គ្រូម៉ាឡេស៊ី ស្ដាយមិនអាចឈ្នះកម្ពុជា ដែលនាំឱ្យក្រុមខ្លួនជួបម្ចាស់ផ្ទះវៀតណាម នៅវគ្គ ១/២ផ្ដាច់ព្រ័ត្រ

ក្រុមជម្រើសជាតិអាយុក្រោម ២៣ឆ្នាំកម្ពុជា បានប្រកួតស្មើជាមួយ ម៉ាឡេស៊ី ដោយលទ្ធល ២-២ សម្រាប់ការប្រកួតចុងក្រោយ ប្រចាំពូល B នៃព្រឹត្តិការណ៍កីឡាអាស៊ីអាគ្នេយ៍ លើកទី៣១ នៅប្រទេសវៀតណាម នាល្ងាចថ្ងៃទី១៦ ខែឧសភា ឆ្នាំ២០២២ ម្សិលមិញ។

លទ្ធផលនេះបានធ្វើឲ្យ លោក Brad Maloney គ្រូបង្វឹកនៃក្រុម U-23 ម៉ាឡេស៊ី សម្ដែងការសោកស្ដាយ ដ្បិតធ្វើឱ្យក្រុមរបស់លោកត្រូវជួបម្ចាស់ផ្ទះវៀតណាមនៅវគ្គពាក់កណ្ដាលផ្ដាច់ព្រ័ត្រ (១/២ផ្ដាច់ព្រ័ត្រ)។

លោក Brad Maloney ថ្លែងក្នុងសន្និសីទសារព័ត៌មានក្រោយចប់ការប្រកួតដូច្នេះថា ៖«ទម្រង់លេងរបស់ U23​កម្ពុជាគឺល្អណាស់។ ពួកគេបានប្រើយុទ្ធសាស្ត្រការពារវាយបក ហើយបង្កើតឱកាសជាច្រើន។ ពួកគេបានអភិវឌ្ឍ និងផ្សារភ្ជាប់គ្នានាពេលកន្លងមក។

«ប្រកួត ៤ដងក្នុងរយៈពេល ១០ថ្ងៃនេះ គឺជាការលំបាកមួយ។ ការរៀបចំរបស់យើងមិនល្អទេ ដូច្នេះការជ្រើសរើសគូប្រកួតនៅវគ្គពាក់កណ្តាលផ្តាច់ព្រ័ត្រមានសារៈសំខាន់ណាស់ក្នុងការសម្រេចបានលទ្ធផលខ្ពស់។ យើងមិនសម្រេចបាននូវគោលដៅរបស់យើងទេ (គោលដៅចង់គេចពីវៀតណាម)។ ទោះបីជាយើងបានបង្កើតឱកាសជាច្រើននៅក្នុងការចាប់ផ្តើម យើងត្រូវតែទទួលយករឿងនេះ ប៉ុន្តែខ្ញុំជឿថាកីឡាករនឹងបង្ហាញទម្រង់លេងល្អ មិនថាពួកគេជួបនរណានៅវគ្គពាក់កណ្តាលផ្តាច់ព្រ័ត្រនោះទេ។ វគ្គពាក់កណ្តាលផ្តាច់ព្រ័ត្រនឹងមិនងាយស្រួលទេនៅពេលដែលអ្នកជួបក្រុមកំពូលតារាងនៃពូល A (វៀតណាម)»។ លោក Brad Maloney បានសង្កត់ធ្ងន់។

សូមបញ្ជាក់ថា U-23 ម៉ាឡេស៊ី បញ្ចប់ព្រឹត្តិការណ៍ស៊ីហ្គេម លើប្រភេទកីឡាបាល់ទាត់ វិញ្ញាសាបុរស ដោយឈរនៅលេខ២ ប្រចាំពូល B ក្រោយប្រកួត ៤ដង ឈ្នះ២ និងស្មើ២ មាន ៨ពិន្ទុ។ ពួកគេនឹងត្រូវជួបវៀតណាម នោវគ្គពាក់កណ្ដាលផ្ដាច់ព្រ័ត្រ នៅថ្ងៃទី១៩ ឧសភា ខាងមុខនេះ៕

អត្ថបទ៖ មន្នីរ័ត្ន