អ្នកនាំពាក្យ៖ សមត្ថកិច្ចនៅតែបន្តពង្រាយកម្លាំងដើម្បីគ្រប់គ្រងសភាពការណ៍ពីក្រុមប្រឆាំងជ្រុលនិយមដែលចង់ចូលរួមធ្វើបាតុកម្ម

លោកឧត្ដមសេនីយ៍ឯក ឆាយ គឹមឃឿន អ្នកនាំពាក្យអគ្គស្នងការដ្ឋាននគរបាលជាតិ បានឲ្យដឹងនៅព្រឹកថ្ងៃទី២០សីហា នេះថា កម្លាំងសមត្ថកិច្ចនៅតែបន្តដាក់ពង្រាយនៅតាមគោលដៅសំខាន់ៗមួយចំនួនដើម្បីគ្រប់គ្រង់សភាពការណ៍ពីក្រុមប្រឆាំងជ្រុលនិយមដែលចង់ប្រមូលផ្ដុំធ្វើបាតុកម្មប៉ុនប៉ងផ្ដួលរំលំរាជរដ្ឋាភិបាល។ លោកបន្ថែមថា កម្លាំងសមត្ថកិច្ចគឺនៅតែបន្តដាក់ប្រចាំការជារៀងរាល់ថ្ងៃដើម្បីគ្រប់គ្រងសភាពការណ៍ ហើយនៅព្រឹកថ្ងៃទី២០សីហានេះ សមត្ថកិច្ចក៏បានដាក់កម្លាំងបន្ថែមទៀតផងដែរ។

ដោយឡែកក្រុមជនសង្ស័យដែលត្រូវបានឃាត់ខ្លួនកាលពីថ្ងៃទី១៨សីហាកន្លងទៅនៅខាងមុខព្រះបរមរាជវាំង គឺមានមួយចំនួនកំពុងតែអនុវត្តនីតិវិធីបន្ថែម និងមួយចំនួនទៀតនឹងបញ្ជូនទៅតុលាការបើសិនមានដីកាពីតុលាការ តែទោះបីយ៉ាងណា លោកមិនទាន់បញ្ជាក់ថា ចំនួនប៉ុន្មាននាក់នោះទេ។

សូមជម្រាបថា កាលពីថ្ងៃទី១៨ សីហា ឆ្នាំ២០២៤ កម្លាំងសមត្ថកិច្ចបានឃាត់ខ្លួនក្រុមប្រឆាំងជ្រុលនិយមសរុប៣១នាក់ ក្នុងនោះមានស្រី២នាក់ ដើម្បីយកទៅសួរនាំបន្ទាប់ពីពួកគេព្យាយាមប្រមូលផ្ដុំគ្នានៅមុខព្រះបរមរាជវាំងធ្វើបាតុកម្មប៉ុនប៉ងផ្ទួលរំលំរាជរដ្ឋាភិបាលស្របច្បាប់។ ក្នុងប្រតិបត្តការឃាត់ខ្លួនក្រុមប្រឆាំងជ្រុលនិយមនេះ កម្លាំងបានដកហូតបាននូវសម្ភារ និងវត្ថុតាងមួយចំនួនមានដូចជា ដបសាំង កាំបិតស្នៀត ស្នាប់ដៃ ដំបង ជំពាមកៅស៊ូ និងគ្រាប់ដែក សម្រាប់ធ្វើសកម្មភាពប្រឆាំងតបតជាមួយសមត្ថកិច្ច។ ជនទាំងនោះ កំពុងស្ថិតក្នុងការគ្រប់គ្រងរបស់សមត្ថកិច្ច និងកំពុងរៀបចំនីតិវិធីបញ្ជូនទៅតុលាការដើម្បីចាត់ការតាមផ្លូវច្បាប់៕

អត្ថបទ៖ សុខុម