មន្ត្រីសុខាភិបាល បំភ្លឺច្បាស់ៗ ករណី ពេទ្យយកសពទារកក្នុងផ្ទៃដោយទាំងពោះវៀន ស្លាប់ទាំងម្ដាយ

មានការផ្សាយព័ត៌មាន និងចែករំលែកតៗគ្នាតាមបណ្ដាញសង្គម អំពី ករណី​ស្ត្រីដែលកូនស្លាប់ក្នុងពោះហើយបានទៅមន្ទីសម្រាកព្យាបាល​ នៅមន្ទីរសំរាកព្យាបាល និងសម្ភព ដើមអង្ក្រង នៅ ផ្សារព្រៃទទឹង ក្នុងខេត្តកំពង់ស្ពឺ ហើយត្រូវបានពេទ្យកាយយកសាកសពកូន កាយដោយទាំងពោះវៀនស្ត្រីអ្នកជំងឺចេញមកក្រៅ ដោយច្រទ្បំថា ជាទងសុក កាត់ខ្ទេចខ្ទីអស់ បណ្តាលឱ្យស្លាប់បាត់បង់ជីវិត​ បង្កឱ្យមានការភ្ញាក់ផ្អើល និងអាណិតអាសូរពេញបណ្ដាញសង្គម។

“កម្ពុជាថ្មី” បានទាក់ទង ប្រភពគួរទុកចិត្តបាន ដើម្បីបំភ្លឺករណីខាងលើនេះ។

លោក ហុក គ្រី ប្រធានមន្ទីរសុខាភិបាលខេត្តកំពង់ស្ពឺ បញ្ជាក់ប្រាប់ “កម្ពុជាថ្មី” នៅរសៀលនេះថា នៅព្រឹកថ្ងៃទី២៩ ខែវិច្ឆិកា ឆ្នាំ២០២២នេះ ក្រុមការងារមន្ទីរសុខាភិបាល សហការជាមួយនឹងក្រុមការងាររបស់ក្រសួងសុខាភិបាល បានចុះទៅពិនិត្យគ្លីនិកមួយកន្លែងដែលមានទីតាំងនៅ តាមបណ្ដោយផ្លូវជាតិលេខ៣ ឃុំព្រះនិព្វាន ស្រុកគង់ពិសី ខេត្តកំពង់ស្ពឺ។

ករណីអ្នកជំងឺឈ្មោះ សឿន ស្រីអូន ភេទស្រី អាយុ ២២ ឆ្នាំ អាសយដ្ឋាន ភូមិអន្លង់រមៀត ឃុំអន្លង់រមៀត ស្រុកកណ្ដាលស្ទឹង ខេត្តកណ្ដាល។ បានចូលមកសម្រាកនៅ គ្លីនិកដើមអង្គ្រង នៅថ្ងៃទី១០ ខែវិច្ឆិកា ឆ្នាំ២០២២ ដោយរោគវិនិច្ឆ័យ កូនស្លាប់ក្នុងស្បូន អាយុ ១៨ សប្តាហ៍។ ក្រុមគ្រូពេទ្យរបស់គ្លីនិកបានធ្វើការព្យាបាលដោយ រំលូតយកកូនដែលស្លាប់ក្នុងផ្ទៃចេញ និងបន្តសម្រាកនៅគ្លីនិក រយៈពេលមួយយប់ ហើយបានចេញពី គ្លីនិកដើមអង្គ្រង នៅថ្ងៃទី១១  ខែវិច្ឆិកា ឆ្នាំ២០២២។

លោក ហុក គ្រី បានឱ្យដឹងបន្ថែមថា នៅថ្ងៃទី២២ ខែវិច្ឆិកា ឆ្នាំ២០២២ ស្ត្រីអ្នកជំងឺបានមកគ្លីនិកដដែលម្ដងទៀត ដោយរោគសញ្ញាឈឺពោះខ្លាំងនៅផ្នែកខាងក្រោម។ គ្រូពេទ្យក៏បានធ្វើការសំអាតស្បូនឡើងវិញ។ ដោយអាការៈធ្ងន់ធ្ងរ គ្លីនិកក៏បានបញ្ជូនស្ត្រីអ្នកជំងឺទៅព្យាបាលបន្តនៅទីក្រុងភ្នំពេញ។

លោកប្រធានមន្ទីរសុខាភិបាលខេត្តកំពង់ស្ពឺ បញ្ជាក់ថា តាមប្រភពព័ត៌មានតាមបណ្ដាញសង្គមដែលថាស្ត្រីបានស្លាប់ ប៉ុន្តែការពិតស្ត្រីនៅមានជីវិតនៅឡើយទេ។ បច្ចុប្បន្នស្ត្រីអ្នកជំងឺខាងលើ កំពុងសម្រាកព្យាបាលផ្នែកសង្គ្រោះបន្ទាន់ នៅមន្ទីរពេទ្យកាល់ម៉ែត្រ រាជធានីភ្នំពេញ។
លោក ហុក គ្រី បញ្ជាក់បន្ថែមថា ទាក់ទងព័ត៌មានករណីនេះ ក្រុមការងារបានសួរ និងទទួលពីខាងគ្លីនិកដើមអង្ក្រង។ ចំណែកករណីថា កាត់ពោះវៀន ឬមិនកាត់នោះ គឺក្រុមការងារនៅស្រាវជ្រាវបន្តទៀត ដោយខាងគ្លីនិក បានឱ្យដឹងថា បានបញ្ជូនស្រ្តីអ្នកជំងឺទៅព្យាបាលបន្តនៅភ្នំពេញ នៅពេទ្យជប៉ុន ពេទ្យធំ ពេទ្យកាល់ម៉ែត៕