ចរាចរណ៍

នគរបាលចរាចរណ៍ក្រុងតាខ្មៅ ចាប់ផាកពិន័យម៉ូតូល្មើសច្បាប់ចំនួន ១២ គ្រឿង

បានផុស

១២ ខែ មុន

នៅ

ថ្ងៃអង្គារ ៨ កក្កដា ២០២៥

ដោយ

នគរបាលចរាចរណ៍ក្រុងតាខ្មៅ ឃាត់ចាប់ម៉ូតូចំនួន ១២ គ្រឿង ដើម្បីផាកពិន័យតាមច្បាប់ចរាចរណ៍ ក្រោយសង្កេតឃើញថា ពលរដ្ឋមួយចំនួនធំនៅតែល្មើសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីព្រឹកថ្ងៃទី ៨ ខែកក្កដា ឆ្នាំ ២០២៥ នេះ កម្លាំងផ្នែកចរាចរណ៍បានដាក់គោលដៅត្រួតពិនិត្យច្បាប់ចរាចរណ៍ផ្លូវគោកនៅចំណុចស្តុបស្ថានីយប្រេងឥន្ធនៈ កាល់តិច ដើម្បីត្រួតពិនិត្យច្បាប់ចរាចរណ៍ផ្លូវគោក ស្ថិតក្នុងសង្កាត់ព្រែកឫស្សី ក្រុងតាខ្មៅ ខេត្តកណ្តាល។

លោកវរសេនីយ៍ឯក យី វណ្ណដា អធិការ នៃអធិការដ្ឋាននគរបាលក្រុងតាខ្មៅ បានឲ្យដឹងថា កម្លាំងផ្នែកចរាចរណ៍ នៃអធិការដ្ឋាននគរបាលក្រុងតាខ្មៅ បានបន្តអនុវត្តច្បាប់ចរាចរណ៍ផ្លូវគោកឲ្យដូចភ្លៀងរលឹម ហើយដោយសង្កេតឃើញថា ពលរដ្ឋមួយចំនួនធំ នៅតែមិនទាន់យល់ពីច្បាប់ចរាចរណ៍ផ្លូវគោក បន្តល្មើសជិះម៉ូតូមិនពាក់មួកសុវត្ថិភាពស្ទើរតែរាល់ថ្ងៃ នៅចំណុចស្តុបស្ថានីយប្រេងឥន្ធនៈ កាល់តិច ទើបលោកបានចាត់កម្លាំងដាក់ស្ទាក់ចាប់ ដើម្បីធ្វើការផាកពិន័យតាមផ្លូវច្បាប់ចរាចរណ៍ដែលបានចែងទុក។

លោកបន្តថា ជាក់ស្ដែងជាលទ្ធផល កម្លាំងនគរបាលចរាចរណ៍ក្រុងតាខ្មៅ បានស្ទាក់ចាប់ និង ផាកពិន័យម៉ូតូល្មើសច្បាប់ចរាចរណ៍ចំនួន ១២ គ្រឿង ហើយចេញវិក័យប័ត្រឲ្យយកទៅបង់ដោយខ្លួនឯង ក្នុងនោះ សុទ្ធតែមិនពាក់មួកសុវត្ថិភាពទាំងអស់។

លោកអធិការក្រុងតាខ្មៅ បានអំពាវនាវ ក៏ដូចជាសំណូមពរទៅកាន់ប្រជាពលរដ្ឋបើកបរម៉ូតូ និង បើកបររថយន្តទាំងអស់ ត្រូវគោរពច្បាប់ចរាចរណ៍ឲ្យបានគ្រប់ៗ គ្នា ដើម្បីសុវត្ថិភាព និងជាការជួយកាត់បន្ថយគ្រោះថ្នាក់ចរាចរណ៍ដល់អាយុជីវិតណាមួយកើតឡើង៕

អត្ថបទ ៖ រដ្ឋា