នគរបាលស្រុកបាទីឃាត់ខ្លួនស្ត្រីវ័យ២៤ឆ្នាំម្នាក់ ក្រោយចូលបន្លំដោះខ្សែ ក ពីក្មេងសិស្សសាលា​មត្តេយ្យសហគមន៍ត្រពាំងឈូក

កម្លាំងនគរបាលនៃអធិការដ្ឋាននគរបាលស្រុកបាទី នៃស្នងការដ្ឋាននគរបាលខេត្តតាកែវ កាលពីថ្ងៃទី១១ ខែសីហា ឆ្នាំ២០២៥នេះ បានស្រាវជ្រាវឃាត់ខ្លួនស្ត្រីសង្ស័យវ័យ២៤ឆ្នាំម្នាក់ ក្រោយចូលបន្លំដោះខ្សែ ក ពីក្មេងស្រីសិស្សសាលាមត្តេយ្យសហគមន៍ត្រពាំងឈូក ស្ថិតក្នុងភូមិត្រពាំងឈូក ឃុំក្រាំងលាវ។

តាមរបាយការណ៍របស់អធិការដ្ឋាននគរបាលស្រុកបាទី ស្ត្រីសង្ស័យមានឈ្មោះ ជៀប កង ភេទស្រី អាយុ២៤ឆ្នាំ មុខរបរមិនពិតប្រាកដ រស់នៅភូមិទួលស្លែង ឃុំក្រាំងលាវ ស្រុកបាទី ជាមុខសញ្ញាដើរធ្វើសកម្មភាពលួចបន្លំដោះគ្រឿងអលង្ការពីក្មេងៗសិស្សសាលាតូចជាច្រើនករណី ដោយប្រើប្រាស់មធ្យោបាយធ្វើដំណើរដោយម៉ូតូ១គ្រឿងម៉ាក​ស៊ុយស៊ូគីលែត សេរីឆ្នាំ២០១៩ ពណ៌ស-ក្រហម ពាក់ស្លាកលេខ តាកែវ ១G-៩១១៥។

របាយការណ៍បញ្ជាក់ថា កាលពីថ្ងៃទី១១ ខែសីហា ស្ត្រីជនសង្ស័យបានធ្វើសកម្មភាពប្រើល្បិចចូលលួចបន្លំដោះគ្រឿងអលង្ការខ្សែ ក ផ្លាកទីនចំនួន០១ខ្សែរបស់កុមារីជនរងគ្រោះឈ្មោះ សឿន ស្រីមាន ភេទស្រី អាយុ០៤ឆ្នាំ ជាសិស្សសាលាមត្តេយ្យ រស់នៅភូមិត្រពាំងឈូក ឃុំក្រាំងលាវ ស្រុកបាទី ខេត្តតាកែវ នៅក្នុងបរិវេណសាលាមត្តេយ្យសហគមន៍ត្រពាំងឈូក ខណៈពេលដែលកុមារីជនសរងគ្រោះដល់ម៉ោងសម្រាកចេញលេង។ ក្រោយពេលធ្វើសកម្មភាពលួចបន្លំដោះគ្រឿងអលង្ការខ្សែកពីកុមារីរងគ្រោះបានសម្រេច ជនសង្ស័យបានគេចខ្លួនចេញពីកន្លែងកើតហេតុបាត់ស្រមោលតែម្តង។

នៅថ្ងៃដដែលក្រោយពីទទួលបានពាក្យបណ្ដឹង លោកវរសេនីយ៍ឯក ឆាយ កែវមុន្នី អធិការនៃអធិការដ្ឋាននគរបាលស្រុកបាទី បានបញ្ជាឲ្យកម្លាំងជំនាញនគរបាលយុត្តិធម៌ធ្វើការស្រាវជ្រាវ រហូតឈានដល់ការឃាត់ខ្លួនជនសង្ស័យ និងដកហូតវត្ថុតាងខ្សែកផ្លាកទីនចំនួន០១ខ្សែ យកមកអធិការដ្ឋាននគរបាលស្រុក ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់ ចំណែកវត្ថុតាងត្រូវបានកម្លាំងជំនាញប្រគល់ឱ្យទៅឈ្មោះ ផេ សំណាង ត្រូវជាឪពុកបង្កើតកុមារីរងគ្រោះយកទៅប្រើប្រាស់វិញ៕