FIFA ត្រូវបានស្នើឱ្យហាមឃាត់អ៊ីរ៉ង់ មិនឱ្យចូលរួមការប្រកួត World Cup 2022 នៅកាតា

សហព័ន្ធកីឡាបាល់ទាត់ពិភពលោក (FIFA) ត្រូវបានអំពាវនាវឱ្យហាមឃាត់អ៊ីរ៉ង់ ពីការប្រកួតបាល់ទាត់ពិភពលោក (FIFA World Cup 2022) នៅប្រទេសកាតា។

បុគ្គលិកបាល់ទាត់ និងកីឡារបស់អ៊ីរ៉ង់មួយក្រុមបានផ្ញើសំណើផ្លូវការមួយទៅកាន់ស្ថាប័ន FIFA ដើម្បីសុំឱ្យផ្អាកសមាគមបាល់ទាត់អ៊ីរ៉ង់។ ពួកគេទាមទារការអន្តរាគមន៍ពីរដ្ឋាភិបាល ដោយបញ្ឈប់ស្ត្រីចូលក្នុងកីឡដ្ឋាននៅក្នុងប្រទេសអ៊ីរ៉ង់ ដែលបំពានច្បាប់របស់ FIFA។ វាកើតឡើងចំពេលមានការបង្រ្កាបដោយហិង្សាដោយកងកម្លាំងសន្តិសុខរបស់ប្រទេសប្រឆាំងនឹងការតវ៉ាប្រឆាំងរដ្ឋាភិបាល​ដែលកំពុងរីករាលដាល។ សំណើនេះក៏ធ្វើឡើងបន្ទាប់ពីការអំពាវនាវស្រដៀងគ្នានេះពីអង្គការសិទ្ធិមនុស្ស Open Stadiums កាលពីខែមុន។

ក្រុមនេះបាននិយាយថា “ភាពឃោរឃៅ និងការជេរប្រមាថរបស់អ៊ីរ៉ង់ចំពោះប្រជាជនរបស់ខ្លួនបានឈានដល់ចំណុចកំពូល ដោយទាមទារឱ្យមានការផ្តាច់ទំនាក់ទំនងយ៉ាងច្បាស់លាស់ និងរឹងមាំពីពិភពបាល់ទាត់ និងកីឡា”។ “ស្ត្រីត្រូវបានបដិសេធជាប្រចាំមិនឱ្យចូលកីឡដ្ឋាននៅទូទាំងប្រទេស ហើយត្រូវបានដកចេញជាប្រព័ន្ធ ពីប្រព័ន្ធអេកូបាល់ទាត់ក្នុងប្រទេសអ៊ីរ៉ង់ ដែលផ្ទុយស្រឡះជាមួយនឹងតម្លៃ និងលក្ខន្តិកៈរបស់ FIFA។ “ប្រសិនបើស្ត្រីមិនត្រូវបានអនុញ្ញាតឱ្យចូលក្នុងកីឡាដ្ឋាននៅទូទាំងប្រទេស ហើយសហព័ន្ធកីឡាបាល់ទាត់អ៊ីរ៉ង់អនុវត្តតាម និងអនុវត្តគោលការណ៍ណែនាំរបស់រដ្ឋាភិបាល ពួកគេមិនអាចត្រូវបានគេមើលឃើញថាជាអង្គការឯករាជ្យ និងមិនមានទម្រង់ ឬប្រភេទនៃឥទ្ធិពលណាមួយឡើយ។ នេះគឺជាការរំលោភលើ (មាត្រា ១៩) នៃលក្ខន្តិកៈរបស់ FIFA ។

កាលពីដើមឆ្នាំនេះ FIFA បានសរសេរទៅកាន់អាជ្ញាធរដោយស្នើសុំឱ្យពួកគេអនុញ្ញាតឱ្យស្ត្រីបន្ថែមទៀតចូលទៅក្នុងកីឡដ្ឋាន ហើយស្ត្រីមួយចំនួនត្រូវបានអនុញ្ញាតឱ្យចូលរួមការប្រកួតដែលបានជ្រើសរើសនៅក្នុងលីគកំពូលរបស់អ៊ីរ៉ង់ Persian Gulf Pro League’។ ក្រុមនេះគាំទ្រដោយក្រុមហ៊ុនច្បាប់អេស្ប៉ាញ៕

ប្រភព៖ BBC

អត្ថបទ៖ មន្នីរ័ត្ន