ស្លាប់ ១ របួស ៧ នាក់ ក្នុងហេតុការណ៍ក្រឡាប់រថយន្តដឹកអ្នកដំណើរនៅភូមិឃ្លាំងមឿង

យ៉ាងហោចណាស់មនុស្សម្នាក់ បានស្លាប់បាត់បង់ជីវិត និង០៧ នាក់ផ្សេងទៀតរងរបួសធ្ងន់ស្រាល នៅក្នុងហេតុការណ៍ក្រឡាប់រថយន្តToyota ដឹកអ្នកដំណើរ។ ហេតុការណ៍នេះ បានកើតឡើងនៅវេលាម៉ោង ៤៖៣០ រសៀលថ្ងៃទី ០១ ខែកញ្ញា ស្ថិតនៅផ្លូវជាតិលេខ ០៥ ចំនុចផ្លូវកោង ស្ថិតក្នុងភូមិឃ្លាំងមឿង ឃុំអន្លង់ត្នោត ស្រុកក្រគរ ខេត្តពោធិ៍សាត់។

សាក្សីនៅកន្លែងកើតហេតុបានឱ្យដឹងថា ពេលមេឃកំពុងរលឹមរថយន្ដម៉ាក Toyotaពណ៌ស បានដឹកអ្នកដំណើរដោយ បើកបររថយន្តពីទិសខាងលិចទៅខាង កើតក្នុងល្បឿនលឿន លុះមកដល់ចំណុចកើតហេតុផ្លូវកោង ក៏បានរអិលរយន្តក្រឡាប់ជ្រុលទៅបុកខឿន និង បោកផ្ទុបបង្គោលភ្លើងបំភ្លឺផ្លូវ បណ្ដាលឲ្យមនុស្សប្រុសស្រីចំនួន០៨នាក់នោះរបួសធ្ងន់ និងស្រាលរណូករណែលពេញផ្លូវតែម្ដង។

លោក មោក ភារម្យ អធិការស្រុកក្រគរបានឲ្យដឹងថា ក្រោយពេលកើតហេតុភ្លាមៗលោកបានដឹកនាំកម្លាំងនគរបាលចរាចរណ៍ស្រុកមកដល់កន្លែងកើតហេតុហើយវត្តមានលោកអភិបាលខេត្តពោធិ៍សាត់ក៍បានចុះជួយ និងអន្តរាគមន៍ផ្ទាល់ដល់ជនរងគ្រោះ ដឹកតាមរថយន្តសង្រ្គោះទៅកាន់មន្ទីពេទ្យដោយអ្នករបួសធ្ងន់ទៅមន្ទីពេទ្យខេត្ត និងអ្នករបួសស្រាលបញ្ជូនទៅមណ្ឌលសុខភាពស្រុកក្រគរ ហើយ​ជនរងគ្រោះទាំង ០៨ នាក់ផ្នែកជំនាញកំចុះស្រង់អត្តសញ្ញាណរបស់ពួកគាត់ ដោយឡែកអ្នកបើកបរបានរត់គេចខ្លួន ខាងជំនាញយើងកំពុងធ្វើកិច្ចការនេះ៕

អត្ថបទ៖ លាន គ្រន