អ្នកសមគំនិតលាក់បាំងក្រុមក្មេងទំនើង និងមុខសញ្ញាប្រព្រឹត្តបទល្មើស នឹងត្រូវអនុវត្តតាមច្បាប់

មានប្រសាសន៍ក្នុងសន្និសីទសារព័ត៌មាននៅស្នងការដ្ឋាននគរបាលរាជធានីភ្នំពេញ នាព្រឹកថ្ងៃទី១៩ ខែមិថុនា ឆ្នាំ២០២៤ លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ បានលើកឡើងថា កម្លាំងសមត្ថកិច្ចនឹងអនុវត្តតាមវិធានការច្បាប់ដែលមានចែង ប្រសិនបើរកឃើញថា មានការសមគំនិតលាក់បាំងក្រុមជនសង្ស័យ និងក្រុមក្មេងទំនើង ឬមុខសញ្ញាដែលប្រព្រឹត្តបទល្មើស។

លោកឧត្ដមសេនីយ៍ឯក ជួន ណារិន្ទ ក៏បានស្នើឲ្យម្ចាស់ផ្ទះជួល និងម្ចាស់ផ្ទះសំណាក់ត្រូវសហការជាមួយអាជ្ញាធរមូលដ្ឋានប្រសិនបើមានក្រុមក្មេងទំនើង ព្រោះក្រុមក្មេងទំនើងនេះ គឺជាក្រុមរំខាននៅក្នុងសង្គមដែលធ្វើឲ្យប៉ះពាល់ដល់ប្រជាពលរដ្ឋ និងភ្ញៀវទេសចរមួយចំនួនមិនសប្បាយចិត្ត ខណៈដែលប្រទេសកម្ពុជាកំពុងអភិវឌ្ឈន៍ពីមួយថ្ងៃទៅមួយថ្ងៃកសាងហេថារចនាសម្ព័ន្ធដើម្បីទទួលអ្នកវិនិយោគ និងទេសចរណ៍បរទេស។ លោកស្នងការរាជធានីសង្កត់ធ្ងន់ថា ក្រុមក្មេងទំនើងនេះ គឺត្រូវតែបង្ក្រាបម្ដងបន្តិចៗ និងឲ្យដាច់ដល់ឬសគល់តែម្ដង។

ពាក់ព័ន្ធបញ្ហាក្មេងទំនើងនេះដែរ លោក​ឧត្ដមសេនីយ៍ឯក ជួន ណារិន្ទ ក៏ធ្លាប់ពំពាវនាវផងដែរកាលពីថ្ងៃទី២៣ ខែឧសភាកន្លងទៅដល់សិស្សសាលាមួយចំនួនឲ្យដកខ្លួនចេញ ហើយក៏ធ្លាប់ធ្វើវេទិការសាធារណៈផ្សព្វផ្សាយរួចមកហើយដែរ។ លោកស្នងការសង្កត់ធ្ងន់ថា លោកមិនអនុញ្ញាតិឲ្យក្រុមក្មេងទំនើងនេះមានសកម្មភាពផ្គើនលើកម្លាំងសមត្ថកិច្ច និងផ្គើនលើប្រសាសន៍របស់ប្រមុខថ្នាក់ដឹកនាំឡើយ ដោយលោកនឹងបញ្ចាកម្លាំងជំនាញចុះស្រាវជ្រាវតាមចាប់ក្រុមក្មេងទំនើងនេះនៅគ្រប់២៤ខេត្ត ក្នុងនាមជាអគ្គស្នងការរងនគរបាលជាតិ៕

អត្ថបទ៖ សុខុម