អាជ្ញាធរសង្កាត់ច្បារអំពៅទី២ សំណូមពរដល់ពលរដ្ឋ​កុំបោះសំរាមចូលក្នុងទន្លេ

លោក យុិន វុធ ចៅសង្កាត់ច្បារអំពៅទី២ បានសំណូមពរយ៉ាងទទូចសូមឲ្យប្រជាពលរដ្ឋដែលរស់នៅតាមដងទន្លេបាសាក់បញ្ឈប់ការបោះសំរាមចូលទៅក្នុងទន្លេ​ និងមាត់ច្រាំងទន្លេទៀត ដែលបញ្ហានេះបង្កឲ្យប៉ះពាល់ដល់សុខភាពពលរដ្ឋ និងបរិស្ថានខ្លាំងណាស់។

លោក យុិន វុធ បានលើកឡើងថា សំរាមដែលស្ថិតនៅមាត់ច្រាំង និងក្នុងទន្លេ គឺមានតែពលរដ្ឋអ្នករស់នៅតាមដងទន្លេដែលតែងបោះសំរាមចោលដោយពុំរក្សាទុកដាក់ច្រកថង់សម្រាប់ឲ្យកម្មករប្រមូលសំរាមដឹកជញ្ជូនតាមរថយន្តនោះទេ។
ម្យ៉ាងទៀតតាមការសង្កេតឃើញរបស់អាជ្ញាធរសង្កាត់ គឺអ្នកធ្វើដំណើរឆ្លងកាត់ក្រោមស្ពានព្រះមុន្នីវង្សចាស់ និងស្ពានព្រះមុន្នីវង្សថ្មី ស្ថិតក្នុងខណ្ឌច្បារអំពៅ បានយកសំរាមច្រកក្នុងស្បោងរួចដឹកតាមម៉ូតូមកបោះចោលក្រោមស្ពានយ៉ាងអនាធិបតេយ្យបំផុត។

ជាក់ស្តែងសំរាមត្រូវបានស្ទះជាប់នឹងរបាំងទប់ស្កាត់សំរាមយ៉ាងច្រើន ពិសេសតាមមាត់ច្រាំងទន្លេក្រោមស្ពានរហូតដល់ស្អុយរលួយថែមទាំងជះក្លិនមកអ្នកដំណើរជារៀងរាល់ថ្ងៃ។ ចំពោះទង្វើរបស់ប្រជាពលរដ្ឋមួយចំនួនដែលតែងយកសំរាមចោលក្នុងទន្លេគួរភ្ញាក់រលឹកនាំគ្នាថែរក្សាបរិស្ថានទាំងអស់គ្នាទើបមូលដ្ឋានរបស់យើងបានល្អស្អាត៕

អត្ថបទ៖ នរា