ផ្ទុះ​មេរោគឆ្លង​​​​ norovirus លើ​នាវា​មួយ​នៅ​អាមេរិក ខណៈវីរុស​ Hantavirus កំពុង​ព្រមាន​ដោយ WHO

មជ្ឈមណ្ឌលគ្រប់គ្រងនិងបង្ការជំងឺឆ្លង​​របស់សហរដ្ឋអាមេរិក (CDC)​ បាន​បញ្ជាក់​​​កាល​ពី​ថ្ងៃព្រហស្បតិ៍ ថា​ មាន​មនុស្សជាង ១០០នាក់ ​បាន​រងផលប៉ះពាល់​ដោយ​ការ​ផ្ទុះ​​ឡើង​នៃ​​មេរោគ norovirus ​លើនាវាទេសចរណ៍ Princess Cruises​ ខណៈអាជ្ញាធរ​សុខាភិបាល​ជុំវិញ​ពិភព​លោក ​កំពុង​ប្រកាស​ពីផលប៉ះពាល់ពីការរីករាល​ដាល​របស់​មេរោគ​ Hantavirus លើនាវាទេសចរណ៍​មួយ​ផ្សេងទៀត។

យោង​តាម​សារព័ត៌មាន FirstPost ផ្សាយ​ថ្ងៃ​ទី​៩ ខែឧសភា ឆ្នាំ​២០២៦ ដោយ​ផ្អែក​តាម ​​CDC នៅសហរដ្ឋអាមេរិក មាន​អ្នកដំណើរ​ចំនួន​ ១០២​នាក់និងសមាជិកនាវិក ១៣នាក់​ធ្លាក់ខ្លួន​ឈឺ​ ដោយសារ​មេរោគ ​norovirus លើនាវាទេសចរណ៍មួយ​គ្រឿង​នោះ​។

បច្ចុប្បន្ន​ពួក​គេ​កំពុងត្រូវ​បាន​ដាក់ឱ្យនៅដាច់ដោយឡែក​ពីអ្នកដំណើរ​ផ្សេង​ទៀត​ ដើម្បីការពារ​ការរីករាលដាល។

គួរ​កត់សម្គាល់ថា​មេរោគ norovirus គឺ​ជាជំងឺទូទៅ​មួយ ​​បណ្តាល​ឱ្យអ្នក​ផ្ទុក​​​មានរោគ​សញ្ញាក្រពះ​ពោះវៀន ដូច​ជា អាការៈ​រាគ និងក្អួត​​។ វា​ខុសពីមេរោគ Hantavirus ដែល​កម្រមាននិងគ្រោះថ្នាក់ជាង។

គួរបញ្ជាក់​ថា នាវា​ទេសចរណ៍ដែល​មានករណី​ឆ្លងមេរោគ norovirus ជាង ១០០ករណី គឺ​នាវា Caribbean Princess ចាកចេញ​ពី​កំពង់​ផែ Everglades ក្នុង​ទីក្រុង Fort Lauderdale រដ្ឋ Florida នៅថ្ងៃទី២៨ ខែមេសា។

យោងតាម​កាសែត The New York Times នាវា​​នោះ​​បច្ចុប្បន្ន​កំពុង​ស្ថិតនៅឆ្នេរសមុទ្រភាគខាងជើង​នៃសាធារណរដ្ឋ  Dominican គេរំពឹង​ថា​នាវា​នេះ​នឹង​ឈប់​នៅថ្ងៃអាទិត្យនៅ​កំពង់​ផែ​ Nassau រដ្ឋធានីនៃប្រទេស Bahamas ។

យ៉ាង​ណា ក្រុមហ៊ុន Princess Cruises លើក​ឡើង​ក្នុង​សេចក្តីថ្លែង​ការណ៍​មួយ​កាល​ពីថ្ងៃសុក្រថា៖ « ក្រុមហ៊ុន Princess Cruises អាចបញ្ជាក់បាន​ថា បុគ្គលមួយចំនួន​​ពិត​ជា​មាន​ជំងឺ​ក្រពះពោះវៀន​ស្រាល​ អំឡុង​ពេលធ្វើ​ដំណើរ​ជា​មួយ​ Caribbean Princess នៅថ្ងៃទី២៨ ខែមេសា ពីកំពង់ផែ Everglades »​។

យោងតាមមជ្ឈមណ្ឌលគ្រប់គ្រង និងបង្ការជំងឺរបស់អាមេរិក (CDC), Hantavirus មានផ្ទុកក្នុង​សត្វកណ្តុរ។ ជាទូទៅ ការឆ្លងវីរុសនេះ កើតឡើងនៅពេល មេរោគចេញពីទឹកនោម លាមក ឬទឹកមាត់របស់សត្វកណ្តុរ រួចភាយទៅអាកាស ហើយត្រូវមនុស្សដកដង្ហើមស្រូបចូល។

បច្ចុប្បន្ន Hantavirus មិនមានវ៉ាក់សាំងឡើយ ហើយក៏គ្មានថ្នាំព្យាបាលដែរ ប៉ុន្តែអ្នកជំងឺអាចព្យាបាលបាន តាមរយៈរោគសញ្ញាជាក់ស្តែង៕

ប្រែដោយ៖ ណឺ មិនា