ព័ត៌មានជាតិ

ប្រធានក្រុមការងារ ស.ផ.ក ប្ដេជ្ញានឹងបង្កើនការផ្សព្វផ្សាយច្បាប់ស្ដីពីចរាចរណ៍ ដល់អ្នកដឹកកម្មករ និងកម្មករ-និយោជិត

បានផុស

១២ ខែ មុន

នៅ

ថ្ងៃពុធ ១៦ កក្កដា ២០២៥

ដោយ

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ-និយោជិត (ស.ផ.ក) បានបង្ហាញពីការប្តេជ្ញាចិត្តថានឹងបង្កើនការផ្សព្វផ្សាយច្បាប់ស្ដីពីចរាចរណ៍ផ្លូវគោកដល់អ្នកដឹកកម្មករ និងកម្មករ-និយោជិត ដើម្បីចូលរួមកាត់បន្ថយគ្រោះថ្នាក់ចរាចរណ៍មកនៅកម្រិតទាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិតបានបន្តថា ការបង្កើនការអប់រំផ្សព្វផ្សាយច្បាប់ស្តីពី “ចរាចរណ៍ផ្លូវគោក” ជូនដល់អ្នកបើកបរយានយន្តដឹកកម្មករ-និយោជិតនេះ ដើម្បីបង្កើនការយល់ដឹងចូលរួមកាត់បន្ថយអត្រាគ្រោះថ្នាក់ចរាចរណ៍មកនៅកម្រិតទាប និងធ្វើឱ្យកម្មករ-និយោជិត ទទួលបាននូវផាសុកភាព និងសុវត្ថិភាព ក្នុងការធ្វើដំណើរទៅមកធ្វើការប្រចាំថ្ងៃ។

លោកបណ្ឌិតបានបន្តទៀតថា គិតត្រឹមឆមាសទី ១ ឆ្នាំ ២០២៥ នេះ ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ-និយោជិត នៃបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ បានចុះផ្សព្វផ្សាយច្បាប់ស្ដីពីចរាចរណ៍ផ្លូវគោក សុវត្ថិភាពក្នុងការធ្វើដំណើរ និងសុវត្ថិភាពលើមធ្យោបាយដឹកជញ្ជូន ជូនដល់អ្នកបើកបរយានយន្តដឹកកម្មករ-និយោជិត និងកម្មករ-និយោជិតបានចំនួន ១៦៣ លើក ដោយមានអ្នកចូលរួម ៤៥ ៤៥១ នាក់ ក្នុងនោះ ស្រី ៣៥ ៤៥៣ នាក់។

លោកបណ្ឌិតបានលើកឡើងថា ស្ថានភាពគ្រោះថ្នាក់ចរាចរណ៍ផ្លូវគោករបស់កម្មករ-និយោជិត ឆមាសទី ១ ឆ្នាំ ២០២៥ ករណីគ្រោះថ្នាក់ចរាចរណ៍កើតឡើងលើកម្មករ-និយោជិតមានចំនួន ២ ៣០៩ ករណី ជនរងគ្រោះសរុប ២ ៩៧៧ នាក់ ស្រី ១ ៦៩១ នាក់ ក្នុងនោះ ស្លាប់ ៩០ នាក់ រងរបួសធ្ងន់ ៩១២ នាក់ និងរងរបួសស្រាល ១ ៩៧៥ នាក់។

លោកបណ្ឌិតបានបន្តថា ក្នុងចំណោមករណីគ្រោះថ្នាក់លើរថយន្តដឹកទំនិញគ្រោះថ្នាក់ចំនួន ៤ ករណី ជនរងគ្រោះសរុប ៩៤ នាក់ ស្រី ៨៦ នាក់ ក្នុងនោះ ស្លាប់ ១ នាក់ រងរបួសធ្ងន់ ១១ នាក់ និងរងរបួសស្រាល ៨២ នាក់។

លោកបណ្ឌិតបានបន្តទៀតថា មានកត្តាសំខាន់មួយចំនួនដែលជំរុញឱ្យមានករណីគ្រោះថ្នាក់ចរាចរណ៍កើតឡើង ក្នុងនោះ រួមមាន បើកបរលើសល្បឿនកំណត់ មិនប្រកាន់ស្តាំ (បញ្ច្រាសទិស) កត្តាមិនគោរពសិទ្ធិអាទិភាព ការបត់មិនត្រឹមត្រូវ និងកត្តាយានយន្ត។

លោកបណ្ឌិត បានធ្វើការអំពាវនាវដល់កម្មករ-និយោជិត ទាំងអស់ មេត្តាបង្កើនការប្រុងប្រយ័ត្នឱ្យបានខ្ពស់ក្នុងការធ្វើដំណើរ ទាំងអ្នកធ្វើដំណើរដោយម៉ូតូ និងទាំងអ្នកធ្វើដំណើរដោយរថយន្តដឹកកម្មករ-និយោជិត ត្រូវគោរពច្បាប់ស្ដីពីចរាចរណ៍ផ្លូវគោក ដើម្បីចៀសវាងករណីគ្រោះថ្នាក់ជាយថាហេតុ និងក្រើនរំលឹកទៅកាន់អ្នកបើកបររថយន្តដឹកកម្មករ-និយោជិត ទាំងអស់ ត្រូវមានស្មារតីទទួលខុសត្រូវខ្ពស់ និងយកចិត្តទុកដាក់រាល់ពេលបើកបរផងដែរ៕

អត្ថបទ ៖ សំអឿន