្សា ណែនាំមិនស្ដាប់ ប៉ូលិសចាប់ប្ដីបញ្ជូនទៅសាលាដំបូង

ខេត្តរតនគិរី៖ បុរសជាប្តីបានប្រើអំពើហិង្សាក្នុងគ្រួសារវាយប្រពន្ធនឹងអង្គត់ឧស បណ្តាលឱ្យបែកក្បាលរងរបួសធ្ងន់ ត្រូវបាន អធិការដ្ឋានគរបាលស្រុកអណ្ដូងមាស កសាងសំណុំរឿងបញ្ជូនទៅ អយ្យការអមសាលាដំបូងខេត្ត នៅ ថ្ងៃទី ១៧ ខែធ្នូ ឆ្នាំ ២០២១ នេះ។ ករណីនេះបានកើតឡើង នៅ ចំណុចខ្ទមចាំចម្ការរបស់ជនរងគ្រោះ ស្ថិតនៅ ភូមិតាំងសេ ឃុំញ៉ាងស្រុកអណ្ដូងមាស។

លោក សោម ចាន់ណារ៉ា អធិការនគរបាលស្រុកអណ្តូងមាស បានឱ្យ “កម្ពុជាថ្មី” ដឹងនៅ ថ្ងៃទី ១៧ ខែធ្នូនេះថា ក្រោយពីលោកបានទទួលពាក្យបណ្តឹងរបស់ជនរងគ្រោះ កម្លាំងជំនាញបានសហការ ជាមួយកម្លាំងប៉ុស្តិ៍រដ្ឋបាលឃុំញ៉ាង និងប្រជាការពារភូមិ បានចុះទៅ ដល់កន្លែងកើតហេតុ ក្នុងនោះដោយមានការសម្របសម្រួលនីតិវិធីពី លោក មុត សម្បត្តិ ព្រះរាជអាជ្ញារងអមសាលាដំបូងខេត្ត។

លោកបានឱ្យដឹងបន្ថែមថា សមត្ថកិច្ចបានឃាត់ខ្លួនជនបង្កឈ្មោះ អែម សុជាតិ ភេទប្រុស អាយុ ៤២ ឆ្នាំ ជនជាតិខ្មែរ មុខរបរកសិករ មានស្រុកកំណើតនៅ ភូមិសន្ទិជ ឃុំដងក្តារ ស្រុកស្ទឹងត្រង ខេត្តកំពង់ចាម បច្ចុប្បន្នរស់នៅ ទីតាំងខាងលើ។

ឈ្មោះ អែម សុជាតិ បានវាយប្រពន្ធនឹងអង្គត់ឧសចំក្បាល បណ្តូលឱ្យបែកហូរឈាមជាច្រើន។ ជនបង្កនេះ ឱ្យតែស្រវឹង គឺមានការគំរាមកំហែង និងបង្កហិង្សា លុះពេលអ្នកជិតខាងហាមឃាត់ បែរជាវាយតប់គេទៀត និងធ្លាប់ទទួលការអប់រំពីមេភូមិចាស់ទុំ ព្រមទាំងធ្វើកិច្ចសន្យានៅ រដ្ឋបាលប៉ុស្តីម្តងរួចមកហើយ ប៉ុន្តែមិនរាងចាលឡើយ។

លោកអធិការបញ្ជាក់ទៀតថា ជនរងគ្រោះឈ្មោះ សល់ កេង អាយុ ៣២ ឆ្នាំ ជនជាតិច្រាយ មុខរបរកសិករ។

បច្ចុប្បន្ន ជនបង្កត្រូវបានឃាត់ខ្លួនបណ្ដោះអាសន្ននៅ អធិការដ្ឋានគរបាលស្រុក ដើម្បីធ្វើការសាកសួរ និងកសាងសំណុំរឿងបញ្ជូនទៅ អយ្យការអមសាលាដំបូងខេត្ត នៅ ថ្ងៃទី ១៧ ខែធ្នូ ឆ្នាំ ២០២១ នេះ៕

អត្ថបទ៖ វុទ្ធឦសាន