UPDATE: បុរសបាញ់នារីនៅខណ្ឌសែនសុខ ជាមេធាវី និងធ្លាប់ប្រុងទៅលោតទឹកនៅស្ពានកោះនរា

លោក ជួន ណារិន្ទ ស្នងការនគរបាលរាជធានីភ្នំពេញ បានឱ្យដឹងថា បុរសដែលបានបាញ់សម្លាប់នារីម្នាក់ នៅសង្កាត់ភ្នំពេញថ្មី ខណ្ឌសែនសុខ គឺប្រកបវិជ្ជាជីវៈមេធាវី។

តាមលោក ជួន ណារិន្ទ បុរសដែលបាញ់នារីរងគ្រោះ​មានឈ្មោះថាទូច វឌ្ឍនៈ ចំណែកឯនារីរងគ្រោះឈ្មោះ អែម សុវីដេត មានវ័យ២៦ឆ្នាំ ជាអ្នកលក់អនឡាញ។ បុគ្គលឈ្មោះ ទូច វឌ្ឍនៈ បានប្រើប្រាស់កាំភ្លើងខ្លីម៉ាក CZp07។ ក្រោយកើតហេតុសមត្ថកិច្ចបានរកឃើញសំបកគ្រាប់ចំនួន៥។

បើតាមប្រភពពីកន្លែងកើតហេតុ នៅមុនពេលកើតមានករណីនេះ ពោលគឺកាលប៉ុន្មានខែមុនបុរសជាមេធាវីរូបនេះ ធ្លាប់ប៉ុនប៉ងទៅលោតទឹកស្លាប់ខ្លួននៅស្ពានកោះនរាបង្កជាការភ្ញាក់ផ្អើលម្ដងរួចមកហើយ។

តាមលោក ជួន ណារិន្ទ ករណីនេះ គឺកើតឡើង នៅវេលាម៉ោង៨ ៖ ៤០នាទីយប់ថ្ងៃទី ០៨ ខែកុម្ភៈ ឆ្នាំ២០២៤ នៅតាមផ្លូវ១៩៦៦ ភូមិទំនប់ សង្កាត់ភ្នំពេញថ្មី ខណ្ឌសែនសុខ៕